លោក ចូ បៃដិន ធ្វើកិច្ចពិភាក្សាតាមវីដេអូអនឡាញជាមួយមេដឹកនាំឥណ្ឌា ជប៉ុន និងអូស្រ្តាលី ផ្តោតសំខាន់លើជំងឺកូវីដ១៩ និងបញ្ហាប្រែប្រួលអាកាសធាតុ
អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃសុក្រនេះ (ម៉ោងក្នុងតំបន់) បានជួបពិភាក្សាតាមវីដេអូអនឡាញជាមួយមេដឹកនាំរបស់ប្រទេសជប៉ុន ឥណ្ឌា និងអូស្រ្តាលី ដោយផ្តោតជាសំខាន់លើបញ្ហាប្រែប្រួលអាកាសធាតុ និង ជំងឺរាតត្បាតកូវីដ១៩ រួមទាំងបញ្ហាដទៃទៀតនៅក្នុងតំបន់ ។
បន្ទាប់ពីជំនួបកំពូលបួនប្រទេសនេះជាលើកដំបូង ទីប្រឹក្សាសន្តិសុខជាតិអាមេរិករបស់លោក ចូ បៃដិន គឺលោក លោក ជេក ស៊ុលលីវ៉ាន (Jake Sullivan) បានប្រាប់អ្នកសារព័ត៌មានដោយសង្ខេបនៅឯសេតវិមានថា ក្រុមចតុប្រទេសដែលមានឈ្មោះថា ខ្វដ (Quad) បានធ្វើការសន្យាតាំងចិត្តដ៏ធំមួយ ចំពោះផែនការផលិតវ៉ាក់សាំងបង្ការជំងឺកូវីដ១៩ ហើយថា ខ្វដ បានប្តេជ្ញាបញ្ជូនវ៉ាក់សាំងកូវីដ១៩ចំនួន១ពាន់លានដូសមកកាន់អាស៊ី, តំបន់ឥណ្ឌូ-ប៉ាស៊ីហ្វិក និងហួសពីនេះនៅយ៉ាងយូរត្រឹមចុងឆ្នាំ២០២២ខាងមុខ ។
បើតាមសេចក្តីថ្លែងការណ៍របស់សេតវិមាន ក្រុមហ៊ុន Biological E របស់ឥណ្ឌានឹងផលិតវ៉ាក់សាំងយ៉ាងតិច១ពាន់លានដូសនៅយ៉ងយូរបំផុតត្រឹមចុងឆ្នាំក្រោយ ដោយផ្តោតលើវ៉ាក់សាំងចាក់តែម្តងរួចរាល់របស់ក្រុមហ៊ុនអាមេរិក Johnson & Johnson ។ ការផលិតនេះ នឹងជួយផ្តល់ហិរញ្ញវត្ថុដោយជប៉ុន ព្រមទាំងអង្គការអាមេរិកមួយ ។ ចំណែកអូស្ត្រាលីនឹងចូលរួមចំណែក៧៧លានដុល្លារ បន្ថែមលើការសន្យាកាលពីមុនចំនួន៤០៧លានដុល្លារ ដើម្បីធានាថា វ៉ាក់សាំងត្រូវបានបញ្ជូនអោយមកចាក់នៅអាស៊ីអាគ្នេយ៍ ។ក្រៅពីជួយលុយផលិតហើយនោះ ជប៉ុនក៏នឹងចេញប្រាក់៤១លានដុល្លារទៀតសំរាប់ការចែកចាយវ៉ាក់សាំង ដែលទាមទារការគ្រប់គ្រងសីតុណ្ហភាពយ៉ាងល្អផងដែរ ៕ ប្រភព៖ ស៊ីនហួរ
