ក្រុមហ៊ុន AstraZeneca បញ្ជាក់ថា ក្រុមជំនាញរកមិនឃើញមានភស្ដុតាងណាមួយបង្ហាញថា ក្រោយចាក់វ៉ាក់សាំងខ្លួនហើយ អាចបង្កឲ្យមានបញ្ហាកំណកឈាមឡើយ
អង់គ្លេស៖ ក្រុមហ៊ុនផលិតឱសថអង់គ្លេស អាស្រ្តាហ្សេណេកា (AstraZeneca) បញ្ជាក់ថា ការត្រួតពិនិត្យឡើងវិញលើទិន្នន័យសុវត្ថិភាពរបស់អ្នកដែលបានចាក់វ៉ាក់សាំង COVID-19 របស់ខ្លួន មិនបានបង្ហាញភស្ដុតាងណាមួយ ពីការកើនឡើងហានិភ័យ នៃបញ្ហាកំណកឈាមក្នុងសសៃឈាមនោះទេ ។
នៅក្នុងសេចក្ដីថ្លែងការណ៍ចេញផ្សាយនៅថ្ងៃអាទិត្យម្សិលមិញ ក្រុមហ៊ុនផលិតឱសថអង់គ្លេសនេះបញ្ជាក់ថា បន្ទាប់ពីការត្រួតពិនិត្យយ៉ាងយកចិត្តទុកដាក់លើទិន្ន ន័យសុវត្ថិភាពរបស់អ្នកចាក់វ៉ាក់សាំងជាង១៧លាននាក់នៅអង់គ្លេស និងអឺរ៉ុប មិនមានភស្ដុតាងណាមួយបញ្ជាក់ពីហានិភ័យ នៃការស្ទះសសៃឈាមសួត ឬកំណកឈាមជាដុំតូចៗក្នុងសសៃឈាម ក្នុងចំណោមក្រុមមនុស្ស ដោយគិតទាំងទៅលើវ័យ ភេទ ឬក៏ក្រុមមនុស្សនៅក្នុងប្រទេសណាមួយនោះទេ ។
ការលើកឡើងខាងលើនេះរបស់លោក ក្រុមហ៊ុនផលិតឱសថអង់គ្លេស អាស្រ្តាហ្សេណេកា ធ្វើឡើងបន្ទាប់ពីអាជ្ញាធរសុខាភិបាលនៅក្នុងប្រទេសអៀរឡង់ ដាណឺម៉ាក ន័រវែស អ៊ីតាលី ហូឡង់ និងប្រទេសមួយចំនួនទៀត កាលពីសប្ដាហ៍មុនបានសម្រេចចិត្តផ្អាកការចាក់វ៉ាក់សាំងរបស់ អាស្រ្តាហ្សេណេកា ជូនប្រជាជនរបស់ពួកគេ ក្រោយប្រទេសអឺរ៉ុបជាច្រើនរកឃើញថា អ្នកដែលបានចាក់វ៉ាក់សាំងក្រុមហ៊ុនផលិតឱសថអង់គ្លេសនេះ មានបញ្ហាកំណកឈាមក្នុងសសៃឈាម ៕ ប្រភព៖ Reuters
