សហរដ្ឋអាមេរិកនិយាយថា សកម្មភាពរបស់ចិនបានគំរាមកំហែងដល់ស្ថិរភាពសកលលោក ក្នុងអំឡុងកិច្ចប្រជុំកំពូលទ្វេភាគីក្នុងរដ្ឋអាឡាស្កា
អាមេរិក៖ រដ្ឋមន្ត្រីការបរទេសអាមេរិកលោក អាន់តូនី ប្លីងគែន បានគូសបញ្ជាក់ថា សកម្មភាពរបស់ចិនកំពុងគំរាមកំហែងដល់ស្ថិរភាពសកលលោក ខណៈអះអាងបែបនេះធ្វើឡើងអំឡុងពិធីបើកកិច្ចប្រជុំកម្រិតខ្ពស់ ជាមួយសមាជិកការិយាល័យនយោបាយ នៃគណបក្សកុម្មុយនិស្ដចិនលោក យ៉ាង ជីឈី និងរដ្ឋមន្ត្រីការបរទេសចិនលោក វ៉ាង យី ក្នុងរដ្ឋអាឡាស្កា ដែលមានរយៈពេល០២ថ្ងៃ គឺចាប់ពីថ្ងៃទី១៨ ដល់ថ្ងៃទី១៩ ខែមីនានេះ ។
លោក អាន់តូនី ប្លីងគែន បន្តថា ខាងភាគីអាមេរិកនឹងបើកការពិភាក្សាស្តីអំពីសកម្មភាពរបស់ចិន ក្នុងនោះរួមមានទាំងតំបន់ស៊ីនជាំង ជាទីដែលអាមេរិកចោទប្រកាន់ចិនថា បានប្រព្រឹត្តអំពើប្រល័យពូជសាសន៍ ប្រឆាំងជនជាតិដើមភាគតិចមូស្លីម អ៊ុយហ្គ័រ ខណៈទីក្រុងប៉េកាំងបានបដិសេធការចោទប្រកាន់នេះ និងបង្ហាញភស្តុយ៉ាងច្រើនទៅដល់អន្តរជាតិវិញរួចទៅ ។ លោកបន្ថែមថា សំណុំរឿងទីក្រុងហុងកុង កោះតៃវ៉ាន់ និងការវាយប្រហារព័ត៌មានវិទ្យាលើអាមេរិក ព្រមទាំងការគំរាមកំហែងផ្នែកសេដ្ឋកិច្ចប្រឆាំងនឹងសម្ព័ន្ធមិត្ត ក៏នឹងត្រូវបានលើកឡើងនៅក្នុងកិច្ចប្រជុំជាមួយប្រមុខការទូតចិនទាំងពីរផងដែរ ។
ជាការឆ្លើយតប លោក យ៉ាង ជីឈី អះអាងថា ចិនប្រឆាំងជាដាច់ខាត ចំពោះការលូកលាន់កិច្ចការផ្ទៃក្នុងរបស់ចិន ហើយបានអំពាវនាវឱ្យអាមេរិកបញ្ឈប់ជាបន្ទាន់នូវចិត្តសាស្ត្រសង្រ្គាមត្រជាក់ ។ លោកបានសង្កត់ធ្ងន់ថា អាមេរិកតែងតែប្រើប្រាស់កម្លាំងយោធា និងហិរញ្ញវត្ថុ ដើម្បីគំរាមកំហែង និងដាក់សម្ពាធលើបណ្ដាប្រទេសដទៃ ៕ ប្រភព៖ AFP
