ម៉ាឡេស៊ីផ្តើមចាក់វ៉ាក់សាំងចិនបង្ការកូវីដ១៩ដែរហើយ បន្ទាប់ពីចាក់វ៉ាក់សាំងអាមេរិក
កាលពីថ្ងៃទី ១៨ ខែមីនា២០២១ ប្រទេសម៉ាឡេស៊ីបានចាប់ផ្តើមយុទ្ធនាការចាក់វ៉ាក់សាំងបង្ការជំងឺ COVID-19 ជូនប្រជាជនរបស់ខ្លួន ដោយប្រើវ៉ាក់សាំងដែលផលិតឡើងដោយក្រុមហ៊ុនចិន Sinovac។ វ៉ាក់សាំង Sinovac គឺជាវ៉ាក់សាំង COVID-19 ទី២ សម្រាប់ប្រើក្នុងការចាក់ជូនប្រជាជនរបស់ម៉ាឡេស៊ី បន្ទាប់ពីវ៉ាក់សាំងដែលត្រូវបានបង្កើតដោយ Pfizer-BioNTech។
រដ្ឋមន្រ្តីវិទ្យាសាស្ត្រ បច្ចេកវិទ្យា និងច្នៃប្រឌិតរបស់ប្រទេសម៉ាឡេស៊ីលោក Khairy Jamaluddin បានក្លាយជាមនុស្សដំបូងគេដែលទទួលចាក់វ៉ាក់សាំង CoronaVac នៅក្នុងប្រទេសម៉ាឡេស៊ី។ លោក Khairy ដែលក៏ជាប្រធានគណៈកម្មការសម្របសម្រួលសម្រាប់កម្មវិធីចាក់វ៉ាក់សាំងរបស់ម៉ាឡេស៊ីផងនោះ បានប្រាប់សន្និសីទសារព័ត៌មានបន្ទាប់ពីទទួលចាក់វ៉ាក់សាំងនេះរួចថា លោកមានអារម្មណ៍ល្អធម្មតាទេ។
រដ្ឋមន្រ្តីរូបនេះបានសង្កត់ធ្ងន់ថា វ៉ាក់សាំង Sinovac ត្រូវបានប្រើនៅក្នុងប្រទេសជាច្រើន និងដោយមេដឹកនាំប្រទេសជាច្រើនផងដែរ ក្នុងនោះរួមមានទាំងប្រធានាធិបតីឥណ្ឌូនេស៊ីលោក Joko Widodo និងប្រធានាធិបតីតួកគីលោក Recep Tayyip Erdogan៕
