អ៊ីតាលីសម្រេចបណ្តេញអ្នកការទូតរុស្ស៊ីចំនួន២រូប ដោយចោទប្រកាន់ពីបទមានជាប់ពាក់ព័ន្ធក្នុងអំពើចារកិច្ច
អ៊ីតាលី៖ កងកម្លាំងពិសេសអ៊ីតាលីបានចាប់ខ្លួនមន្ត្រីកងទ័ពជើងទឹកមួយរូប នៅយប់ថ្ងៃអង្គារសប្តាហ៍នេះ ក្រោយមន្ត្រីយោធារូបនោះបានជួប និងផ្តល់ឯកសារទៅមន្ត្រីការទូតរុស្ស៊ី ។ ចំណែកមន្ត្រីការទូតរុស្ស៊ីមិនត្រូវបានចាប់ខ្លួនឡើយ ដោយមានអភ័យឯកសិទ្ធិការទូត ។
ជុំវិញបញ្ហានេះដែរ រដ្ឋមន្ត្រីការបរទេសអ៊ីតាលីលោក Luigi Di Maio បានហៅឯកអគ្គរដ្ឋទូតរុស្ស៊ីលោក Sergey Razov មកសួរនាំ និងតវ៉ាជាផ្លូវការ ។ លោក Maio បានប្រាប់ឯកអគ្គរដ្ឋទូតរុស្ស៊ីពីការបណ្តេញចេញជាបន្ទាន់ នូវមន្ត្រីការទូតរុស្ស៊ីចំនួន២រូប ដែលពាក់ព័ន្ធក្នុងសកម្មភាពដ៏ធ្ងន់ធ្ងរនេះ ។ ប្រភពពីក្រុមស្រាវជ្រាវអ៊ីតាលីអះអាងថា មន្ត្រីកងទ័ពជើងមួយរូបឈ្មោះ Walter Biot បម្រើការនៅអង្គភាពគោលនយោបាយយោធា ក្នុងការិយាល័យនាយសេនាធិការកងទ័ព ។ អង្គភាពនេះ ទទួលបន្ទុកព័ត៌មានសំងាត់ទាំងអស់ រួមទាំងឯកសារសម្ងាត់របស់សម្ពន្ធយោធា NATO ផងដែរ ។ ក្រុមអ្នកស៊ើបអង្កេតអ៊ីតាលីនិយាយថា លោក Biot ទទួលប្រាក់ចំនួន៥ពាន់អឺរ៉ូពីមន្ត្រីការទូតរុស្ស៊ី ។ ចំណែកប៉ូលិសអ៊ីតាលីអះអាងថា ការចាប់ខ្លួននេះអាចធ្វើទៅរួច ក្រោយមានការស៊ើបអង្កេតអស់រយៈពេលជាយូរ ដែលដឹកនាំដោយភ្នាក់ងារចារកិច្ចអ៊ីតាលី (AISI) និងគាំទ្រដោយអគ្គនាយសេនាធិការកងទ័ព ។
ពាក់ព័ន្ធនឹងការបណ្តេញមន្ត្រីការទូតរបស់ខ្លួនខាងលើនេះ អ្នកនាំពាក្យវិមានក្រឹមឡាំងលោក Dmitry Peskov សង្ឃឹងថា ទំនាក់ទំនងដែលមានលក្ខណៈវិជ្ជមាន និងបែបស្ថាបនារវាងប្រទេសទាំងពីរនឹងបន្តទៅមុខទៀត ខណៈស្ថានទូតរុស្ស៊ីនៅរដ្ឋធានីរ៉ូមបានត្រឹមសម្តែងការសោកស្តាយ ប៉ុន្តែពុំបានលើកឡើងពីចំណាត់ការប្រឆាំងតបនឹងអ៊ីតាលីវិញឡើយ ៕ ប្រភព៖ CNA
