បុគ្គលិកសាខាក្រុមហ៊ុន វីរៈ ប៊ុនថាំ នៅក្នុងស្រុកទាំង៣ និងសាខាទាំង៤ទីតាំងនៅក្នុងក្រុងបាត់ដំបងជាង១០០នាក់ តាមរយៈការយកសំណាក និងធ្វើតេស្តរហ័ស លទ្ធផល “អវិជ្ជមាន”ទាំងអស់
មន្ទីរសុខាភិបាល នៃ រដ្ឋបាលខេត្តបាត់ដំបង បានគូសបញ្ជាក់ឲ្យដឹង តាមរយៈទំព័រផេកហ្វេសប៊ុកផ្លូវការរបស់ខ្លួនថា៖ ការយកវត្ថុសំណាកបុគ្គលិកសាខាក្រុមហ៊ុនវីរៈប៊ុនថាំ ទាំង៤សាខានៅក្នុងក្រុងបាត់ដំបង ចំនួន៨៧នាក់ (ស្រី៣៥នាក់) និងនៅសាខាតាមបណ្តាស្រុកទាំង៣(ស្រុកកំរៀង ភ្នំព្រឹកនិងស្រុកសំពៅលូន) ចំនួន៣១នាក់ (ស្រី១៣នាក់) ជាលទ្ធផលតេស្តរហ័ស “អវិជ្ជមាន”ទាំងអស់។
ផេកហ្វេសប៊ុកផ្លូវការរបស់មន្ទីរដដែលនេះ ក៏បានឲ្យដឹងនៅយប់ថ្ងៃទី០២ និងថ្ងៃទី០៣ ខែឧសភាឆ្នាំ២០២១ នេះបានបង្ហាញថា៖ការអនុវត្តយុទ្ធសាស្ត្ររហ័ស ៤ គឺ៖រហ័ស រកឱ្យឃេីញ រហ័សដាក់នៅដោយឡែក រហ័សរាយការណ៍ និងរហ័សពិនិត្យ -ព្យាបាល។ ក្នុងនោះសកម្មភាពយកសំណាកបុគ្គលិកក្រុមហ៊ុនដឹកជញ្ជូន វីរៈ ប៊ុនថាំ ចំនួន៤សាខា (ផ្សារថ្មី ផ្សារបឹងឈូក ផ្សារលើ និង ផ្សារភូ ពុយ ) នៅក្រុងបាត់ដំបង បានចំនួន ៨៧នាក់ (ស្រី ៣៥នាក់) ដែលទាក់ទងទៅនឹងករណីរកឃេីញវិជ្ជមានកូវីដ-១៩ ដោយតេស្តរហ័ស លើបុគ្គលិកបើកបរដឹកទំនិញក្រុមហ៊ុននេះពីក្រុងប៉ោយប៉ែត ខេត្តបន្ទាយមានេជ័យ ដោយក្រុមឆ្លេីយបបន្ទាន់ខេត្តបៃលិន ។ ដែលភាគច្រេីនពួកគាត់បានស្ម័គ្រចិត្តមកធ្វើតេស្តដោយខ្លួនឯង។
ដោយឡែក សំណាកពាក់ព័ន្ធ នឹងករណីនេះ មានចំនួន ៣១នាក់ (ស្រី ១៣នាក់)ត្រូវបានបញ្ជូនមកពី ស្រុកសំពៅលូន ចំនួន ៧ នាក់ (ស្រី៣នាក់) , ស្រុកភ្នំព្រឹក ចំនួន ១០នាក់ (ស្រី ៥នាក់) និងស្រុកកំរៀង ចំនួន ១៤នាក់ (ស្រី ៥នាក់)។
ក្នុងផេកផ្លូវការរបស់មន្ទីរសុខាភិបាលខេត្តបាត់ដំបង ក៏បានគូសបញ្ជាក់បន្ថែមទៀតថា៖ ករណីវិជ្ជមានដោយតេស្តរហ័សនេះ នឹងត្រូវបញ្ជាក់ដោយតេស្ត GyneXpertនៅមន្ទីរពិសោធន៍នៃមន្ទីរពេទ្យបង្អែកខេត្តបាត់ដំបង នៅយប់ថ្ងៃទី០២ខែឧសភានេះនិងនៅព្រឹកថ្ងៃទី០៣ខែឧសភាឆ្នាំ២០២១ បានបញ្ជាក់ថា៖ សំណាកបុគ្គលិកក្រុមហ៊ុន វីរៈប៊ុនថាំចំនួន ៨៧ (ស្រី ៣៥នាក់) ពាក់ព័ន្ធនឹងករណីអ្នកបើកបររថយន្តដឹកទំនិញនិងបញ្ញើ របស់ ក្រុមហ៊ុននេះ ដែលបានរកឃើញ វិជ្ជមានកូវីដ-19 ដោយតេស្តរហ័សនៅខេត្តប៉ៃលិន ត្រូវបានពិនិត្យ និងបញ្ជាក់លទ្ធផលជាថ្មី ដោយម៉ាស៊ីន GyneXpert នៅមន្ទីរពិសោធន៍នៃមន្ទីរពេទ្យបង្អែកខេត្តបាត់ដំបង គឺ “អវិជ្ជមាន” (Negative) ទាំងអស់ រួមទាំងអ្នកបើកបរនេះផងដែរ៕( អត្ថបទ-រូបភាព៖ អ៊ុក សំអាន បប )
