រាជធានីភ្នំពេញ៖ ក្រសួងអប់រំយុវជននិងកីឡានៅថ្ងៃទី ២៥ ខែមិថុនា ឆ្នាំ២០២១នេះ បានរៀបចំពិធីប្រកាសផ្សព្វផ្សាយជាផ្លូវការវីដេអូ ស្តីពីការបង្រៀនពីចម្ងាយ និងការដាក់ឲ្យប្រើប្រាស់ប្រព័ន្ធគ្រប់គ្រងការសិក្សាសម្រាប់កម្មវិធីសមមូលមធ្យមសិក្សាបឋមភូមិអប់រំក្រៅប្រព័ន្ធ តាមប្រព័ ន្ធអនឡាញ។

គួរបញ្ជាក់ថាកម្មវិធីនេះមានការគាំទ្រទាំងថវិកា និងបច្ចេកទេសពីអង្គការ GoodNeighbors International និងអង្គការ UNESCO ក្រសួងអប់រំ យុវជន និងកីឡា ដែលមាននាយកដ្ឋានអប់រំក្រៅប្រព័ន្ធ និងនាយកដ្ឋានបច្ចេកវិទ្យាព័ត៌មាន ជាសេនាធិការ បានសហការគ្នារៀបចំការបង្រៀនកម្មវិធីសមមូលមធ្យមសិក្សាបឋមភូមិអប់រំក្រៅប្រព័ន្ធពីចម្ងាយ។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានមានប្រសាសន៍ក្នុងអង្គពិធី ដោយសារការរីករាលដាលជំងឺកូវីដ ១៩ មិនថានៅប្រទេសយើងទេ តែវាជាបញ្ហាសកល ដូចនេះការរៀនតាមប្រព័ន្ធអនឡាញជាកែប្រែឥរិយាបទថ្មីមួយ ក្នុងការរៀនប្រើប្រាស់បច្ចេកវិទ្យា ជាមួយគ្នានេះដែរអ្នកសិក្សាក៏ត្រូវតែមានកាប្តេជ្ញាចិត្តសម្រាប់ការរៀនសូត្រពេញមួយជីវិតសម្រាប់មន្រ្តីអប់រំ មិនថាតែការអប់រំក្រៅប្រព័ន្ធនោះទេ។

ឯកឧត្តមរដ្ឋមន្រ្តីក៏បានជំរុញឲ្យរៀបចំមជ្ឈមណ្ឌល និម្មិតសិក្សាពេញមួយជីវិត ដែលអាចឲ្យសិស្សក្រៅសាលា និងក្នុងសាលាអាចសិក្សាបាន និងបន្ថែមមុខវិជ្ជាមួយចំនួនទាក់ទង និងបំណិនអាជីពរៀនដោយខ្លួនឯងលើបណ្តាញ៕ដោយ៖ម៉ាដេប៉ូ