អាជ្ញាធរស្រុកបន្ទាយស្រីណែនាំពីវិធានការពារនៃជំងីផ្លូវដង្ហើមប្រភេទថ្មីករណីជំងឺ Covid 19 ជូនដល់មន្ត្រីក្រោមឪវាទ
យល់ដឹងត្រូវ! ប្រុងប្រៀបត្រូវ! មិនប្រហែស! តែមិនស្លន់ស្លោរហួសហេតុ! នេះគឺជាអ្វីដែលរដ្ឋបាលស្រុកបន្ទាយស្រីកំពុងតែធ្វើ និងជំរុញផ្សព្វផ្សាយឲ្យបានទូលំទូលាយ។ ក្នុងផេកហ្វេសប៊ុករបស់ លោក ឃឹមហ្វីណង់ អភិបាលស្រុកបន្ទាយស្រី បង្ហាញថា ចាប់ផ្តើមពីថ្ងៃនេះ ថ្ងៃស្អែក និងថ្ងៃបន្តបន្ទាប់ទៀត រដ្ឋបាលស្រុកនឹងព្យាយាមបញ្ច្រៀបការយល់ដឹង និងពង្រាងវិធានការបឋម ដើម្បីចូលរួមបង្ការ និងត្រៀមខ្លួនទប់ទល់ ដោះស្រាយការរីករាលដាលនៃជំងឺនេះជាយថាហេតុណាមួយ។ យើងចាប់ផ្តើមពីមន្ត្រីទាំងអស់នៅក្នុងរដ្ឋបាលស្រុក មុននឹងបន្តផ្សព្វផ្សាយនិងប្រុងប្រៀបផែនការ តាមរយៈគណៈបញ្ជាការឯកភាពស្រុក គ្រូបង្រៀន សិស្សានុសិស្សនៅតាមសាលារៀន និងសាធារណជនទូទៅ។
បើទោះជាហានិភ័យនៃការរីករាលដាលស្ថិតនៅក្នុងកម្រិតទាបនៅឡើយ តែក្នុងនាមជាស្រុកដែលមានទេសចរណ៍ឆ្លងកាត់ និងមានភ្ញៀវមកទស្សនាច្រើន និងមានទីតាំងភូមិសាស្ត្រនៅកៀកនឹងទីរួមខេត្ត ការត្រៀមលក្ខណៈសម្បត្តិទៅតាមដំណាក់កាលនីមួយៗគឺជារឿងចាំបាច់ ដើម្បីបង្ការ បង្កើនទំនុកចិត្ត និងធានាឲ្យបាននូវការគ្រប់គ្រងស្ថានការណ៍ទៅតាមពេលវេលា និងកាលៈទេសៈ។
ដំណាក់កាលនេះគឺ ជាដំណាក់កាលដែលត្រូវអប់រំការយល់ដឹងឲ្យបានត្រឹមត្រូវ ផ្តោតទៅលើការស្វែងយល់ពីរបៀបឆ្លង និងវិធីបង្ការការពារខ្លួន ក៏ដូចជាការជជរុញអោយមានអនាម័យផ្ទាល់ខ្លួនរឹតតែខ្ពស់។ ម៉ាស់មុខនឹងមានផ្តល់ជូនចំពោះមន្ត្រីតែក្នុងករណីចាំបាច់តែប៉ុណ្ណោះ តែយើងជំរុញឲ្យមានការលាងដៃជាប្រចាំនិងញឹកញាប់ជំនួសវិញ។ ការគ្រប់គ្រងកម្តៅជាប្រចាំ និងការអនុញ្ញាតអោយអ្នកមិនស្រួលខ្លួនអាចសម្រាកនៅផ្ទះក៏ជាវិធានការដែលយើងនឹងចាប់អនុវត្តន៍ពីពេលនេះផងដែរ។
ក្រៅពីនេះ យើងពុំគួរមានអ្វីដែលត្រូវបារម្ភរឺធ្វើលើសពីវិធានការខាងលើនេះនោះទេ។ បងប្អូនទាំងអស់នៅតែអាចបន្តជីវភាពជាធម្មតា ហើយភ្ញៀវទេសចរក៏នៅតែអាចបន្តមកលេងកំសាន្តដូចរាល់ដងដែរ។ ការភ័យខ្លាចហួសហេតុពេក រឺចូលរួមផ្សព្វផ្សាយព័ត៌មានមិនពិត នឹងផ្តល់ផលមិនល្អដល់សង្គមជាតិយើងទៅវិញទេ។
ការកើតមានករណីដំបូងនៃជំងឺ Covid 19 នៅក្នុងក្រុងសៀមរាបនេះ គឺជារឿងថ្មី តែការប្រតិកម្មទាន់ពេលវេលា ជាមួយនិងវិធានការម៉ត់ចត់ប្រកបដោយប្រសិទ្ធភាព ដែលនាំអោយអាជ្ញាធរអាចគ្រប់គ្រងស្ថានការណ៍បានរហូតមកដល់ពេលនេះ ក៏ជារឿងសំខាន់ដែលយើងត្រូវតែដឹងដែរ។ ជាការពិត ប្រសិនបើមានការផ្ទុះរីករាលដាលទ្រង់ទ្រាយធំនៅក្នុងស្រុក ដែលអាចនាំទៅដល់ការហាមឃាត់មិនឲ្យមានការប្រមូលផ្តុំរឺបិទសាលារៀន នោះអាជ្ញាធរនឹងមានវិធានការបន្ថែមទៀត ហើយវាគឺជាអ្វីដែលយើងកំពុងត្រៀមខ្លួននិងរៀបចំផែនការទុកជាមុនទៅតាមសេណារីយ៉ូនីមួយៗ។
យើងគួរមានទំនុកចិត្តទៅលើការប្រុងប្រៀបខ្លួនរបស់រាជរដ្ឋាភិបាល និងយកពេលវេលានេះទៅលើកទឹកចិត្តគ្រូពេទ្យទាំងអស់ ដែលកំពុងតែជាប់ដៃនៅសមរភូមិមុខ ប្រយុទ្ធប្រឆាំងនឹងជំងឺនេះជំនួសយើង ជាជាងបង្កភាពអវិជ្ជមានដល់សន្តិសុខនិងសេដ្ឋកិច្ចជាតិ៕
