ដោយ៖ សុខ វេងឈាង

កាលពីថ្ងៃអង្គារទី២៩ មិថុនានេះអតីតអគ្គរដ្ឋអាជ្ញាកូរ៉េខាងត្បូងមួយរូបលោក YoonSuk-youl បានប្រកាសបេក្ខភាព​របស់លោកនៅ​ក្នុងការ​បោះឆ្នោតប្រធានាធិបតីនៅឆ្នាំក្រោយ ជាមួយនឹងការវាយប្រហារយ៉ាងខ្លាំងទៅកាន់រដ្ឋបាល ប្រធានាធិបតីបច្ចុប្បន្ន លោក MoonJae-In ថាជារដ្ឋបាល«ពុករលួយ និងអសមត្ថភាព»។

ផ្អែកតាមរដ្ឋធម្មនុញ្ញកូរ៉េខាងត្បូង លោកMoon ត្រូវបានកំណត់ឱ្យកាន់អំណាចត្រឹមតែមួយអាណត្តិ ប៉ុណ្ណោះ​ហើយគណបក្ស​ប្រជាធិបតេយ្យរបស់លោក​មិនទាន់បានប្រកាសបេក្ខជនប្រធានាធិបតីថ្មីនៅឡើយ​។

«របបនេះបានបំផ្លាញមូលដ្ឋានគ្រឹះនៃប្រទេស ដោយបោះបង់ចោលនូវញ្ញាណសាមញ្ញយុត្តិធម៌និងនីតិរដ្ឋ»លោកYoonបាននិយាយបែបនេះហើយបន្តទៀតថា៖«យើងត្រូវតែបញ្ឈប់ការប៉ុនប៉ងរបស់កម្លាំងកាន់អំណាចដែលពុករលួយនិងអសមត្ថភាពក្នុងការបន្តអាណត្តិរបស់ពួកគេហើយបន្តការប្លន់ពីប្រជាជន»។

រឿងអាស្រូវជាច្រើនពាក់ព័ន្ធនឹងជំនួយការរបស់លោកMoon និងអ្នកនយោបាយបក្សកាន់អំណាច​ដែលត្រូវបានគេចោទ​ប្រកាន់ពីបទរំលោភអំណាច​ដើម្បីប្រមូលទ្រព្យសម្បត្តិបានធ្វើឱ្យគណបក្សប្រជាធិបតេយ្យសេរីស្ថិតក្នុងភាពច្របូកច្របល់។

បន្ទាប់ពីត្រូវបានតែងតាំងដោយលោកMoonជាអគ្គរដ្ឋអាជ្ញាក្នុងឆ្នាំ២០១៩ លោក Yoon បានរងការរិះគន់យ៉ាងខ្លាំងពីអ្នកគាំទ្រ​របស់​លោកប្រធានាធិបតីបន្ទាប់ពីលោក បានធ្វើការចោទប្រកាន់លោកលោកChoKukដែលជាជំនួយការប្រធានាធិបតីដ៏សំខាន់មួយរូបនិងជាអតីត​រដ្ឋមន្ត្រីក្រសួងយុត្តិធម៌ចំពោះបទឧក្រិដ្ឋជាច្រើនរួមមានសំណូកសូកប៉ាន់និងការក្លែងឯកសារជាដើម។ ប៉ុន្តែការសកម្មភាពនេះបានធ្វើឱ្យលោកYoon មានប្រជាប្រិយភាពនិងការគាំទ្រពីសំណាក់សាធារណជននិងគណបក្សប្រឆាំង។

លោក Yoon បាននិយាយកាលពីថ្ងៃអង្គារថាលោក បានចែករំលែកទស្សនវិជ្ជាជាមួយគណបក្សអភិរក្សនិយមប៉ុន្តែបានបដិសេធ​មិននិយាយថាតើលោកនឹងចូលរួមជាមួយគណបក្សណាទេ៕