អុកស៊ីសែនឡើងថ្លៃនៅឥណ្ឌូនេស៊ី ខណៈពេលដែលករណីឆ្លងកូវីដ១៩កើនឡើង
ដោយ៖សុខវេងឈាង
កាលពីថ្ងៃអង្គារទី២៩មិថុនា តម្លៃឧស្ម័នអុកស៊ីសែនបានកើនឡើងច្រើនជាងទ្វេដង នៅរដ្ឋធានីហ្សាកាតាប្រទេសឥណ្ឌូនេស៊ី ហើយអ្នកផ្គត់ផ្គង់មួយចំនួនបានរាយការណ៍ថាមានការខ្វះខាតខណៈពេលដែលករណីឆ្លងកូវីដ១៩នៅប្រទេសកើនឡើងយ៉ាងខ្លាំង។
ក្នុងរយៈពេលប៉ុន្មានថ្ងៃនេះប្រទេសឥណ្ឌូនេស៊ីបានប្រកាសផ្សាយករណីឆ្លងកូវីដ-១៩ ចំនួន២០.០០០ករណីក្នុងមួយថ្ងៃដែលជាកម្រិតឆ្លងខ្ពស់បំផុតរបស់ប្រទេសនេះ ពេលដែលរលកឆ្លងថ្មីជំរុញដោយវីរុសបម្លែង ថ្មីងាយចម្លងជាងមុន និងការកើនឡើងការចល័តមនុស្សបន្ទាប់ពីខែរ៉ាម៉ាដានរបស់សាសនិកម៉ូស្លីម។
មន្ទីរពេទ្យជាច្រើននៅតំបន់ក្រហមដែលរួមរដ្ឋធានីហ្សាកាតាគឺពេញចំណុះហើយបានចាប់ផ្ដើមបដិសេធទទួលអ្នកជំងឺថ្មី។ក្រុមគ្រួសារអ្នកជំងឺមួយចំនួនបានទៅទិញអុកស៊ីសែនដើម្បីថែទាំនៅគេហដ្ឋាន។អ្នកផ្គត់ផ្គង់អុកស៊ីសែនបានរាយការណ៍ថាតម្លៃក្នុងមួយធុងបានកើនពី៥០ដុល្លាររហូតទៅដល់១៤០ដុល្លារ។
មន្ត្រីជាន់ខ្ពស់នៃក្រសួងសុខាភិបាលឥណ្ឌូនេស៊ី លោកស្រី SitiNadiaTarmizi បាននិយាយថា៖«មន្ទីរពេទ្យគឺពេញដោយសារការកើនឡើងករណីឆ្លងបណ្ដាលមកពីការកើនឡើងការចល័តមនុស្ស និងការបន្ធូរបន្ថយការគោរពវិធានការសុខាភិបាលដែលកាន់តែពិបាកជាងមុនដោយសារវីរុសបម្លែងប្រភេទDelta»។
ការរីករាលដាលវីរុសកូរ៉ូណាបម្លែងDelta បានធ្វើឱ្យមានព្រួយបារម្ភអំពីការកើតឡើងវិបត្តិដ៏ធំមួយនៅឥណ្ឌូនេស៊ីហើយជាប្រទេសមានចំនួនប្រជាជនច្រើនជាងគេលំដាប់ទីបួន ក្នុងពិភពលោកហើយអាចមានទំហំផលប៉ះពាល់ដូចនៅប្រទេសឥណ្ឌាដែលជាកន្លែងរកឃើញវីរុសបម្លែងនេះជាលើកដំបូង។ កាលពីថ្ងៃអង្គារប្រទេសឥណ្ឌូនេស៊ីបានរកឃើញករណី ឆ្លងថ្មីចំនួន២០,៥៦៧ និងមានការស្លាប់៤៦៣ ធ្វើឲ្យចំនួនសរុបកើនដល់២.១៥៦.៤៦៥ករណី និងស្លាប់ចំនួន៥៨,០២៤៕
Source:https://www.reuters.com/world/asia-pacific/indonesias-covid-19-situation-nears-catastrophe-red-cross-2021-06-29/
