សហរដ្ឋអាមេរិក និងជប៉ុនធ្វើ«ល្បែងសង្គ្រាមសម្ងាត់» ហើយបរៀបចំផែនការសម្រាប់សង្គ្រាមនៅកោះតៃវ៉ាន់
សហរដ្ឋអាមេរិក និងជប៉ុនបានធ្វើ «ល្បែងសង្គ្រាមសម្ងាត់» ដើម្បីត្រៀមសម្រាប់ជម្លោះដែលអាចកើតឡើងជាមួយចិនជុំវិញបញ្ហាកោះតៃវ៉ាន់ នេះបើតាមការរាយការណ៍របស់កាសែត The Financial Times ដែលបានដកស្រង់សំដីពីប្រភពយោធាជាច្រើន។
បើយោងតាមប្រភពមិនបញ្ចេញឈ្មោះចំនួន ៦រូបដែលបានលើកឡើងនៅក្នុងការរាយការណ៍នេះ សហរដ្ឋអាមេរិក និងជប៉ុនបានចាប់ផ្ដើមរៀបចំផែនការសម្រាប់ជម្លោះដែលអាចកើតឡើងនៅឆ្នាំចុងក្រោយនៃអាណត្តិរបស់ប្រធានាធិបតីដូណាល់ ត្រាំ។ ស្របពេលជាមួយនឹងការរៀបចំផែនការ ក្រុងវ៉ាស៊ីនតោន និងតូក្យូបានធ្វើ «ល្បែងសង្គ្រាម និងការសមយុទ្ធរួមសម្ងាត់នៅសមុទ្រចិនខាងត្បូង និងសមុទ្រចិនខាងកើត»។ ប្រភពជាច្រើន បាននិយាយថាសមយុទ្ធរួមគ្នាទាំងនេះត្រូវបានធ្វើឡើងដោយសម្ងាត់ក្រោម «ការវឹកហាត់ជំនួយគ្រោះមហន្តរាយ»។
យោងតាមរបាយការណ៍នេះ កិច្ចសហប្រតិបត្តិការបានកើនឡើងយ៉ាងខ្លាំងរវាង សហរដ្ឋអាមេរិក ជប៉ុន និងតៃវ៉ាន់ បន្ទាប់ពីមានកិច្ចព្រមព្រៀងមួយកាលពីឆ្នាំ ២០១៧ ដើម្បីចែករំលែកលេខកូដយន្តហោះយោធា ដែលនឹងធ្វើឱ្យមានភាពងាយស្រួលក្នុងការកំណត់អត្តសញ្ញាណយន្តហោះសម្ព័ន្ធមិត្ត។
ការត្រៀមទាំងនេះធ្វើឡើងខណៈពេលដែលភាពតានតឹងរវាងចិន និងជប៉ុនកំពុងកើនឡើង។ ថ្មីៗនេះ ជប៉ុនបានចោទប្រកាន់ប្រទេសចិនថាបានបើកនាវាឆ្លងកាត់ដែនទឹកនៃប្រជុំកោះSenkaku ជាទឹកដីគ្រប់គ្រងដោយប្រទេសជប៉ុន ប៉ុន្តែបានទាមទារដោយប្រទេសចិន។ ទីក្រុងប៉េកាំងមិនទទួលស្គាល់ការត្រួតត្រារបស់ជប៉ុនលើប្រជុំកោះនេះទេ ហើយចាត់ទុកទឹកដីនោះថាប្រជុំកោះ Diaoyu។ ប្រទេសជប៉ុនទទួលបានការគាំទ្រពីសហរដ្ឋអាមេរិក ហើយប្រទេសទាំងពីរត្រូវបានទីក្រុងប៉េកាំងចោទប្រកាន់ថាបាន «ព្រួតគ្នាធ្វើបាប» ចិនដីគោក។
