រដ្ឋមន្ត្រីការពារជាតិហ្វីលីពីនដាក់បញ្ជាឱ្យស៊ើបអង្កេតការធ្លាក់យន្តហោះយោធា
ហ៊ីម រដ្ឋា
រដ្ឋមន្ត្រីក្រសួងការពារជាតិហ្វីលីពីនលោក Delfin Lorenzana បានបញ្ជាឱ្យបើកការស៊ើបអង្កេតពីការធ្លាក់យន្តហោះយោធាម៉ាក C-130 កាលពីថ្ងៃអាទិត្យកន្លងទៅ ឱ្យបានលឿនបំផុតក្រោយពេលដែលបេសកកម្មសង្គ្រោះមនុស្សបានបិទបញ្ចប់ នេះបើតាមការបង្ហោះសាររបស់លោកនៅលើបណ្ដាញសង្គម Twitter។
យន្តហោះដឹកជញ្ជូនយោធាមួយគ្រឿងបានដឹកទាហានចំនួន ៩៦នាក់ ដែលត្រៀមនឹងចូលប្រយុទ្ធក្នុងប្រតិបត្តិការប្រឆាំងភេរវកម្មនឹងក្រុមឧទ្ទាមឥស្លាមនៅភាគនិរតីហ្វីលីពីន។ មកទល់នឹងថ្ងៃចន្ទនេះ Reuters បានចុះផ្សាយថាមាន មនុស្សចំនួន ៤៧នាក់បានបាត់បង់ជីវិត ៤៩នាក់បានរងរបួស ខណៈ ៥នាក់បានបាត់ខ្លួន ក្នុងការធ្លាក់យន្តហោះនេះ។ ក្នុងចំណោមជនរងគ្រោះទាំងអស់ ក៏មានជនស៊ីវិលនៅលើដី ៣នាក់ស្លាប់ និង៤នាក់ទៀតរងរបួស ដោយការធ្លាក់យន្តហោះនេះផងដែរ។
តាមការសន្និដ្ឋានបឋមរបស់យោធាហ្វីលីពីនបានឲ្យដឹងថា មិនមានសញ្ញាណាមួយថា យន្តហោះដែលធ្លាក់នេះរងការវាយប្រហារពីខាងណានោះទេ។
ប្រជុំកោះ Sulu ត្រូវបានគេស្គាល់ថាជាមូលដ្ឋានរបស់ក្រុមឧទ្ទាម Abu Sayyaf ដែលជាញឹកញាប់បានធ្វើប្លន់លើគោក និងប្លន់កប៉ាល់តាមសមុទ្រ។ ក្រុមនេះត្រូវបានយោធាហ្វីលីពីនព្យាយាមបង្ក្រាបរាប់សិបឆ្នាំមកហើយ៕
ប្រភព៖
Philippines’ plane crash kills 47, injures 49; probe ordered
