ភាពប្រះឆាគ្នាក្នុងទីផ្សារថាមពលរវាងអារ៉ាប់រួម និងអារ៉ាប់ប៊ីសាអូឌីត បង្កឱ្យតម្លៃប្រេងឡើងខ្ពស់
ការប៉ះទង្គិចគ្នាជាសាធារណៈដ៏ជូរចត់រវាងអារ៉ាប់រួម និងអារ៉ាប់ប៊ីសាអូឌីត ជុំវិញតម្លៃផលិតកម្មប្រេងនៅសប្តាហ៍នេះ បណ្តាលឱ្យកិច្ចពិភាក្សារវាងប្រទេសផលិតប្រេងធំជាងគេបំផុតនៅលើពិភពលោកទាំងពីរនេះត្រូវគេចាត់ទុកជាមោឃៈ បណ្ដាលឱ្យទីផ្សារថាមពលក្នុងភាពមិនជាក់លាក់ ដែលនឹងជំរុញឱ្យតម្លៃប្រេងឡើងដល់កម្រិតខ្ពស់ក្នុងរយៈពេល ៦ឆ្នាំ។ នេះបើតាមឱ្យដឹងពីការផ្សាយរបស់សារព័ត៌មាន BBC។
ក្រុមប្រទេសនាំប្រេងចេញចំនួន ២៣ (Opec+) រួមមានទាំងអង្គការនៃក្រុមប្រទេសនាំចេញប្រេង និងសម្ព័ន្ធមិត្តដូចជា ប្រទេសរុស្ស៊ី ត្រូវពន្យាពេលការចរចាររបស់ពួកគេ ដោយគ្មានការកំណត់ច្បាស់លាស់ ដែលជាហេតុធ្វើឱ្យមានភ័យខ្លាចអំពីស្ថេរភាពក្រុមប្រទេសទទួលផ្គត់ផ្គង់តម្រូវការប្រេង កំពុងប្រឈមនឹងវិបត្តិសេដ្ឋកិច្ចពិភពលោកក្នុងរយៈពេល ១៨ ខែកន្លងមក។
បញ្ហានេះបានចាប់ផ្តើមកាលពីសប្តាហ៍មុន នៅពេល ដែលប្រទេសអារ៉ាប់រួម បានច្រានចោលសំណើររបស់មេដឹកនាំក្រុមប្រទេស Opec+ គឺប្រទេសអារ៉ាប៊ីសាអូឌីត និងរុស្ស៊ី ដែលធ្វើឡើងក្នុងគោលបំណងពង្រីកការទប់ស្កាត់ទិន្នផលសម្រាប់ទប់ទល់នឹងការនាំចេញរយៈពេល ៨ ខែទៀត។
អារ៉ាប់រួម ចង់ចរចាឡើងវិញនូវមូលដ្ឋានបច្ចុប្បន្នរបស់ខ្លួន ស្ដីអំពី កម្រិតពីការកាត់បន្ថយផលិតកម្ម ឬ ការកើនឡើងត្រូវបានគណនាកន្លងមក ដើម្បីផ្តល់សិទ្ធិសេរីភាពក្នុងការបូមប្រេងបន្ថែមទៀត។ ទោះយ៉ាងណា អារ៉ាប៊ីសាអូឌីត និងរុស្ស៊ី បានប្រឆាំងនឹងសំណើររបស់អារ៉ាប់រួម។ ប្រតិកម្មនេះ បានក្លាយទៅជាសកម្មភាពមិនធម្មតានៅពេល ដែលសម្ព័ន្ធមិត្តជិតស្និទ្ធរវាងរដ្ឋមន្ត្រីថាមពលនៃអារ៉ាប់រួម និងអារ៉ាប់ប៊ីសាអូឌីត បានសំដែងគោលគំនិតផ្ទុយគ្នាជាសាធារណៈ។
លោក Ben Cahill សមាជិកជាន់ខ្ពស់នៅមជ្ឈមណ្ឌលសិក្សាយុទ្ធសាស្ត្រ និងអន្តរជាតិនៅវ៉ាស៊ីនតោន បានប្រាប់សារព័ត៌មាន BBC ថា៖ «ការប្រេះឆាគ្នានេះ បានធ្វើឱ្យមានការភ្ញាក់ផ្អើល ប៉ុន្តែភាពច្របូកច្របល់ ដែលអាចកើតមានឡើងបន្ទាប់ពីនេះ គឺជារឿងជៀសមិនរួច»។
លោកបានបន្តថា៖ «សមត្ថភាពផលិតរបស់អារ៉ាប់រួម មានភាពផ្ទុយពីកូតារបស់ក្រុមប្រទេស Opec ។ ប្រទេសនេះ បានវិនិយោគប្រាក់ជាច្រើន ដើម្បីបង្កើនផលិតកម្មរបស់ខ្លួន។ ហើយឥឡូវនេះ តម្រូវការក៏កំពុងកើនឡើងដូចគ្នា។ ដូច្នេះហើយទើប អារ៉ាប់រួម មានភាពអន្ទះសារអំពីភាពអសមត្ថភាពរបស់ខ្លួនក្នុងការបង្កើនផលិតកម្មកាលពីឆ្នាំមុន»។
លទ្ធផលនៅក្នុងក្រុមប្រទេស Opec+ គឺជាការបន្សល់ ដោយការប្រកួតប្រជែងផ្នែកសេដ្ឋកិច្ច ដែលកំពុងកើនឡើងរវាង ប្រទេសទាំងពីរ ដែលព្យាយាមធ្វើពង្រីកកំណើនសេដ្ឋកិច្ចលើវិស័យចម្រុះរៀងៗខ្លួន ដោយកាត់បន្ថយការពឹងផ្អែកសេដ្ឋកិច្ចខ្លួនលើវិស័យថាមពលអ៊ីដ្រូកាបូននេះ។
ប្រទេសអារ៉ាប់ប៊ីសាអូឌីតទៀតសោត ក៏បានប្រកាន់យកនូវយុទ្ធសាស្ត្រសេដ្ឋកិច្ចដ៏ខ្លាំងក្លាមួយក្រោមការគ្រប់គ្រងរបស់លោក Mohammed bin Salman ហើយបច្ចុប្បន្នប្រទេសនេះ កំពុងប្រកួតប្រជែងក្នុងវិស័យមួយចំនួន ដូចជា វិស័យទេសចរណ៍ សេវាកម្ម ហិរញ្ញវត្ថុ និងបច្ចេកវិទ្យាជាដើម។
លោក Neil Quilliam អ្នកសិក្សា និងវិភាគកិច្ចការអន្តរជាតិនៅស្ថាប័ន Chatham House ប្រចាំការនាទីក្រុងឡុង បានឱ្យដឹងថា៖ «អារ៉ាប៊ីសាអ៊ូឌីត គឺជាប្រទេសយក្សនៅក្នុងតំបន់ ដែលកំពុងងើបឡើងវិញ។ ហើយការងើបឡើងនេះ ពេលខ្លះបង្កជាក្តីកង្វល់ដល់អារ៉ាប់រួម»។
លោកបន្តថា៖ «ក្នុងរយៈពេល ១៥ ទៅ ២០ ឆ្នាំខាងមុខ ប្រសិនបើអារ៉ាប៊ីសាអូឌីត ផ្លាស់ប្តូរទៅជាសេដ្ឋកិច្ចដ៏មានអំណាចនោះ វានឹងក្លាយជាការគំរាមកំហែងមួយសម្រាប់គំរូសេដ្ឋកិច្ចអារ៉ាប់រួម»។
យ៉ាងណាមិញ គ្មានអ្នកណាទាន់អាចនិយាយបានថា អារ៉ាប៊ីសាអ៊ូឌីត និងអារ៉ាប់រួម អាចនឹងយល់ព្រមលើកិច្ចព្រមព្រៀង Opec+ ថ្មីនេះដែរឬទេ។
ប៉ុន្តែលោក Ali Shihabi អ្នកវិភាគអារ៉ាប៊ីសាអូឌីត មិនជឿថា ការប្រេះឆានេះនឹងរារាំងទំនាក់ទំនងរបស់ប្រទេសទាំងពីរ ក្នុងរយៈពេលវែងនោះទេ បើទោះបីជា ជំហរម៉ឺងម៉ាត់របស់អារ៉ាប់រួម បានធ្វើឱ្យមានការភ្ញាក់ពីអារ៉ាប់ប៊ីសាអូឌីតក៏ដោយ។ លោកជឿជាក់ថា រាល់ទំនាក់ទំនងប្រទេសនានា តែងឆ្លងកាត់ការលំបាក និងទំនាស់មួយចំនួន រួមទាំង សហរដ្ឋអាមេរិក និងចក្រភពអង់គ្លេសផងនោះ។ ប៉ុន្តែ មូលដ្ឋានគ្រឹះនៃទំនាក់ទំនងនេះរឹងមាំខ្លាំង ដែលមិនអាចបង្កការខូចខាតជាអចិន្ត្រៃយ៍ដល់សម្ព័ន្ធមិត្តនេះទេ។
លោក Eman Alhussein អ្នកសិក្សានៅវិទ្យាស្ថាននៅឈូងសមុទ្រអារ៉ាប់ក្នុងរដ្ឋធានីវ៉ាស៊ីនតោន មានប្រសាសន៍ថា៖ « ការប្រកួតប្រជែងក្នុងតំបន់រវាងបណ្តាប្រទេសឈូងសមុទ្រ បានកើនឡើងជាខ្លាំងនាពេលថ្មីៗនេះ ខណៈដែលអារ៉ាប៊ីសាអ៊ូឌីតនិងអារ៉ាប់រួម កំពុងព្យាយាមទាក់ទាញវិនិយោគិន និងទេពកោសល្យពីបរទេស»។
លោកបន្តថា៖ «ទោះយ៉ាងណាអារ៉ាប់ប៊ីសាអូឌីត និងអារ៉ាប់រួម នៅតែរក្សាកិច្ចសហប្រតិបត្តិការក្នុងវិស័យផ្សេងៗ។ បណ្តាប្រទេសនៅឈូងសមុទ្រ កំពុងរៀនរស់នៅជាមួយ បើទោះប្រទេសនីមួយៗមានភាពខុសគ្នារៀងៗខ្លួនយ៉ាងណាក្ដី»។ សៅ សម្ភស្ស
