បុគ្គលិកសុខាភិបាលថៃរាប់រយនាក់នៅតែឆ្លងកូវីដ-១៩ ទោះជាចាក់វ៉ាក់សាំង Sinovac បាន ២ដូសរួចក្ដី
បុគ្គលិកសុខាភិបាលនៅប្រទេសថៃសរុបចំនួន ៦១៨នាក់ ក្នុងចំណោមសរុបប្រមាណ ៦៨ ម៉ឺននាក់ដែលបានទទួលវ៉ាក់សាំងកូវីដ១៩ ពេញលេញ បានឆ្លងជំងឺកូវីដ១៩ អំឡុងខែមេសា ដល់ខែកក្កដា ដោយមានគិលានុបដ្ឋាយិកាមួយរូបបានបាត់បង់ជីវិត ហើយបុគ្គលិកពេទ្យម្នាក់ទៀតកំពុងស្ថិតក្នុងសភាពធ្ងន់ធ្ងរ នេះបើតាមស្ថិតិក្រសួងសុខាភិបាលថៃ។
ភាគច្រើននៃបុគ្គលិកសុខាភិបាល និងអ្នកធ្វើការជួរមុខនៅថៃបានចាក់វ៉ាក់សាំងចិន Sinovac ចាប់ពីខែកុម្ភៈមក ខណៈវ៉ាក់សាំង AstraZeneca ទើបតែចាប់ផ្ដើមចាក់នៅខែមិថុនាតែប៉ុណ្ណោះ។
ទន្ទឹមនឹងជួបសភាពការណ៍បែបនេះដែរ ក្រុមអ្នកជំនាញវេជ្ជសាស្ត្របានផ្ដល់អនុសាសន៍ឱ្យចាក់វ៉ាក់សាំងដូសទី៣ ដល់បុគ្គលិកសុខាភិបាលដែលប្រឈមមុខនឹងហានិភ័យ។ បើយោងតាមមន្ត្រីជាន់ខ្ពស់សុខាភិបាលប្រទេសថៃ លោក Sopon Iamsirithawon បានប្រាប់អ្នកកាសែតកាលពីថ្ងៃសៅរ៍ថា វ៉ាក់សាំងដូសទី៣ អាចនឹងជាវ៉ាក់សាំង AstraZeneca ឬ វ៉ាក់សាំងប្រភេទ mRNA (អាចជា Pfizer ឬ Moderna)។
រដ្ឋាភិបាលថៃរំពឹងទុកថានឹងទទួលបានវ៉ាក់សាំង Pfizer-BioNTech ចំនួន ១,៥លានដូស ដែលជាការបរិច្ចាគរបស់សហរដ្ឋអាមេរិកនៅក្នុងខែកក្កដានេះ ហើយនឹងទទួលបាន ២០លានដូសទៀតនៅខែតុលា ដែលជាការបញ្ជាទិញ៕
ប្រភព៖ CNA
