អស្ចារ្យ! រថយន្តក្រុងអគ្គិសនីបើកបរលើដងផ្លូវដោយស្វ័យប្រវត្តិ ត្រូវបានដាក់អោយប្រើប្រាស់ជាផ្លូវការនៅចក្រភពអង់គ្លេស (មានវីដេអូ)
អង់គ្លេស៖ រថយន្តក្រុងសាធារណៈអាចដំណើរការលើដងផ្លូវដោយបើកស្វ័យ ប្រវត្តិ ទើបនឹងប្រកាសដាក់អោយប្រើប្រាស់ជាផ្លូវការនៅចក្រភពអង់គ្លេស ។ គម្រោងសាកល្បងយានយន្តបើកស្វ័យប្រវត្តិនេះ បានធ្វើតេស្តច្រើនជាង០៥ឆ្នាំមកហើយ ទើបនឹងលេចចេញជារូបរាងផ្លូវការ ។ ទោះជាយ៉ាងណា វាមិនទាន់ពេញលេញ១០០ភាគរយនៅឡើយទេ ព្រោះនៅត្រូវការធ្វើតេស្តបន្ថែមទៀត ។
រថយន្តក្រុងដែលមានរូបរាងដូចមនុស្សយន្តនេះ អាចដឹកមនុស្សបាន១០នាក់ ។ វាដំណើរការដោយថាមពលអគ្គិសនី កម្លាំងរត់បានល្បឿនលឿនបំផុត៣២គីឡូ ម៉ែត្រក្នុងមួយម៉ោង ពេលសាកពេញរត់បានឆ្ងាយបំផុត១៦០គីឡូម៉ែត្រ ។បច្ចុប្បន្ន Aurrigo ដែលជាក្រុមហ៊ុនឯកទេសផ្នែកផលិតបច្ចេកវិទ្យាយានយន្តស្វ័យប្រវត្តិ បានដាក់ឲ្យវារត់នៅផ្លូវបីខ្សែ និងនៅជុំវិញបរិវេណសាកលវិទ្យាល័យ Cambridge សម្រាប់បម្រើការជូនសាធារណជន និងនិស្សិត២៤ម៉ោងក្នុងមួយសប្ដាហ៍ ហើយក៏ដឹកបានមនុស្សច្រើនជាង១០០នាក់រួចមកហើយប្រកបដោយសុវត្ថិភាព ចាប់តាំងពីដើមខែមិថុនា ឆ្នាំ២០២១ ។
គួរកត់សម្គាល់ថា រថយន្តក្រុងអគ្គិសនីនេះ ត្រូវបានបង្កើតឡើងដោយប្រើប្រាស់បច្ចេកវិទ្យាចំនួន០៣សហការរួមគ្នាដូចជា៖ AWS Wavelength របស់ក្រុមហ៊ុន Amazon បច្ចេកវិទ្យា 5G Vodafone របស់ក្រុមហ៊ុនទូរទគមនាគមន៍ចល័ត និង MEC technologies ជាបច្ចេកវិទ្យាបង្កើតដោយអ្នកវិទ្យាសាស្រ្តនៃសាកលវិទ្យាល័យ Cambridge ៕
