កូរ៉េខាងត្បូង បានកោះហៅ ប្រេសិតជប៉ុនជុំវិញ ការអត្ថាធិប្បាយមិនសមរម្យអំពីលោក Moon
ប្រទេសកូរ៉េខាងត្បូងបាន កោះហៅឯកអគ្គរដ្ឋទូត ជប៉ុននៅថ្ងៃសៅរ៍ (១៧ ខែកក្កដា) ជុំវិញការលើកឡើងមិនសមរម្យអំពីប្រធានាធិបតី Moon Jae-in ដោយមន្ត្រីការទូតជប៉ុនមួយរូប និងលទ្ធភាពនៃកិច្ចប្រជុំកំពូលមួយអំឡុងព្រឹត្តិការណ៍អូឡាំពិក ទីក្រុងតូក្យូនាពេលខាងមុខនេះ។
មន្ត្រីការទូតជាន់ខ្ពស់ជប៉ុនម្នាក់ត្រូវបានគេរាយការណ៍ថា បានសើចចំអកជុំវិញការលើកឡើងរបស់លោក Moon ក្នុងការចង់ជួបជាមួយនាយករដ្ឋមន្ត្រីជប៉ុន លោក Yoshihide Suga ដោយនិយាយថាមេដឹកនាំកូរ៉េខាងត្បូងរូបនេះគឺ «កំពុងសម្រេចកាមដោយខ្លួនឯង»។
អ្នកការទូតរូបនោះ ដែលមិនត្រូវបានគេបញ្ចេញអត្តសញ្ញាណ បានបន្ថែមនៅក្នុងបទសម្ភាសន៍ជាមួយទូរទស្សន៍កូរ៉េខាងត្បូង JTBC ថា លោក Moon កំពុងស្ថិតក្នុង «ការទាញព្រ័ត្រជាមួយខ្លួនឯង» ពីព្រោះជប៉ុន«មិនដែលយកចិត្តទុកដាក់លើទំនាក់ទំនងសេអ៊ូល – តូក្យូទេ»។
ការអត្ថាធិប្បាយនេះធ្វើឡើង នៅពេលដែលប្រទេសទាំងពីរត្រូវគេរាយការណ៍ថា គឺកំពុងពិភាក្សាគ្នាអំពីការឈានទៅរកការជួបប្រជុំកំពូលមួយរវាងមេដឹកនាំក្នុងអំឡុងព្រឹត្តិការណ៍កីឡាអូឡាំពិក ដើម្បីធ្វើឱ្យប្រសើរឡើងនូវ ចំណងទាក់ទងដែលបានធ្លាក់ចុះដល់កម្រិតដ៏អាក្រក់បំផុតក្នុងរយៈពេលប៉ុន្មានឆ្នាំចុងក្រោយនេះ ជុំវិញជម្លោះប្រវត្តិសាស្ត្រ។
បន្ទាប់ពីការចេញផ្សាយរបាយការណ៍របស់ JTBC ឯកអគ្គរដ្ឋទូតជប៉ុនប្រចាំកូរ៉េខាងត្បូង បាននិយាយថាសំដីទាំងនេះគឺជារបស់ឯកអគ្គរដ្ឋទូតរងលោក Hirohisa Somaដែលបាននិយាយពាក្យ«មិនសមរម្យបំផុត» ប៉ុន្តែមិនបានបញ្ជាក់ច្បាស់ពីអ្វីខ្លះត្រូវបាននិយាយនៅក្នុងបទសម្ភាសន៍។
ទីក្រុងតូក្យូ និងសេអ៊ូល គឺជាសម្ព័ន្ធមិត្តដ៏សំខាន់របស់អាមេរិក ប៉ុន្តែទំនាក់ទំនងរវាងប្រទេសទាំងពីរមានភាពតានតឹងដោយសារជម្លោះ លើសំណងសម្រាប់ការគ្រប់គ្រងអាណានិគម របស់ជប៉ុននៅដើមសតវត្សទី ២០ លើឧបទ្វីបកូរ៉េ។ នៅក្នុងសន្និសីទកាសែត កាលពីដើមខែនេះមេដឹកនាំប្រទេសជប៉ុន ត្រូវបានគេរាយការណ៍ថាបានទទួលស្គាល់នូវទំនាក់ទំនង «លំបាកខ្លាំងណាស់» ដោយសារតែបញ្ហាសង្គ្រាម ប៉ុន្តែបាននិយាយថាវាអាស្រ័យលើកូរ៉េខាងត្បូងក្នុងការឆ្លើយតបចំពោះបញ្ហាទាំងនេះ។
