ប្រទេសចិនចង់បានម៉ាស៊ីនផលិតបន្ទះឈីប ពីហូឡង់ ប៉ុន្តែសហរដ្ឋអាមេរិកជំទាស់
ម៉ាស៊ីនមួយចំនួន ដែលជាផ្នែកដ៏សំខាន់បំផុតរបស់ឧស្សាហកម្មបច្ចេកវិទ្យា ត្រូវបានគេផលិតនៅរោងចក្រមួយជាប់នឹងចំការពោតមួយកន្លែងនៅប្រទេសហូឡង់។ រដ្ឋាភិបាល សហរដ្ឋអាមេរិក កំពុងព្យាយាមធ្វើយ៉ាងកុំឱ្យម៉ាស៊ីនទាំងនេះធ្លាក់ចូលក្នុងដៃរបស់ប្រទេសចិន។
ទីក្រុងប៉េកាំង បានដាក់សម្ពាធលើរដ្ឋាភិបាលហូឡង់ ឱ្យអនុញ្ញាតឱ្យក្រុមហ៊ុនចិនទិញម៉ាស៊ីនផលិតបន្ទះឈីបជំនាន់ថ្មីរបស់ក្រុមហ៊ុនហូឡង់ASML Holding តាមរយៈបច្ចេកវិទ្យា extreme ultraviolet lithography ។
ម៉ាស៊ីនមានទម្ងន់ជាង ១៨០ តោននេះត្រូវបានប្រើប្រាស់ដោយក្រុមហ៊ុនបច្ចេកវិទ្យាធំៗ ជាច្រើនរួមមានក្រុមហ៊ុនអាមេរិក Intel Corp, ក្រុមហ៊ុនកូរ៉េខាងត្បូង Samsung Electronics និងក្រុមហ៊ុនផ្គត់ផ្គង់ឈានមុខគេរបស់ក្រុមហ៊ុន Apple Inc គឺក្រុមហ៊ុន Taiwan Semiconductor Manufacturing (TSMC) ដើម្បីផលិតបន្ទះឈីបគ្រប់បែបយ៉ាងសម្រាប់ប្រើក្នុងទូរស័ព្ទស្មាតហ្វូន និងកុំព្យូទ័រជំនាន់ថ្មី។
ប្រទេសចិនចង់ទិញម៉ាស៊ីន ដែលមានតម្លៃ ១៥០ លានដុល្លារនេះ សម្រាប់ក្រុមហ៊ុនផលិតបន្ទះឈីបក្នុងស្រុក ដើម្បីផ្គត់ផ្គង់ក្រុមហ៊ុនទូរស័ព្ទស្មាតហ្វូនដ៏ល្បីឈ្មោះHuawei និងក្រុមហ៊ុនបច្ចេកវិទ្យាចិនផ្សេងទៀត ក្នុងបំណងកាត់បន្ថយការពឹងផ្អែកលើអ្នកផ្គត់ផ្គង់បរទេស។
ប៉ុន្តែ ក្រុមហ៊ុន ASML របស់ហូឡង់ មិនទាន់បានយល់ព្រមធ្វើការលក់ម៉ាស៊ីនរបស់ពួកគេដល់ក្រុមហ៊ុនណាមួយមកពីប្រទេសចិន ពីព្រោះប្រទេសហូឡង់ ដែលស្ថិតក្រោមសម្ពាធពីសហរដ្ឋអាមេរិក គឺកំពុងដកហូតអាជ្ញាប័ណ្ណនាំចេញ ទៅកាន់ប្រទេសចិនរបស់ក្រុមហ៊ុនASML។
យោងតាមមន្ត្រីសហរដ្ឋអាមេរិក បានឱ្យដឹងថារដ្ឋបាល Biden បានស្នើសុំរដ្ឋាភិបាលរឹតបន្ទឹងការលក់នេះ ដោយសារតែការព្រួយបារម្ភអំពីសន្តិសុខជាតិ។
ទីក្រុងវ៉ាស៊ីនតោនបានកំណត់យកក្រុមហ៊ុនចិនធំៗដូចជា ក្រុមហ៊ុន Huawei ថាជាការគំរាមកំហែងដល់សន្តិសុខជាតិរបស់អាមេរិក ហើយក៏បានព្យាយាមបញ្ចុះបញ្ចូលសម្ព័ន្ធមិត្តបរទេសរបស់ខ្លួនដទៃទៀតឱ្យរឹតបន្ដឹងលើការប្រើប្រាស់ឧបករណ៍របស់ក្រុមហ៊ុនរបស់ Huawei ផងដែរដោយលើកមូលហេតុអំពីការព្រួយបារម្ភចារកម្ម ដែលក្រុមហ៊ុន Huaweiបានបដិសេធហើយនិយាយថាជាការចោទប្រកាន់ដែលគ្មានមូលដ្ឋាន។
លោក Peter Wennink នាយកប្រតិបត្តិនៃក្រុមហ៊ុន ASML បាននិយាយថា ការរឹតត្បិតការនាំចេញអាចនឹងបង្កផលប៉ះពាល់ដល់ក្រុមហ៊ុនខ្លាំង។ លោកបាននិយាយនៅក្នុងសេចក្ដីថ្លែងការណ៍មួយថា «នៅពេលនិយាយអំពីបញ្ហាសន្តិសុខជាតិជាក់លាក់ ការត្រួតពិនិត្យការនាំចេញគឺជាវិធានការណ៍ត្រឹមត្រូវ។ បើទោះជាយ៉ាងនេះក៏ដោយ យោងតាមផ្នែកមួយនៃយុទ្ធសាស្ត្រជាតិទូលំទូលាយលើភាពជាអ្នកដឹកនាំការផលិតបន្ទះឈីប រដ្ឋាភិបាលចាំបាច់ត្រូវពិចារណាអំពីវិធានការទាំងនេះ ប្រសិនបើសិនប្រើប្រាស់ហួសកម្រិតពេក ក៏អាចបន្ថយនវានុត្តន៍ក្នុងរយៈពេលមធ្យមដោយកាត់បន្ថយការស្រាវជ្រាវ និងអភិវឌ្ឍន៍។
លោក បាននិយាយ ថាក្នុងរយៈពេលខ្លីនិងមធ្យម ការគ្រប់គ្រងការនាំចេញយ៉ាងទូលំទូលាយនឹងកាត់បន្ថយសមត្ថភាពផលិតបន្ទះឈីបរបស់ពិភពលោក ដែលកាន់តែធ្វើឱ្យបញ្ហាខ្សែសង្វាក់ផ្គត់ផ្គង់កាន់តែធ្ងន់ធ្ងរឡើង។
មិនដល់មួយខែផង បន្ទាប់ពីការចូលកាន់តំណែងរបស់លោក Biden ទីប្រឹក្សាសន្តិសុខជាតិរបស់លោកគឺលោក Jake Sullivan បាននិយាយជាមួយសមភាគីហូឡង់អំពីអ្វីដែលសេតវិមានបានពិពណ៌នាថាជាកិច្ចសហប្រតិបត្តិការយ៉ាងជិតស្និទ្ធរវាងប្រទេសទាំងពីរលើបញ្ហានេះ។
