អាឡឺម៉ង់នឹងប្រកាសពីការសម្រេចលើកិច្ចព្រមព្រៀងផ្លូវការស្តីពីបំពង់បង្ហូរប្រេង Nord Stream 2 ឆាប់ៗ
អាមេរិក និងអាឡឺម៉ង់ រំពឹងថានឹងប្រកាសពីដំណោះស្រាយស្ដីពីជម្លោះដ៏យូរអង្វែងរបស់ពួកគេលើបំពង់បង្ហូរឧស្ម័នធម្មជាតិរបស់រុស្ស៊ី Nord Stream 2 តម្លៃជាង ១១ ពាន់លានដុល្លារក្នុងពេលឆាប់ៗនេះ។ នេះបើយោងតាមប្រភព ដែលមានជំនាញពីបញ្ហានេះ។
ប្រធានាធិបតីលោក Joe Biden និងអធិការបតីអាល្លឺម៉ង់ លោកស្រី Angela Merkel បានបរាជ័យក្នុងការដោះស្រាយភាពខុសគ្នារបស់ពួកគេជុំវិញបញ្ហាបំពង់បង្ហូរប្រេងក្រោមសមុទ្រក្នុងជំនួបកាលពីសប្តាហ៍មុន ប៉ុន្តែបានយល់ព្រមថា ទីក្រុងម៉ូស្គូ មិនត្រូវ ប្រើប្រាស់ថាមពលជាអាវុធប្រឆាំងនឹងប្រទេសជិតខាងឡើយ។
កិច្ចព្រមព្រៀងនេះ ត្រូវបានគេលើកយកមកពិភាក្សាក្នុងចំណោមមន្រ្តីអាមេរិក និងអាល្លឺម៉ង់ ស្ដីអំពីក្តីបារម្ភរបស់អាមេរិក ដែលថាការសាងសង់បំពង់បង្ហូរប្រេងនេះរួចរាល់បានដល់ ៩៨% ទៅហើយ ដែលគម្រោងនេះនឹងផ្គត់ផ្គង់ថាមពលឧស្ម័នទៅឱ្យអឺរ៉ុប ហើយអាចកាត់បន្ថយថ្លៃដឹកជញ្ជូនឆ្លងកាត់អ៊ុយក្រែន ដែលប្រមូលបានពីការបូមឧស្ម័ននៅបំពង់ ដែលមានស្រាប់។
កិច្ចព្រមព្រៀងនេះនឹងបញ្ចៀសការបន្តដាក់ទណ្ឌកម្មរបស់សហរដ្ឋអាមេរិកប្រឆាំង នឹង ក្រុមហ៊ុន Nord Stream 2 AG ដែលជាក្រុមហ៊ុននៅពីក្រោយបំពង់បង្ហូរប្រេង និងនាយកប្រតិបត្តិរបស់ខ្លួន។
ព័ត៌មានលម្អិតទាក់ទិននឹងកិច្ចព្រមព្រៀងនេះនៅមិនទាន់បានបង្ហាញនៅឡើយទេ ប៉ុន្តែប្រភពដដែលបានឱ្យដឹងថា កិច្ចព្រមព្រៀងនេះនឹងរួមបញ្ចូលទាំងការប្តេជ្ញាចិត្តដោយភាគីទាំងពីរ ដើម្បីធានាការវិនិយោគទុននៅក្នុងវិស័យថាមពលរបស់អ៊ុយក្រែន និងទូទាត់នូវការធ្លាក់ចុះអវិជ្ជមានណាមួយចេញពីបំពង់បង្ហូរប្រេងថ្មី ដែលនឹងនាំឧស្ម័នពីតំបន់អាក់ទិកទៅកាន់ប្រទេសអាល្លឺម៉ង់ក្រោមសមុទ្របាល់ទិក។
ប្រភពមួយ ដែលបាននិយាយក្នុងលក្ខខណ្ឌអនាមិកពីព្រោះកិច្ចពិភាក្សានៅមិនទាន់បញ្ចប់ បាននិយាយថា៖ «ការព្រមព្រៀងនេះ មើលទៅដូចជាល្អ ។ យើងរំពឹងថាការសន្ទនាទាំងនោះ នឹងឈានដល់ដំណោះស្រាយក្នុងរយៈពេលប៉ុន្មានថ្ងៃខាងមុខនេះ»។
ប្រភពទី ២ បាននិយាយថា ភាគីទាំងពីរជិតឈានដល់កិច្ចព្រមព្រៀងមួយ ដែលអាចបន្ធូរបន្ថយការព្រួយបារម្ភ ដែលលើកឡើង ដោយសមាជិកសភាសហរដ្ឋអាមេរិក ក៏ដូចជា ប្រទេសអ៊ុយក្រែនជាដើម។
ក្រសួងការបរទេស លោក Derek Chollet បាននិយាយកាលពីថ្ងៃ ច័ន្ទ ថា ទីប្រឹក្សាជាន់ខ្ពស់រដ្ឋមន្រ្តីក្រសួងការបរទេស Antony Blinken នឹងជួបជាមួយមន្ត្រីជាន់ខ្ពស់រដ្ឋាភិបាលអ៊ុយក្រែននៅទីក្រុង Kyiv នៅថ្ងៃ អង្គារ និងថ្ងៃ ពុធ ដើម្បីពង្រឹងតម្លៃយុទ្ធសាស្ត្រទំនាក់ទំនងសហរដ្ឋអាមេរិក – អ៊ុយក្រែន។
ប្រភពមួយក្នុងចំណោមប្រភពខាងលើ បាននិយាយថា សហរដ្ឋអាមេរិកចង់ធានាថា អ៊ុយក្រែននឹងគាំទ្រកិច្ចព្រមព្រៀង ដែលខ្លួនបានរំពឹងទុកជាមួយអាឡឺម៉ង់។
