អាមេរិកចោទចិនថាលួចទិន្នន័យរបស់ក្រុមហ៊ុន Microsoft
វ៉ាស៊ីនតោន៖ រដ្ឋបាលលោកបៃដិន កាលពីថ្ងៃចន្ទនេះ បានចោទរដ្ឋាភិបាលចិន ថាបានរំលោភបំពានលើប្រព័ន្ធអ៊ីម៉ែលរបស់ក្រុមហ៊ុន Microsoft ដែលប្រើដោយក្រុមហ៊ុន បណ្ដារដ្ឋាភិបាល និងយោធាដ៏ធំបំផុតរបស់ពិភពលោក ខណៈសហរដ្ឋអាមេរិក បានគៀងគរសម្ព័ន្ធមិត្តជាច្រើនថ្កោលទោសរដ្ឋាភិបាលក្រុងប៉េកាំង ចំពោះការវាយប្រហារតាមប្រព័ន្ធអ៊ីនធឺណិតនៅជុំវិញពិភពលោក។
យោងតាមការចុះផ្សាយរបស់កាសែត The New York Times លោករដ្ឋមន្ត្រីការបរទេស Anthony J. Blinken បាននិយាយថា ក្រសួងសន្តិសុខរដ្ឋចិន បានបង្កើតប្រព័ន្ធអេកូតាមកិច្ចសន្យាព្រហ្មទណ្ឌរបស់ពួកហ៊ែកឃឺរ (Hacker) ដែលអនុវត្តទាំងសកម្មភាពឧបត្ថម្ភដោយរដ្ឋ និងតាមអ៊ីនធឺណិត ដើម្បីចំណេញផ្នែកហិរញ្ញវត្ថុរបស់ខ្លួន។
យ៉ាងណាមិញ សម្ព័ន្ធភាពរួមមានសហភាពអឺរ៉ុប និងសមាជិកទាំងអស់របស់អង្គការណាតូ ហាក់បានបញ្ឈប់ការដាក់ទណ្ឌកម្មចិនជាលើកតំបូងរបស់ខ្លួន ដោយគូសបញ្ជាក់ពីឧបសគ្គនៃការប្រឈមមុខជាមួយប្រទេសនេះ។ អឺរ៉ុបដែលមានកិច្ចព្រមព្រៀងពាណិជ្ជកម្មរកចំណូលបានច្រើនជាមួយចិន មានការស្ទាក់ស្ទើរក្នុងការរិះគន់ជាសាធារណៈនាពេលកន្លងមក។
ភាគច្រើននៃប្រទេសសមាជិកសហគមន៍អឺរ៉ុប គ្រាន់តែបានចោទប្រកាន់ក្រុងប៉េកាំងថាបានអនុញ្ញាតឱ្យពួក វាយប្រហារតាមអ៊ីនធឺណែត ធ្វើប្រតិបត្តិការពីទឹកដីរបស់ខ្លួន។ ប៉ុន្តែសហរដ្ឋអាមេរិក និងអង់គ្លេស ដែលមានក្រុមហ៊ុនរងការវាយប្រហារធ្ងន់ធ្ងរ បានឈានមួយជំហានទៀត ដោយចង្អុលចំៗលើរដ្ឋាភិបាលចិន ដោយបានបញ្ជាក់លម្អិតអំពីទំនាក់ទំនងរវាងក្រុមស៊ើបការណ៍សម្ងាត់ចិន និងពួកឧក្រិដ្ឋជន វាយប្រហារតាមអ៊ីនធឺណែត ។
សេចក្តីថ្លែងការណ៍រួមថ្មីដែលរិះគន់ចិននេះ ត្រូវបានចេញដោយសហរដ្ឋអាមេរិក អូស្ត្រាលី អង់គ្លេស កាណាដា សហភាពអឺរ៉ុប ជប៉ុន និងនូវែលសេឡង់។ វាក៏ជាសេចក្តីថ្លែងការណ៍ដំបូងបង្អស់ពីអង្គការណាតូ ដែលបានកំណត់គោលដៅជាសាធារណៈដល់ក្រុងប៉េកាំងជុំវិញឧក្រិដ្ឋកម្មតាមប្រព័ន្ធអ៊ីនធឺណិត។
ទោះបែបនេះក្ដី គ្មានការដាក់ទណ្ឌកម្មណាមួយ ត្រូវបានប្រកាសកាលថ្ងៃចន្ទប្រឆាំងនឹងប្រទេសចិននោះទេ ផ្ទុយពីការដាក់ទណ្ឌកម្មដែលសេតវិមានធ្លាប់ធ្វើលើប្រទេសរុស្ស៊ីកាលពីខែមេសា នៅពេលដែលខ្លួនបានស្តីបន្ទោសប្រទេសនេះចំពោះការវាយប្រហារ SolarWinds ដែលបានប៉ះពាល់ដល់ទីភ្នាក់ងាររដ្ឋាភិបាលសហរដ្ឋអាមេរិក និងក្រុមហ៊ុនជាង ១០០ ។ មន្រ្តីសេតវិមាន ហាក់ដូចជាប្រុងប្រយ័ត្នជាមួយចិន ដោយសារតែសមត្ថភាពក្នុងការសងសឹករបស់ប្រទេសនេះ។
ទាក់ទងនឹងរឿងនេះ លោកស្រី Jen Psaki លេខាធិការសារព័ត៌មានសេតវិមាន បាននិយាយថា មិនមានអ្វីខុសប្លែកនោះទេ។ លោកស្រីថា កាលៈទេសៈសេដ្ឋកិច្ច ឬការពិចារណាណាមួយ មិនបានរារាំងសកម្មភាពរបស់អាមេរិកនោះឡើយ។
តាមរយៈការដាក់ទណ្ឌកម្មលើប្រទេសរុស្ស៊ី និងគៀងគរសម្ព័ន្ធមិត្តថ្កោលទោសប្រទេសចិន រដ្ឋបាលលោកបៃដិនបានឈានទៅរកសង្គ្រាមត្រជាក់ឌីជីថល កាន់តែស៊ីជម្រៅជាមួយសត្រូវភូមិសាស្ត្រនយោបាយសំខាន់របស់ខ្លួន ជាងពេលណាៗទាំងអស់។
សេចក្ដីប្រកាសដែលជាប់ទាក់ទងនឹងមន្រ្តីស៊ើបការណ៍សម្ងាត់ចិនពីបទលួចកម្មសិទ្ធិបញ្ញា និងទិន្នន័យវេជ្ជសាស្រ្ត មានគោលបំណងបង្ហាញថា លោកខាងលិចកំពុងធ្វើការវាយប្រហាររួមគ្នាដើម្បីរុញបកវិញ ហើយមិនត្រឹមតែទៅលើសកម្មភាពរបស់ចិនលើការរំលោភបំពាន់ក្រុមហ៊ុន Microsoft ប៉ុណ្ណោះទេ។
កាលពីខែមីនា ក្រុមហ៊ុន Microsoft បាននិយាយថា ពួក Hacker ដែលត្រូវបានរកឃើញនៅក្នុងប្រព័ន្ធ Microsoft Exchange ដែលជាម៉ាស៊ីនមេរបស់ក្រុមហ៊ុន រក្សានៅខាងក្នុងបណ្តាញផ្ទាល់ខ្លួនដើម្បីដំណើរការកម្មវិធី Microsoft ត្រូវបានភ្ជាប់ទៅនឹងក្រសួងសន្តិសុខចិន។ តាមរយៈនេះ ពួក Hacker ចិន អាចមើលអ៊ីម៉ែលដោយសេរី រួមទាំងទិន្នន័យសាជីវកម្មសំខាន់ៗ និងកម្មសិទ្ធិបញ្ញា ធ្វើឱ្យប៉ះពាល់ដល់ក្រុមហ៊ុនអាមេរិកជាង ៣០ ០០០ ស្ថាប័ន។
សេតវិមានបានហៅការវាយប្រហារនេះថា «មិនរើសមុខ» ពីព្រោះជាជាងផ្តោតលើក្រុមហ៊ុន ឬទិន្នន័យជាក់លាក់ណាមួយ ក្រុមវាយប្រហារតាមអ៊ីនធឺណែត អាចចូលប្រើកុំព្យូទ័រ និងបណ្តាញផ្សេងៗទៀតរាប់ពាន់នៅជុំវិញពិភពលោក។ ប៉ុន្តែការប្រកាសកាលពីថ្ងៃចន្ទ គឺជាការលើកឡើងដំបូងដែលថារដ្ឋាភិបាលចិនបានជួល ឬយល់ព្រមឱ្យក្រុមឧក្រិដ្ឋជនអនុវត្តការលុកលុយ។
កាលពីថ្ងៃចន្ទដូចគ្នា ទីភ្នាក់ងារ FBI ទីភ្នាក់ងារសន្តិសុខជាតិ និងភ្នាក់ងារសន្តិសុខអ៊ីនធឺណិត និងសន្តិសុខហេដ្ឋារចនាសម្ព័ន្ធ បានចេញសេចក្តីណែនាំថ្មីមួយ ដែលមានចុះបញ្ជីនូវយុទ្ធសាស្ត្របច្ចេកទេស និងទម្រង់ការចំនួន ៥០ ដែលពួក Hacker ឧបត្ថម្ភដោយរដ្ឋចិន បានដាក់ចេញដើម្បីប្រើប្រឆាំងនឹងបណ្តាញសហរដ្ឋអាមេរិក។
ជាការឆ្លើយតាម លោក Liu Pengyu អ្នកនាំពាក្យស្ថានទូតចិនបាននិយាយនៅក្នុងសេចក្ដីថ្លែងការណ៍មួយថា ការចោទប្រកាន់ពីសហរដ្ឋអាមេរិក និងសម្ព័ន្ធមិត្តរបស់ខ្លួន គឺជា «ការវាយប្រហារដោយគ្មានមូលដ្ឋាន»។
លោកនិយាយថា៖ «វាគ្រាន់តែជាល្បិចចាស់មួយផ្សេងទៀតប៉ុណ្ណោះ វាគ្មានអ្វីថ្មីនោះទេ»។
លោក Pengyu បាននិយាយទៀតថា គឺសហរដ្ឋអាមេរិកទេដែលបានចូលរួមក្នុងការវាយលុកតាមអ៊ីនធឺណិតទ្រង់ទ្រាយ ធំ មិនរើសមុខ ដោយខ្លួនឯង។ អ្នកនាំពាក្យរូបនេះបានលើកឡើងពី ការបើកឱ្យឃើញកាលពីឆ្នាំ ២០១៣ របស់លោក Edward J. Snowden ជាអ្នកដែលបានបញ្ចេញឯកសារសំខាន់ៗពីខាងក្នុងរបស់ទីភ្នាក់ងារសន្តិសុខជាតិ ដែលបង្កជាការជជែកដេញដោលគ្នាទូទាំងពិភពលោកអំពីការឃ្លាំមើលរបស់រដ្ឋាភិបាល។
ឯកសារទាំងនោះរួមមាន ភ័ស្តុតាងដែលបង្ហាញថាសហរដ្ឋអាមេរិកបានលួចចូលប្រព័ន្ធកុំព្យូទ័ររបស់ក្រុមហ៊ុន Huawei ដែលជាក្រុមហ៊ុនទូរគមនាគមន៍យក្សរបស់ចិន និងជាចំណុចស្នូលនៃការប្រឈមមុខគ្នារវាងក្រុងប៉េកាំង និងលោកខាងលិច។
ជាមួយគ្នានេះដែរ ក្រសួងយុត្តិធម៌អាមេរិកកាលពីថ្ងៃចន្ទ ក៏បានចោទប្រកាន់ជនជាតិចិនចំនួន ៤ នាក់ ដែលជាមន្រ្តីសន្តិសុខ ៣ នាក់ និងអ្នកវាយប្រហារតាមអ៊ីនធឺណែតម្នាក់ ដែលព្រះរាជអាជ្ញាអះអាងថា ពួកគេកំពុងធ្វើការជាមួយក្រសួងសន្តិសុខរដ្ឋចិននៅក្នុងយុទ្ធនាការឃុបឃិត ដែលបានកំណត់គោលដៅប្រព័ន្ធកុំព្យូទ័ររាប់សិប រួមមានក្រុមហ៊ុន សាកលវិទ្យាល័យ និងអង្គភាពរដ្ឋាភិបាល ចន្លោះឆ្នាំ ២០១១ និងឆ្នាំ ២០១៨ ។
