ប្រធានាធិបតី និងសភាសហរដ្ឋអាមេរិក នៅលើផ្លូវស្របគ្នាក្នុងការពង្រឹងគោលនយោបាយលើបច្ចេកវិទ្យាចិន
សហរដ្ឋអាមេរិក និងចិននៅពេលនេះ គឺកំពុងតែស្ថិតក្នុងការប្រកួតប្រជែងគ្នាដ៏ស្វិតស្វាញមួយ សឹងតែគ្រប់ផ្នែកទាំងអស់ ដែលរាប់បញ្ចូលទាំងពីផ្នែកនយោបាយ ផ្នែកសន្តិសុខ និងផ្នែកសេដ្ឋកិច្ចជាដើម។ ក្នុងនោះដែរ វិស័យបច្ចេកវិទ្យា និងនវានុវត្តន៍ក៏គេចមិនផុតពីការប្រកួតប្រជែងគ្នារវាងប្រទេសមហាអំណាចទាំងពីរផងដែរ។
ពាក់ព័ន្ធនឹងផ្នែកបច្ចេកវិទ្យានេះដែរ រដ្ឋាភិបាលលោកប្រធានាធិបតីចូ បៃដិន នៅពេលនេះ កំពុងតែរៀបចំក្រុមការងារមួយទទួលបន្ទុកលើការឆ្លើយតប និងរៀបចំពង្រឹងគោលនយោបាយលើបច្ចេកវិទ្យាចិន។ ក្រៅពីរដ្ឋាភិបាលអាមេរិក សភាអាមេរិកកន្លងមកក៏បានតាក់តែងចេញជាឯកសារផ្លូវច្បាប់ ក្នុងគោលបំណងមួយស្រដៀងគ្នានឹងរដ្ឋាភិបាលលោកបៃដិនផងដែរ។
ក្នុងការរៀបចំក្រុមការងារពិសេសមួយរបស់រដ្ឋាភិបាល នៅ ៦ខែដំបូងនេះ គេសង្កេតឃើញថាលោកបៃដិន បានតែងតាំងអ្នកជំនាញ ដែលមានបទពិសោធន៍ផ្នែកវិទ្យាសាស្ត្រ និងផ្នែកសន្តិសុខជាតិ ឱ្យចូលកាន់កាប់តំណែងសំខាន់ៗក្នុងការតាក់តែងគោលនយោបាយបច្ចេកវិទ្យាអាមេរិក។
កាលពីខែមីនាកន្លងទៅ លោកបៃដិន បានតែងតាំងលោក Jason Matheny ដើម្បីឱ្យកាន់តំណែងជាអ្នកសម្របសម្រួលផ្នែកបច្ចេកវិទ្យា និងសន្តិសុខជាតិ ប្រចាំក្រុមប្រឹក្សាសន្តិសុខជាតិ ដែលជាផ្នែកមួយនៃសេតវិមាន។ តំណែងនេះជាតំណែងថ្មី ទើបតែបង្កើតនៅក្នុងជំនាន់លោកបៃដិន ហើយមានតួនាទីក្នុងការផ្ដល់យោបល់ ក៏ដូចជាសម្របសម្រួលការងាររបស់ការិយាល័យពាក់ព័ន្ធនឹងបច្ចេកវិទ្យា និងសន្តិសុខជាតិនៅក្នុងសេតវិមាន។ លោកមានបទពិសោធន៍ពាក់ព័ន្ធការស្រាវជ្រាវលើការទប់ស្កាត់ចារកម្ម ហើយក៏ធ្លាប់បំពេញការងារនៅតាមសាកលវិទ្យាល័យ និងស្ថាប័នអន្តរជាតិនានាដូចជា ធនាគារពិភពលោកជាដើម។
២ ខែក្រោយមក នៅខែឧសភា លោក Eric Lander ត្រូវបានសភាយល់ព្រមឱ្យតែងតាំងជានាយកការិយាល័យគោលនយោបាយវិទ្យាសាស្ត្រ និងបច្ចេកវិទ្យា។ ការិយាល័យនេះក៏ជាផ្នែកមួយនៃសេតវិមាន។ លោក Lander មានបទពិសោធន៍តាក់តែងគោលនយោបាយ កាលពីជំនាន់លោកប្រធានាធិបតីបារ៉ាក់ អូបាម៉ា ដោយនៅកាលនោះ លោកបានធ្វើជាសហប្រធានក្រុមប្រឹក្សាផ្ដល់យោបល់ឱ្យប្រធានាធិបតី លើផ្នែកវិទ្យាសាស្ត្រ និងបច្ចេកវិទ្យា។
លុះនៅខែកក្កដាកន្លងទៅថ្មីៗនេះ លោកបៃដិន បានជ្រើសតាំង អតីតមន្ត្រីជាន់ខ្ពស់ក្រសួងការពារជាតិអាមេរិក លោក Alan Estevez កាន់តំណែងជារដ្ឋលេខាធិការទទួលបន្ទុកឧស្សាហកម្ម និងសន្តិសុខ នៃក្រសួងពាណិជ្ជកម្ម។ តំណែងនេះជាតំណែងជួរមុខមួយក្នុងការគ្រប់គ្រងលើការនាំចេញបច្ចេកវិទ្យាអាមេរិក។ តំណែងរបស់លោក Estevez ត្រូវបានអ្នកតាមដានយល់ថា ជាតំណែងស្នូលមួយក្នុងការប្រកួតប្រជែងបច្ចេកវិទ្យារវាងអាមេរិក និងចិន។
ប្រសិនបើលោក Estevez ទទួលបានការយល់ព្រមពីព្រឹទ្ធសភាអាមេរិក លោកនឹងដឹកនាំការិយាល័យឧស្សាហកម្ម និងសន្តិសុខ ដែលមានមានបុគ្គលិក ៤៥០នាក់ ចាត់ចែងលើបញ្ជីឈ្មោះក្រុមហ៊ុន ឬ បុគ្គលណាមួយ ដែលហាមប្រាមមិនឱ្យធ្វើជំនួញជាមួយក្រុមហ៊ុនអាមេរិក។
បន្ថែមពីនេះទៅទៀត លោកបៃដិន ក៏បានជ្រើសតាំងរដ្ឋអាជ្ញាអាមេរិកលោក Thea Kendlerចំពោះតំណែងអនុរដ្ឋលេខាធិការទទួលបន្ទុករដ្ឋបាលនៃការនាំចេញ នៃក្រសួងពាណិជ្ជកម្ម។ លោកនៅពេលនេះកំពុងតែដើរតួជាអយ្យការក្នុងសំណុំរឿងឧក្រិដ្ឋកម្មរបស់លោកស្រី Meng Wanzhou នាយកហិរញ្ញវត្ថុក្រុមហ៊ុន Huawei ដែលកំពុងជាប់ឃុំនៅផ្ទះក្នុងប្រទេសកាណាដា។
កាលពីជំនាន់លោកប្រធានាធិបតីដូណាល់ ត្រាំ តំណែងខាងលើនេះមិនត្រូវបានតែងតាំងនោះទេ ហើយត្រូវបានកាន់ដោយមន្ត្រីស្ដីទី។ ក្នុងរដ្ឋបាលលោកត្រាំ អាមេរិកចាប់ផ្ដើមចាត់វិធានការចំពោះក្រុមហ៊ុនបច្ចេកវិទ្យាចិនដូចជាការហាមមិនឱ្យបណ្ដាញសង្គម Tik Tok ធ្វើប្រតិបត្តិការនៅអាមេរិកជាដើម។
យ៉ាងណាមិញ កាលពីជំនាន់លោកត្រាំ រាល់បម្រាមទាំងអស់គឺធ្វើឡើង ក្រោមការភ្ជាប់ក្រុមហ៊ុនបច្ចេកវិទ្យាទាំងនោះ ជាមួយនឹងយោធារបស់ចិន ហើយបញ្ជីហាមប្រាមក្រុមហ៊ុនទាំងនោះធ្វើឡើង ដោយក្រសួងការពារជាតិ។ នៅពេលលោកបៃដិន ឡើងកាន់តំណែង លោកនៅតែបន្តដាក់គំនាបលើក្រុមហ៊ុនចិនដដែល ដោយជាក់ស្ដែងកាលពីខែមិថុនាកន្លងទៅ រដ្ឋបាលលោកបានដាក់ក្រុមហ៊ុនចិនចំនួន ៥៩ ចូលបញ្ជីមិនឱ្យធ្វើជំនួញជាមួយអាមេរិក ក្រោមហេតុផលថា ក្រុមហ៊ុនទាំងនោះជួយដល់ការរំលោភសិទ្ធិមនុស្សរបស់រដ្ឋធានីប៉េកាំង។
ខុសពីលោកត្រាំ លោកប្រធានាធិបតីបៃដិន បានផ្ទេរការទទួលខុសត្រូវលើការដាក់បម្រាមពីក្រសួងការពារជាតិ ទៅកាន់ក្រសួងរតនាគារជាតិវិញ ហើយព្រមទាំងកែតម្រូវថា ក្រុមហ៊ុនទាំងនោះមានពាក់ព័ន្ធយោធាចិន មកថា ក្រុមហ៊ុនទាំងអស់មានទំនាក់ទំនងជាមួយរដ្ឋាភិបាលចិន។
ងាកមកមើលសកម្មភាពរបស់សភាអាមេរិកវិញ នៅរយៈពេល ៦ខែដំបូងនេះ បានអនុម័តច្បាប់ និងតាក់តែងច្បាប់មួយចំនួនដែរ ដើម្បីបញ្ចេញថវិកាសម្រាប់ក្រុមហ៊ុនបច្ចេកវិទ្យាក្នុងស្រុកអាមេរិក និងមន្ទីរពិសោធន៍នានាក្នុងស្រុក។
ច្បាប់ដែលត្រូវបានគេកត់សម្គាល់ជាងគេនោះគឺ ច្បាប់នវានុវត្តន៍ និងការប្រកួតប្រជែងអាមេរិក ដែលត្រូវបានអនុម័តដោយព្រឹទ្ធសភាអាមេរិក កាលពីខែមិថុនា ដោយច្បាប់នេះនឹងបញ្ចេញទឹកប្រាក់ចំនួន ២៤៤ពាន់លានដុល្លារ ដើម្បីការស្រាវជ្រាវ និងអភិវឌ្ឍន៍ ហើយព្រមទាំងជួយទំនុកបម្រុងដល់ការផលិតបន្ទះឈីបនៅក្នុងស្រុកអាមេរិកទៀតផង។
នៅក្នុងខែកក្កដា គណៈកម្មាធិការការបរទេសនៃសភាតំណាងរាស្ត្រអាមេរិកបានយល់ព្រមលើច្បាប់ស្ដីពីការធានាឱ្យបាននូវភាពជាមេដឹកនាំ និងទំនាក់ទំនងរបស់សហរដ្ឋអាមេរិក ដែលហៅកាត់ថា ច្បាប់ឥន្ទ្រីយ៍។ ក្នុងសេចក្ដីព្រាងច្បាប់នេះ គ្រាន់តែពាក្យថា «ចិន» ត្រូវបានលើកឡើងច្រើនជាង ១ពាន់ដងឯណោះ ហើយខ្លឹមសារទាំងនោះរាប់បញ្ចូលទាំង ការឆ្លើយតបនឹងសកម្មភាពចិនទាក់ទងនឹងការកេងប្រវ័ញ្ចទីផ្សារពិភពលោក ក៏ដូចជាការគំរាមកំហែងរបស់ចិនទៅលើប្រទេសនានាតាមរយៈសកម្មភាពសេដ្ឋកិច្ច និងសកម្មភាពយោធា។
លោក Derek Scissors អ្នកស្រាវជ្រាវជាន់ខ្ពស់នៃវិទ្យាស្ថានសហគ្រាសអាមេរិក ដែលជាស្ថាប័នសិក្សាស្រាវជ្រាវមានមូលដ្ឋាននៅរដ្ឋធានីវ៉ាស៊ីនតោន បានលើកឡើងថា «ខណៈនៅជាប់ដោះស្រាយវិបត្តិកូវីដ-១៩ យើងមិនទាន់ឃើញថា មនុស្សរបស់លោកបៃដិន បានបង្កើតគោលនយោបាយណាមួយពិតប្រាកដនោះទេ»។
លោកបានបន្ថែមថា «នៅរដូវស្លឹកឈើជ្រុះ (អំឡុងខែកញ្ញា ដល់ខែធ្នូ) ពួកគេនឹងផលិតគោលនយោបាយដើម្បីតទល់នឹងចិន។ នៅពេលនោះហើយ យើងនឹងឃើញថា ពួកគេនឹងធ្វើការដោយរបៀបណា ហើយអាចធ្វើការជាមួយគ្នាបានល្អឬអត់»។ នេះបើតាមការចុះផ្សាយរបស់សារព័ត៌មាន South China Morning Post៕
