លោកស្រីហារីស នឹងប្រឆាំងការទាមទារសមុទ្រចិនខាងត្បូងរបស់ចិនក្នុងដំណើរទស្សនៈកិច្ចនៅអាស៊ីអាគ្នេយ៍
វ៉ាស៊ីនតោន៖ មន្រ្តីសេតវិមានជាន់ខ្ពស់ម្នាក់បានប្រាប់ទីភ្នាក់ងារសារព័ត៌មានរ៉យទ័រថា អនុប្រធានាធិបតីអាមេរិកលោកស្រី កាម៉ាឡា ហារីស (Kamala Harris) នឹងផ្តោតលើការការពារច្បាប់អន្តរជាតិនៅសមុទ្រចិនខាងត្បូង ពង្រឹងការដឹកនាំក្នុងតំបន់របស់សហរដ្ឋអាមេរិក និងពង្រីកកិច្ចសហប្រតិបត្តិការសន្តិសុខ ក្នុងអំឡុងដំណើរទស្សនៈកិច្ចរបស់លោកស្រីទៅកាន់ប្រទេសវៀតណាម និងសិង្ហបុរី នៅក្នុងខែនេះ។
មន្រ្តីសេតវិមានដដែលថា ក្រុងវ៉ាស៊ីនតោនបានឃើញប្រទេសទាំងពីរជាដៃគូសំខាន់ ដែលបានផ្តល់ទីតាំង ទំហំសេដ្ឋកិច្ច ទំនាក់ទំនងពាណិជ្ជកម្ម និងភាពជាដៃគូសន្តិសុខលើបញ្ហាដូចជាសមុទ្រចិនខាងត្បូងដែលចិនទាមទារស្ទើរតែទាំងស្រុង។
មន្ត្រីរូបនេះបន្តទៀតថា អាមេរិកមិនចង់ឃើញប្រទេសណាមួយត្រួតត្រាតំបន់មានជម្លោះ ឬទាញយកផលប្រយោជន៍ពីស្ថានភាពអំណាច ធ្វើឱ្យប៉ះពាល់ដល់អធិបតេយ្យភាពរបស់អ្នកដទៃឡើយ ហើយថា លោកស្រី ហារីស នឹងគូសបញ្ជាក់ថា គួរតែមានការធ្វើពាណិជ្ជកម្មដោយសេរីនៅទូទាំងសមុទ្រចិនខាងត្បូង ហើយមិនគួរមានប្រទេសណាមួយមិនគោរពសិទ្ធិអ្នកដទៃឡើយ។
លោកស្រី ហារីស នឹងក្លាយជាអនុប្រធានាធិបតីអាមេរិកដំបូងគេ ដែលធ្វើទស្សនកិច្ចវៀតណាម ស្របពេលដែលក្រុងវ៉ាស៊ីនតោន ស្វែងរកការគាំទ្រពីអន្តរជាតិដើម្បីប្រឆាំងនឹងឥទ្ធិពលរបស់ចិនដែលកំពុងកើនឡើងទូទាំងពិភពលោក។ លោកស្រី នឹងមកដល់សិង្ហបុរីនៅថ្ងៃទី ២២ ខែសីហានេះ រួចធ្វើដំណើរទៅវៀតណាមនៅថ្ងៃទី ២៤ មុនត្រឡប់ទៅអាមេរិកវិញនៅថ្ងៃទី ២៦។
បណ្តាប្រទេសនៅក្នុងតំបន់ភាគច្រើន ស្វាគមន៍ចំពោះវត្តមានយោធាអាមេរិកនៅទីនោះដោយប្រឈមមុខនឹងការធ្វើយោធូបនីយកម្មតាមផ្លូវទឹករបស់ចិន។ កងទ័ពជើងទឹកអាមេរិក បានរក្សាលំនាំស្ថិរភាពនៃប្រតិបត្តិការធ្វើនាវាចរណ៍នៅសមុទ្រចិនខាងត្បូង និងនៅក្បែរកោះតៃវ៉ាន់ ប៉ុន្តែទាំងនេះ ហាក់ដូចជាមិនបានធ្វើឱ្យទីក្រុងប៉េកាំងអាក់ដំណើរការរបស់ខ្លួនឡើយ។
នៅសប្តាហ៍នេះផងដែរ រដ្ឋមន្រ្តីក្រសួងការបរទេសលោក អេនតូនី ប្ល៊ីនខេន (Antony Blinken) នឹងស្វែងរកការពង្រឹងរបស់អាមេរិក ក្នុងការចូលរួមជាមួយអាស៊ីអាគ្នេយ៍ ដើម្បីរុញច្រានប្រឆាំងនឹងចិន ដោយចូលរួមក្នុងកិច្ចប្រជុំតាមប្រព័ន្ធវិឌីអូជាបន្តបន្ទាប់នៅក្នុងតំបន់នេះ។
