ភ្នំពេញ ៖ យុវជន៦នាក់បាននាំគ្នាមកហែលទឹកស្រះលេងធ្វេីឲ្យម្នាក់លង់ទឹកលិចបាត់ និង២នាក់ទៀតក្នុងចំណោមពួកគេត្រូវបានសង្គ្រោះទាន់ពេល បង្កការភ្ញាក់ផ្អេីលដល់សាច់ញាតិ និងសមត្ថកិច្ចកាលពីល្ងាចថ្ងៃទី១១ ខែសីហា ឆ្នាំ ២០២១ ស្ថិតនៅទឹកស្រះជម្រៅជាងប្រហែល១០ទៅ២០ម៉ែត្រ ក្នុងភូមិប្រការ សង្កាត់ព្រៃសរ ខណ្ឌដង្កោ រាជធានីភ្នំពេញ ។

 យុវជនម្នាក់ដែលលិចខ្លួនបាត់ក្នុងទឹកស្រះមានឈ្មោះ  ពៅ  ម៉េងហ៊ាង អាយុ១៦ឆ្នាំ  មុខរបបជាសិស្ស  ។ 
 បេីតាមសម្ដីយុវជនម្នាក់ឈ្មោះ  ហ៊រ  អាយុ១៦ឆ្នាំ  បានប្រាប់ឲ្យដឹងថា  មុនពេលកេីតហេតុ  ពួកគេមានគ្នា៦នាក់  បានជិះម៉ូតូ៣គ្រឿងមកទីតាំងកន្លែងកេីតហេតុ  ហេីយក៏នាំគ្នាចុះលេងទឹក ស្រះ ក្នុងនោះក៏មានយុវជន៣នាក់បានលង់ទឹក  តែត្រូវបានអ្នកចេះហែលជួយសង្គ្រោះបាន២នាក់  រីឯជនរងគ្រោះក៏លិចខ្លួនបាត់សង្គ្រោះមិនទាន់  ទេីបមានការភ្ញាក់ផ្អេីលដល់សាច់ញាតិនិងសមត្ថកិច្ចចុះមកដល់កន្លែងតែម្ដង  ។ 

 ក្រោយមក  ម្ដាយយុវនរងគ្រោះនិងសាច់ញាតិបានមកដល់កន្លែងកេីតហេតុ និងស្រែកទ្រហោយំ សោកស្ដាយជនរងគ្រោះជាខ្លាំង  ព្រមទាំងពឹងពាក់អ្នកភូមិដែលចេះហែលទឹកជួយចុះទៅរាវរកដែរ  តែរាវរកមិនឃេីញ  ។ ដោយឡែកសមត្ថកិច្ចមូលដ្ឋានបានចុះមកដល់ហេីយសួរនាំទៅលេីយុវជនទាំង៥នាក់ដែលជាមិត្តភ័ក្តជនរងគ្រោះមកលេងទឹកជាមួយគ្នា  ដេីម្បីធ្វេីកំណត់ហេតុផងដែរ  ។ គួរបញ្ចាក់ថា  យុវជនរងគ្រោះ  ពៅ  ម៉េងហ៊ាង  ដែលលង់ទឹកលិចបាត់ក្នុងស្រះ  នៅមិនទាន់រកឃេីញនៅទេ  តាំងពីរសៀលម៉ោង៤  ថ្ងៃទី១១  សីហា  ២០២១  ដល់ម៉ោង៦  និង២០នាទីល្ងាច  ថ្ងៃដដែល  ៕  ដោយ  ៖  ជីម  ភារ៉ា