ស.រ.អា រកឃើញករណីវ៉ារ៉្យង់ដែលតារដ្ឋមួយចំនួន ជាសញ្ញាណនៃការរីករាលដាលជាថ្មីក្នុងប្រទេស
សៅ សម្ភស្ស
វ៉ារ៉្យង់ដែលតាល រីករាលលើប្រជាជនអាមេរិក ដែលទទួលបានវ៉ាក់សាំងយ៉ាងហោច ១ ក្នុងចំណោម ៥ ករណីនៅក្នុងរដ្ឋចំនួន ៦ បង្កឱ្យភាគរយនៃករណីចូលមន្ទីរពេទ្យ និងការស្លាប់ខ្ពស់ជាងអ្វី ដែលត្រូវបានគេសង្កេតឃើញពីមុន។ នេះបើយោងតាមតួលេខ ដែលកាសែត The New York Times ប្រមូលបាន។
ចាប់តាំងពីប្រទេសនេះ ម្នីម្នាពន្លឿនកម្មវិធីវ៉ាក់សាំងមក មន្រ្តីសុខាភិបាល បាននិយាយថា អ្នកដែលទទួលបានវ៉ាក់សាំងរួចទំនងជាមិនឆ្លងមេរោគ ឬ ធ្លាក់ក្នុងករណីធ្ងន់ធ្ងរ ឬ ស្លាប់ឡើយ។ ប៉ុន្តែ ទិន្នន័យបឋមពីរដ្ឋ ចំនួន ៧ បង្ហាញថា វ៉ារ្យ៉ង់ដែលតា ដែលចាប់ផ្ដើមរាលដាលក្នុងប្រទេសនេះចាប់ពីខែ កក្កដា មកអាចផ្លាស់ប្ដូរអំណះអំណាង ដែលមន្ត្រីសុខាភិបាលលើកឡើងខាងលើ។
វេជ្ជបណ្ឌិតផ្នែកជំងឺឆ្លងនិងរោគរាតត្បាតនៅមន្ទីរពេទ្យ Brigham & Women’s Hospital Scott នៅបូស្តុន លោក Scott Dryden-Peterson បានមានប្រសាសន៍ថា៖ «យើងមិនចង់បង្ខូចព័ត៌មានថា វ៉ាក់សាំងមិនមានប្រសិទ្ធិភាពក្នុងការទប់ទល់វ៉ីរុសទេ បើទោះជាមានករណីចូលមន្ទីរពេទ្យ និងការស្លាប់មិនថយចុះយ៉ាងណាក្ដី ក៏វ៉ាក់សាំងនៅតែមាននាទីជួយសង្គ្រោះជីវិតមនុស្សអស់ជាច្រើនមកហើយ»។
ការរីករាលក្នុងរដ្ឋចំនួន ៦ មានចំនួនពី ១៨ ទៅ ២៨ ភាគរយនៃករណី ដែលបានកត់ត្រាក្នុងរយៈពេលប៉ុន្មានសប្តាហ៍ថ្មីៗនេះ។ ចំនួនទាំងនេះទំនងជានៅតិចនៅឡើយ ព្រោះប្រជាជន ដែលទទួលបានវ៉ាក់សាំងហើយភាគច្រើន ក៏នៅតែឆ្លងដោយសារភាពធ្វេសប្រហែស ឬ មិនមានអារម្មណ៍ថាខ្លួនឆ្លង ហើយទៅស្វែងរកតេស្តនោះទេ។
មនុស្ស ដែលត្រូវបានចាក់វ៉ាក់សាំងភាគច្រើនហើយឈានដល់ករណីធ្ងន់ធ្ងរ ដែលត្រូវបានបញ្ជូនទៅមន្ទីរពេទ្យភាគច្រើនជាមនុស្សចាស់ ឬ អ្នកដែលមានប្រព័ន្ធភាពស៊ាំចុះខ្សោយ ដោយសារមូលហេតុផ្សេងទៀត។ ទិន្នន័យពីមជ្ឈមណ្ឌលត្រួតពិនិត្យ និងបង្ការជំងឺអាមេរិក បង្ហាញថា ៧៤ ភាគរយនៃករណីទាំងនោះ សុទ្ធសឹងតែជាក្រុមមនុស្សពេញវ័យ ដែលមានអាយុ ៦៥ ឆ្នាំ ឬ ចាស់ជាងនេះ។
វេជ្ជបណ្ឌិតលោក Robert Wachter ប្រធាននាយកដ្ឋានវេជ្ជសាស្ត្រនៅសាកលវិទ្យាល័យកាលីហ្វ័រញ៉ា សាន់ហ្វ្រាន់ស៊ីស្កូ បានមានប្រសាសន៍ថា៖ «ប្រសិនបើឱកាសនៃការឆ្លងមេរោគជាថ្មីលើប្រជាជនចាក់វ៉ាក់សាំងរួច កើនឡើងគួរឱ្យកត់សម្គាល់ ខ្ញុំគិតថាវាជាភស្តុតាងច្បាស់ណាស់ ដែលបង្ហាញថា ការរីករាលដាលនឹងកើតឡើងជាថ្មី ហើយកម្រិតនៃការការពារប្រឆាំងនឹងជំងឺធ្ងន់ធ្ងរលែងមានភាពរឹងមាំដូចមុនហើយ ដូច្នេះខ្ញុំសង្ឃឹមថា យុទ្ធនាការនៃការចាក់វ៉ាក់សាំងដូសទី ៣ គួរតែចាប់ផ្ដើមឱ្យកាន់តែឆាប់កាន់តែល្អ»។
ការរកឃើញការឆ្លងលើអ្នកចាក់វ៉ាក់សាំងហើយ មានចំនួនប្រមាណពី ១២ ទៅ ២៤ ភាគរយនៃករណីបញ្ចូនចូលមន្ទីរពេទ្យសរុបនៅក្នុងរដ្ឋ។ នេះបើតាមឱ្យដឹងពីទិន្នន័យពីសារព័ត៌មានខាងលើ បានរកឃើញ។ ដោយឡែក ចំនួនអ្នកស្លាប់មានតិចតួចនៅឡើយ ដូច្នេះសមាមាត្រក្នុងចំណោមអ្នក ដែលបានចាក់វ៉ាក់សាំងគឺមានភាពប្រែប្រួលខ្លាំងបន្តិច ពោលគឺខ្ពស់ជាងការប៉ាន់ស្មានពីមជ្ឈមណ្ឌលត្រួតពិនិត្យ និងបង្ការជំងឺ (CDC) ដល់ទៅ ០.៥ ភាគរយ។
តួលេខដែលបង្ហាញពីក្រុមមនុស្សដែលងាយទទួលរងហានិភ័យឆ្លងមេរោគ គឺសុទ្ធសឹងតែជាប្រជាជន ដែលស្ថិតក្នុងវ័យចំណាស់ ហើយគឺពិចារណាឱ្យបានហ្មត់ចត់អំពីហានិភ័យ ដែលពួកគេកំពុងប្រឈម។ លោក Dean Sidelinger វេជ្ជបណ្ឌិតផ្នែករោគរាតត្បាតរដ្ឋ និងមន្រ្តីសុខាភិបាលរដ្ឋប្រចាំរដ្ឋអូរីហ្គិន បានព្រមានដូច្នេះ។
ជាមួយគ្នានេះ វេជ្ជបណ្ឌិត Dryden-Petersen ក៏បានព្រមានដែរថា៖ «សម្រាប់ក្រុម ដែលមានហានិភ័យខ្ពស់ជាពិសេស គឺត្រូវយកចិត្តទុកដាក់វាឱ្យបានខ្លាំងមែនទែន។ កុំមើលស្រាលរោគសញ្ញាស្រាលឱ្យសោះ ត្រូវចេះស្វែងរកវិធីព្យាបាលភ្លាមៗ ជៀសវាងក្លាយជាករណីធ្ងន់ធ្ងររហូតត្រូវសម្រាកនៅមន្ទីពេទ្យ»។
ការឆ្លងមេរោគឆ្លងលើអ្នកចាក់វ៉ាក់សាំងរួចនេះទៀតសោទ ទំនងជាកើតឡើងធ្ងន់ធ្ងរបំផុតក្នុងចំណោមមនុស្សចាស់ ឬ អ្នកដែលមានជំងឺដូចជាធាត់ ឬ ទឹកនោមផ្អែម។ បុគ្គលទាំងនេះ ជាបុគ្គលដែលមានអត្រាចាក់វ៉ាក់សាំងខ្ពស់បំផុត ប៉ុន្តែមានហានិភ័យឆ្លងមេរោគខ្ពស់បំផុតដូចគ្នា។
ប្រភព៖
In a Handful of States, Early Data Hint at a Rise in Breakthrough Infections
https://www.nytimes.com/2021/08/17/health/covid-vaccinated-infections.html?action=click&module=Top%20Stories&pgtype=Homepagehttps://www.washingtonpost.com/health/breakthrough-infections-covid-vaccine/2021/08/17/44ebcaaa-fea0-11eb-85f2-b871803f65e4_story.html
