ឯកឧត្តមកិត្តិបណ្ឌិត ហ៊ីង ប៊ុនហៀង នាយករងខុទ្ធកាល័យសម្ដេចតេជោ ហ៊ុនសែននិងជាប្រធានគណៈកម្មាធិការគណៈបក្សខុទ្ធកាល័យសម្ដេចតេជោ ហ៊ុន សែនបានអញ្ចើញប្រកាសតែងតាំងមុខតំណែងមន្រ្តីគណៈបក្សខុទ្ធកាល័យសម្ដេចតេជោហ៊ុនសែនដែលមានអនុប្រធានគណៈកម្មាធិការគណៈបក្សខុទ្ធកាល័យសម្ដេចតេជោ ហ៊ុន សែន ២រូបឯកឧត្ដម យូ ស៊ុនឡុង និងឯកឧត្ដម សេង ទៀងនិងសមាជិកគណៈកម្មាធិការគណៈបក្សខុទ្ធកាល័យសម្ដេចតេជោ ហ៊ុន សែន ៧រូប មានឯកឧត្ដម ស្វាយ ស៊ីថា ឯកឧត្ដម កែវ រ៉េមី  ឯកឧត្ដម ឃុន ហាំង ឯកឧត្ដម ផៃ ស៊ីផាន ឯកឧត្ដម ឡុង វិសាលោ ឯកឧត្ដម ឯក សុន ចាន់ និង  ឯកឧត្ដម ណុប រតនៈ ព្រឹកថ្ងៃទី០៨កុម្ភៈ។

ឯកឧត្តមកិត្តិបណ្ឌិត ហ៊ីង ប៊ុនហៀង មានប្រសាសន៍ថាការកែសម្រួលភារកិច្ចនិង ការប្រកាសតែងតាំងមុខតំណែងមន្រ្តីគណៈបក្សខុទ្ធកាល័យសម្ដេចតេជោ ហ៊ុនសែនគឺដើម្បីពង្រឹងប្រសិទ្ធភាពការងារក្នុងការចុះជួយដោះស្រាយទុក្ខលំបាកបញ្ហាប្រឈមនានានៅតាមមូលដ្ឋានជូនប្រជាពលរដ្ឋឱ្យបានទាន់ពេលវេលាជាពិសេស នៅពេលជួបគ្រោះមហន្តរាយផ្សេងៗ។

ឯកឧត្តមកិត្តិបណ្ឌិត ហ៊ីង ប៊ុនហៀង បាននែនាំដល់ក្រុមការងារគណៈបក្សខុទ្ធកាល័យសម្ដេចតេជោ ហ៊ុន សែន បន្តចុះជួយតាមមូលដ្ឋានជាប្រចាំដើម្បីស្វែងយល់ពីសុខទុក្ខប្រជាពលរដ្ឋនិងស្ដាប់សំណូមពរបញ្ហាប្រឈមនានាដូចជា សេវាសាធារណៈ សេវាសំណូមពរ សេវាតម្រូវការ របស់ប្រជាពលរដ្ឋដោះស្រាយឱ្យបានទាន់ពេលវេលាដើម្បីបង្កើនជំនឿទុកចិត្តមកលើគណៈបក្សប្រជាជនកម្ពុជា។ត្រូវបន្តការងាររបស់ខ្លួនឱ្យបានសកម្ម ក្នុងស្មារតីសាមគ្គីភាព ឯកភាពផ្ទៃក្នុងខ្ពស់ ឆន្ទៈមុតស្រួច ធ្វើជាស្នូលនៃចលនារបស់ប្រជាជន ដើម្បីសម្រេចបានសមិទ្ធផលធំៗថ្មីៗទៀតជូនជាតិ និងប្រជាជន ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២ និងការបោះឆ្នោតជ្រើសតាំងតំណាងរាស្ត្រ នីតិកាលទី ៧ឆ្នាំ ២០២៣។

ឯកឧត្តមកិត្តិបណ្ឌិត ហ៊ីង ប៊ុនហៀង បានលើកឡើងថាគណៈបក្សប្រជាជនកម្ពុជាមានមូលដ្ឋានគ្រឹៈរឹងមាំមានការសាមគ្គីភាពយ៉ាងស្អិតរមួតគ្មានកម្លាំងណាអាចបំបែកបានព្រមទាំងបានដឹកនាំប្រទេសអស់រយៈកាលជាង៣០ឆ្នាំបានកសាងសមិទ្ធផលនិងស្នាដៃជាច្រើនសម្រាប់ប្រជាជននិងប្រទេសជាតិជាពិសេសបានផ្ដល់សេចក្ដីសុខជូនប្រជាពលរដ្ឋនិងសុខសន្តិភាពពិតប្រាកដទូទាំងប្រទេស។   ការកសាងនិងថែរក្សាសន្តិភាពមានតម្លៃដែលមិនអាចកាត់ថ្លៃបាន ហើយសន្តិភាពគឺជាមូលដ្ឋានគ្រឹៈក្នុងការអភិវឌ្ឍ សេដ្ឋកិច្ច សង្គម ការពង្រឹងសន្តិសុខនិងការអភិវឌ្ឍមនុស្សជាតិ៕