ព្យុះសង្ឃរាអ៊ីដាវាយប្រហាររដ្ឋ Louisiana កាច់បណ្តាញអគ្គិសនី និងបង្កការខូចខាតយ៉ាងដំណំ
ព្យុះសង្ឃរាអ៊ីដា(Hurricane Ida) ក្នុងល្បឿនខ្យល់ ២៤០គ.ម./ម៉ោង វាយប្រហារលើរដ្ឋភាគអាគ្នេយ៍អាមេរិក Louisiana កាលពីថ្ងៃអាទិត្យ សម្លាប់មនុស្សយ៉ាងហោចណាស់ ២ នាក់ ហើយបង្កការខូចខាតយ៉ាងដំណំ និងកាច់ផ្ដាច់អគ្គីសនីជាង១លានគ្រួសារដែលភាគច្រើននៅក្រុង New Orleans មុនពេលវិវត្តន៍ទៅជាវិសម្ពាធ។
ក្រុមមន្រ្តីរបស់រដ្ឋនិយាយថា ដោយសារការខូចខាតមានទំហំធំពេក ដូច្នេះត្រូវចំណាយពេលរាប់សប្ដាហ៍ទម្រាំអគ្គីសនីអាចមានប្រើប្រាស់ឡើងវិញ។ ក្រុមមន្រ្តីបន្តថា ព្យុះកំណាចបានកាច់ផ្ដាច់សេវាទូរស័ព្ទ ប្រព័ន្ធទឹកប្រើប្រាស់ រួមទាំងផ្លូវជាច្រើនមិនអាចធ្វើដំណើរបាន ក៏ប៉ុន្តែប្រតិបត្តិការជួយសង្រ្គោះប្រជាជនចេញពីផ្ទះដែលទឹកជនលិចកំពុងបន្ត។
ជាមួយគ្នានោះ អាជ្ញាធរស្រុក Jefferson Parish នៃរដ្ឋ Louisiana ដែលរងផលប៉ះពាល់ធ្ងន់ធ្ងរ បានចេញបំរាមគោចររយៈពេលមួយថ្ងៃរាប់ចាប់ពីម៉ោង ៦ ព្រឹកថ្ងៃចន្ទ រហូតដល់ម៉ោង ៦ ព្រឹកថ្ងៃអង្គារ ដោយតម្រូវកុំឱ្យប្រជាជនធ្វើដំណើរនៅតាមដងផ្លូវព្រោះមានគ្រោះថ្នាក់ជាច្រើន។
កងកម្លាំងរដ្ឋនិយាយថា ខ្លួនបានដាក់ពង្រាយកម្លាំងចំនួន ៤ ៩០០ នាក់និងរថយន្ត ១៩៥ គ្រឿង ទូកជួយសង្គ្រោះ ៧៣ គ្រឿង និងឧទ្ធម្ភាគចក្រ ៣៤ គ្រឿង។
ក្រុមអ្នកព្យាករណ៍និយាយថា ជំនន់ទឹកភ្លៀង និងការរអិលបាក់ដី អាចកើតឡើងតាមបណ្តោយផ្លូវរបស់ព្យុះមុនពេលវាបក់បោកឆ្ពោះទៅរដ្ឋភាគខាងជើង។
Ida គឺជាព្យុះដែលគំរាមកំហែងដល់អាយុជីវិតយ៉ាងកំណាចមួយ បន្ទាប់ពីព្យុះសង្ឃរាកាទ្រីណា (Hurricane Katrina) ដែលបក់បោកចូលរដ្ឋ Louisiana កាលពីឆ្នាំ ២០០៥ ដោយសម្លាប់មនុស្សយ៉ាងហោចណាស់ ១ ៨០០ នាក់ និងបំផ្លាញក្រុង New Orleans យ៉ាងដំណំ។
អ្នកជំនាញនិយាយថា ផលប៉ះពាល់នៃការប្រែប្រួលអាកាសធាតុទៅលើភាពញឹកញាប់នៃព្យុះនៅតែមិនច្បាស់ ប៉ុន្តែការកើនឡើងនៃសីតុណ្ហភាពផ្ទៃសមុទ្រ ធ្វើឱ្យខ្យល់ក្តៅបក់ឡើងបង្កើតឱ្យមានថាមពលខ្ពស់បង្កជាព្យុះសង្ឃរា។
ខណៈដែលព្យុះថ្មីវាយប្រហារ រដ្ឋ Louisiana ត្រូវរងសម្ពាធពីជំងឺកូវីដ-១៩ ស្រាប់ហើយ ដោយមានអត្រាឆ្លងខ្ពស់បំផុតលំដាប់ទី ៣ នៅអាមេរិក។
