ភ្នំពេញ៖ នាព្រឹកថ្ងៃព្រហស្បតិ៍ ១០ រោច ខែស្រាពណ៍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី០២ ខែកញ្ញា ឆ្នាំ២០២១ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃនិយ័តករមូលបត្រកម្ពុជា (ន.ម.ក.) អមដោយឯកឧត្តមបណ្ឌិត វិន ភក្តី អគ្គនាយករងនៃ ន.ម.ក. បានដឹកនាំសហការីចូលរួមកិច្ចប្រជុំជាមួយអគ្គនាយក និងថ្នាក់ដឹកនាំរបស់ក្រុមហ៊ុន មេនូឡាយហ្វ៍ (ខេមបូឌា) ភីអិលស៊ី តាមរយៈប្រព័ន្ធអនឡាញ។

កិច្ចប្រជុំនេះ ត្រូវបានធ្វើឡើងក្នុងគោលបំណង ដើម្បីពិភាក្សាពាក់ព័ន្ធនឹងការចាប់អារម្មណ៍របស់ក្រុមហ៊ុន មេនូឡាយហ្វ៍ (ខេមបូឌា) ភីអិលស៊ី អំពីឱកាសក្នុងការវិនិយោគ និងការប្រកបអាជីវកម្មផ្សេងៗ ក្នុងវិស័យមូលបត្រ។ ឯកឧត្តមប្រតិភូ បានធ្វើការបង្ហាញដល់ក្រុមហ៊ុន មេនូឡាយហ្វ៍ (ខេមបូឌា) ភីអិលស៊ី អំពីសក្តានុពល និងការរីកចម្រើននៃវិស័យមូលបត្រ និងបានឆ្លើយតបនូវសំណួរសំខាន់ៗ ព្រមទាំងបានផ្តល់ជាអនុសាសន៍ពាក់ព័ន្ធនឹងការវិនិយោគ និងការធ្វើអាជីវកម្មក្នុងវិស័យមូលបត្រផងដែរ៕