វៀតណាម៖ មន្ត្រីជំនាញនិងអាជ្ញាធរជំរុញអ្នកជាពីកូវីដ ជួយដល់អ្នកជំងឺផ្សេងទៀត
ក្រុមអ្នកជំងឺកូវីដ១៩ដែលត្រូវបានព្យាបាលឲ្យជាសះស្បើយ មានភាពសុំាបណ្តោះអាសន្នពីជំងឺនេះគួរតែផ្តល់ជំនួយ ក្នុងកិច្ចការព្យាបាលអ្នកផ្សេងទៀតឲ្យជាសះស្បើយដូចខ្លួនដែរ នេះគឺជាការជំរុញរបស់មន្ត្រីសុខាភិបាល។
«ពួកយើងត្រូវការជំនួយរបស់អ្នក ចំពោះពេលវេលានៃការសម្រេចចិត្តនេះ បើទោះបីជាពួកយើងយល់ថា អ្នកត្រូវការពេលវេលា ដើម្បីជាសះស្បើយពីជំងឺសាហាវនេះក៏ដោយ» នេះគឺជាសម្តីរបស់អនុរដ្ឋមន្ត្រីសុខាភិបាល Nguyen Truong Son ដែលបានលើកឡើង តាមរយៈលិខិត ផ្ញើជូនទៅក្រុមអតីតអ្នកជំងឺកូវីដ១៩។
លោកបានសង្កត់ធ្ងន់ថា មានអ្នកជំងឺជាច្រើនកំពុងរងគ្រោះពីវីរុសបម្លែងខ្លួនងថ្មី Delta ជាពិសេស ក្នុងក្រុងហូជីមិញ ហើយរាល់ការជួយរបស់អ្នកជាសះស្បើយទាំងនោះ គឺចាំបាច់។
ជាមួយគ្នានេះ នាយករងនៃរដ្ឋបាលក្រុងហូជីមិញ Nguyen Hoai Nam បាននិយាយ កាលពីថ្ងៃព្រហស្បតិ៍ថា អតីតអ្នកជំងឺដែលចង់ជួយនឹងត្រូវកែន និងមានសំណងទូទាត់ដែរ។
គិតត្រឹមថ្ងៃទី១ កញ្ញា អ្នកជំងឺជាង១១៦,៣០០នាក់ត្រូវបានព្យាបាលឲ្យជាសះស្បើយ ក្នុងក្រុងនេះ ដែលអាចនឹងបង្កើតធនធានដ៏មានតម្លៃ ក្នុងការប្រយុទ្ធប្រឆាំងនឹងជំងឺកូវីដ១៩ នេះបើតាមការបន្ថែមរបស់លោក Nguyen Hoai Nam ។
ក្រុមមន្ត្រីជំនាញផ្សេងៗទៀតបានលើកឡើងថា អតីតអ្នកជំងឺទាំងនេះយល់ច្បាស់ណាស់ពីភាពលំបាក បទពិសោធន៍ផ្សេងៗ ហើយនឹងអាចជួយលើកទឹកចិត្តដល់អ្នកមិនទាន់ជាសះស្បើយ ឲ្យឆាប់ជាដែរ។
អនុរដ្ឋមន្ត្រី Nguyen Truong Son កាលពីខែកក្ដកា ក៏ធ្លាប់បានអំពាវនាវដល់ប្រជាពលរដ្ឋនៅក្រុងហូជីមិញ រួមមានទាំងអ្នកចូលនិវត្តន៍ និងនិស្សិតស្ម័គ្រចិត្តជួយប្រយុទ្ធប្រឆាំងនឹងជំងឺកូវីដ១៩ ក្នុងនោះ មានមនុស្សប្រមាណ១ម៉ឺននាក់បានឆ្លើយតបនឹងការអំពាវនាវនេះ៕ ប្រភពពី VNexpress
