តម្លៃទំនិញប្រើប្រាស់អាមេរិកកើនឡើង ០,៣% ក្នុងខែសីហា ជាអត្រាទាបបំផុតក្នុងរយៈពេល៧ខែនេះ
វ៉ាស៊ីនតោន៖ តម្លៃទំនិញប្រើប្រាស់អាមេរិកកើនឡើងទាបជាងការរំពឹងទុកក្នុងអត្រា ០,៣% កាលពីខែសីហា ដែលជាការកើនឡើងតិចតួចបំផុតក្នុងរយៈពេល ៧ ខែ និងជាសញ្ញាសង្ឃឹមមួយដែលថាអតិផរណាដែលហក់ឡើងថ្មីៗនេះ អាចនឹងធ្លាក់ចុះ។
នាយកដ្ឋានការងាររាយការណ៍កាលពីថ្ងៃអង្គារថា ការកើនឡើងនៅខែសីហាគឺខ្សោយជាងកំណើន ០.៥% ក្នុងខែកក្កដា និង ០.៩% ក្នុងខែមិថុនា ហើយវាគឺជាកំណើនតិចតួចបំផុតចាប់តាំងពីតម្លៃកើនឡើង ០,៣% ក្នុងខែមករាដើមឆ្នាំ។
ខណៈពេលដែលការហក់ឡើងតម្លៃហាក់ដូចជាធូរស្រាលកាលពីខែមុន អ្នកសេដ្ឋកិច្ចព្រមានថាមូលហេតុដូចគ្នានៅតែមាន។ ចង្វាក់ផ្គត់ផ្គង់នៅតែមានភាពរអាក់រអួល ជាពិសេសចំពោះសមាសធាតុសំខាន់ៗដូចជាបន្ទះឈីបកុំព្យូទ័រ ខណៈដែលតម្រូវការរបស់អ្នកប្រើប្រាស់លើសការផ្គត់ផ្គង់ ដែលនឹងជំរុញឱ្យតម្លៃខ្ពស់។
រយៈពេល ១២ ខែចុងក្រោយនេះ តម្លៃកើនឡើង ៥,៣% ដោយធ្លាក់ចុះបន្តិចពីពីរខែជាប់ៗគ្នាជាមធ្យម ៥,៤%ដែលជាការឡើងថ្លៃខ្លាំងបំផុតក្នុងរយៈពេល ១២ ខែ គិតចាប់តាំងពីឆ្នាំ ២០០៨ មក។ តម្លៃស្នូលដែលមិនរាប់បញ្ចូលថ្លៃអាហារនិងថាមពល កើនឡើង ០,១% ក្នុងខែសីហា និងកើនឡើង ៤% ក្នុងឆ្នាំកន្លងទៅ ដែលជាការកើនឡើងពីកំណើន ១២ ខែក្នុងអត្រា ៤,៣% ក្នុងខែកក្កដា និង ៤,៥% ក្នុងខែមិថុនា។
គណបក្សសាធារណរដ្ឋបានវាយប្រហារលើរដ្ឋបាលរបស់លោក ចូ បៃដិន ចំពោះការកើនឡើងនៃតម្លៃនៅឆ្នាំនេះ ប៉ុន្តែមន្រ្តីរដ្ឋបាលទទូចថា ការឡើងថ្លៃនេះមានលក្ខណៈបណ្តោះអាសន្ន ហើយវានឹងចាប់ផ្តើមវិលត្រឡប់មករកកម្រិតធម្មតាវិញ។
មានភស្តុតាងមួយចំនួននៅក្នុងរបាយការណ៍កាលពីថ្ងៃអង្គារដែលបង្ហាញថា ការកើនឡើងនៃករណីជំងឺកូវីឌ-១៩ ដែលបណ្តាលមកពីវ៉ារ្យ៉ង់ដែលតាអាចរួមចំណែកដល់ការធ្លាក់ចុះនៃតម្លៃទំនិញប្រើប្រាស់ ជាពិសេសនៅក្នុងតំបន់ដែលមានការធ្វើដំណើរមមាញឹក។ ការកើនឡើងសរុប ០.៣% គឺស្ថិតនៅក្រោមការព្យាការណ៍ដែលថាតម្លៃនឹងកើនឡើង ០.៤% នៅក្នុងខែសីហា។
ក្រុមអ្នកវិភាគនិយាយថា អត្រាទាបជាងការរំពឹងទុកគួរតែធានាថា ធនាគារកណ្តាលទុកគោលនយោបាយអត្រាការប្រាក់ទាបបំផុតរបស់ខ្លួននៅការប្រជុំនៅសប្តាហ៍ក្រោយ។ ប៉ុន្តែក្រុមអ្នកវិភាគនិយាយថា របាយការណ៍នេះមិនផ្លាស់ប្តូរទស្សនៈថាធនាគារកណ្តាលនឹងប្រកាសពីផែនការកាត់បន្ថយការទិញមូលបត្របំណុលប្រចាំខែរបស់ខ្លួននៅចុងឆ្នាំនេះទេ ប្រហែលជានៅក្នុងកិច្ចប្រជុំខែវិច្ឆិការបស់ធនាគារវិញ។
