ម៉ូតូចំនួន ៤០០គ្រឿង ដែលជាអំណោយរបស់អង្គការ JICA ត្រូវបានប្រគល់ជូនដល់ក្រសួងសុខាភិបាលកម្ពុជា ក្នុងពិធីមួយនាថ្ងៃទី១៥កញ្ញានេះ។ មន្ត្រីក្រសួងសុខាភិបាលបានថ្លែងថាម៉ូតូ៤០០គ្រឿងនោះ នឹងត្រូវ ចែកជូន មន្ដ្រីសុខាភិបាលជួរមុខទូទាំង២៥រាជធានី-ខេត្ដ ដើម្បីប្រើប្រាស់ក្នុងការងារទប់ស្កាត់ការរីករាលដាលជំងឺកូវីដ ១៩។

ពិធីប្រគល់និងទទួលដែលប្រព្រឹត្តទៅនៅឃ្លាំងឱសថកណ្តាលក្នុងខណ្ឌពោធិ៍សែនជ័យ រាជធានីភ្នំពេញ បានអញ្ជើញចូលរួមដោយរដ្ឋមន្ដ្រីក្រសួងសុខាភិបាលលោកសាស្ដ្រាចារ្យ ម៉ម ប៊ុនហេង  និងប្រធានតំណាង ការិយាល័យ JICA ប្រចាំប្រទេសកម្ពុជាលោកស្រី កាមេយ ហារូកុ ។

ប្រធានតំណាងការិយាល័យ JICA ប្រចាំកម្ពុជា បានសម្ដែងអំណរគុណយ៉ាងជ្រាលជ្រៅ ដល់រាជរដ្ឋាភិបាល កម្ពុជា ដែលបានផ្ដល់វ៉ាក់សាំងកូវីដ១៩ ដល់ជនជាតិជប៉ុនទាំងអស់ដែលកំពុងរស់នៅលើទឹកដីកម្ពុជា។

រដ្ឋមន្ត្រីក្រសួងសុខាភិបាល លោកសាស្ដ្រាចារ្យ ម៉ម ប៊ុនហេង បានថ្លែងចាត់ទុកថាអំណោយរបស់អង្គការចៃ កា នាពេលនេះ បានបង្ហាញនូវទឹកចិត្តសប្បុរសធម៌ដ៏ថ្លៃថ្លា និងថារាជរដ្ឋាភិបាលកម្ពុជានឹងចងចាំជានិច្ចនូវអំណោយ ចួលរួមប្រឆាំងនឹងជម្ងឺកូវីដ១៩នេះ៕