រដ្ឋមន្ត្រីសុខាភិបាល និងរដ្ឋមន្ត្រីបរិស្ថាន ចុះពិនិត្យផ្ទាល់បុរសជនជាតិចិនម្នាក់ ដែលផ្ទុកវីរុសរលាកសួតថ្មី នៅខេត្តព្រះសីហនុ
ខេត្តព្រះសីហនុ៖ នៅព្រឹកថ្ងៃទី២៨ ខែមករា ឆ្នាំ២០២០ នេះ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល និងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដែលជាប្រធានក្រុមការងារថ្នាក់ជាតិ ចុះជួយខេត្តព្រះសីហនុ ព្រមទាំងថ្នាក់ដឹកនាំខេត្តព្រះសីហនុ បានអញ្ជើញទៅពិនិត្យដោយផ្ទាល់នូវស្ថានភាពបុរសជនជាតិចិនម្នាក់ អាយុ ៦០ឆ្នាំ ដែលមានផ្ទុកវីរុសរលាកសួតថ្មី។បុរសចិននោះ កំពុងសម្រាកព្យាបាល នៅមន្ទីរពេទ្យបង្អែក ខេត្តព្រះសីហនុ (ពេទ្យចំការចេក) ដែលគ្រូពេទ្យ បានដាក់បុរសនេះ ក្នុងបន្ទប់មួយដាច់ដោយឡែកតែម្នាក់ឯង។
គិតមកដល់ម៉ោង ១០ព្រឹកថ្ងៃទី២៨ ខែមករា ឆ្នាំ២០២០ បុរសអ្នកជំងឺជនជាតិចិនរូបនោះ មានសភាពធម្មតា មិនមានចេញអាការៈអ្វីធ្ងន់ធ្ងរ ឈានដល់ការសង្គ្រោះបន្ទាន់ឡើយ។ បុរសជនជាតិចិន ដែលឆ្លងវីរុស កូរូណា ប្រភេទថ្មីនេះ មានឈ្មោះ ចា ជិនហួរ (Jia Jianhua) អាយុ ៦០ឆ្នាំ បានធ្វើដំណើរមកពីទីក្រុងវូហាន ប្រទេសចិន មកកាន់ខេត្តព្រះសីហនុ ប្រទេសកម្ពុជា កាលពីថ្ងៃទី២៣ ខែមករា ឆ្នាំ២០២០ ជាមួយក្រុមគ្រួសារ ៣នាក់ផ្សេងទៀត។ ក្នុងនោះ ក្រោយពិនិត្យ និងធ្វើវិភាគទាំងបួននាក់នេះរួចមក លទ្ធផលបង្ហាញថា មានវិជ្ជមានវីរុស កូរ៉ូណា តែម្នាក់គត់ គឺលោក ចា ជិនហួរ។
លទ្ធផលពីវិទ្យាស្ថាន Pasteur ដែលបញ្ជាក់ពីការផ្ទុកមេរោគរលាកសួតថ្មី កូរ៉ូណា វីរុស លើបុរសជនជាតិចិនម្នាក់នេះ ត្រូវបានរដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង បានប្រកាសក្នុងសន្និសីទកាសែត កាលពីយប់ថ្ងៃចន្ទ ទី២៧ ខែមករា ឆ្នាំ២០២០៕ធ.ដ
