តុលាការព្រហ្មទណ្ឌអន្តរជាតិ បើកការស៊ើបអង្កេតលើយុទ្ធនាការ «សង្គ្រាមប្រឆាំងគ្រឿងញៀន» របស់ប្រធានាធិបតីហ្វីលីពីន
អង្គបុរេជំនុំជម្រះនៃតុលាការព្រហ្មទណ្ឌអន្តរជាតិ (ICC) កាលពីថ្ងៃពុធកន្លងទៅបានចេញសេចក្ដីសម្រេចចិត្តមួយកម្រាស់ ៤១ទំព័រស្ដីពីស្ថានភាពនៅប្រទេសហ្វីលីពីន ដោយបើកឱ្យមានការស៊ើបអង្កេតលើ «សង្គ្រាមប្រឆាំងគ្រឿងញៀន» ដែលជាយុទ្ធនាការរបស់លោកប្រធានាធិបតីហ្វីលីពីន រ៉ូឌ្រីហ្គូ ឌុយទែរតេ។
សង្គ្រាមប្រឆាំងគ្រឿងញៀន ជាគោលនយោបាយប្រឆាំងគ្រឿងញៀនមួយរបស់រដ្ឋការលោក ឌុយទែរតេ ដោយគោលនយោបាយនេះអនុញ្ញាតឱ្យសម្លាប់អ្នកជួញដូរ និងអ្នកប្រើប្រាស់គ្រឿងញៀន មិនចាំបាច់ឆ្លងកាត់តាមផ្លូវតុលាការ។ ស្ថិតិរបស់រដ្ឋាភិបាលរកឃើញថា មនុស្ស ៦ពាន់នាក់ត្រូវបានស្លាប់ដោយសារតែរឿងនេះ តែខាងអង្គការសិទ្ធិមនុស្សអះអាងថាអ្នកស្លាប់មានច្រើនជាងនេះ។
តុលាការ ICC ជាតុលាការអន្តរជាតិមួយ ត្រូវបានបង្កើតឡើងនៅឆ្នាំ២០០២ តាមរយៈលក្ខន្តិកៈទីក្រុងរ៉ូម ដែលមានសមត្ថកិច្ចក្នុងការកាត់ទោសលើ «បុគ្គល» ដែលប្រព្រឹត្តិឧក្រិដ្ឋកម្មជាន់ខ្ពស់ ដែលមានដូចជា ឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មលុបបំបាត់ពូជសាសន៍។ នៅអាស៊ីអាគ្នេយ៍ កម្ពុជាជាប្រទេសតែមួយគត់ ដែលជាសមាជិកតុលាការនេះ ក្រោយពេលដែលហ្វីលីពីនក្រោមអាណត្តិលោក ឌុយទែរតេ ដកខ្លួនកាលពីឆ្នាំ២០១៩។
ការបើកឱ្យមានការស៊ើបអង្កេតលើយុទ្ធនាការប្រឆាំងនឹងគ្រឿងញៀន ធ្វើឡើងបន្ទាប់ពីតុលាការ ICC រកឃើញថា ការសម្លាប់រង្គាល នៅក្នុងយុទ្ធនាការប្រឆាំងគ្រឿងញៀនរបស់លោក ឌុយទែរតេ មាន «ធាតុច្បាប់» នៃឧក្រិដ្ឋកម្មប្រឆាំងនឹងមនុស្សជាតិ។
ទោះជាហ្វីលីពីនចេញពីតុលាការនេះក្ដី ក៏ខាង ICC ថាខ្លួនមានសិទ្ធិស៊ើបអង្កេតអំឡុងឆ្នាំ២០១៦ ដល់ឆ្នាំ២០១៩ ដែលជាអំឡុងពេលដែលលោកឌុយទែរតេធ្វើជាប្រធានាធិបតី ហើយថែមទាំងស៊ើបអង្កេតលើការបង្ក្រាបគ្រឿងញៀន អំឡុងពេលដែលលោកធ្វើជាអភិបាលក្រុង Davao ចាប់ពីឆ្នាំ២០១១ ដល់ឆ្នាំ២០១៦ ទៀតផង។
នៅក្នុងថ្ងៃព្រហស្បតិ៍នេះដែរ ខាងរដ្ឋាភិបាលហ្វីលីពីនក៏បានឆ្លើយតបថា ខាងខ្លួននឹងមិនសហការជាមួយ ICC នោះទេ ក្នុងការស៊ើបអង្កេតលើយុទ្ធនាការរបស់លោក ឌុយទែរតេ៕
