តៃវ៉ាន់បន្ធូរបន្ថយបម្រាមកូវីដ-១៩មួយចំនួន ក្រោយករណីវិជ្ជមានធ្លាក់ចុះទាប
កោះតៃវ៉ាន់បន្ធូរបន្ថយបម្រាមកូវីដ-១៩មួយចំនួនដូចជា បម្រាមនៅតាមរោងកុន កន្លែងលេងកីឡា ក៏ដូចជាតាមបណ្ដាស្ថានីយរថភ្លើងនានានៅក្នុងសប្ដាហ៍នេះ ហើយនឹងអនុញ្ញាតឱ្យបើកកន្លែងកម្សាន្តជាច្រើនបន្ថែមទៀតចាប់ពីថ្ងៃទី៥ ខែតុលា។ នេះបើតាមការលើកឡើងរបស់លោក Chen Shih-chung រដ្ឋមន្ត្រីក្រសួងសុខាភិបាល និងសុខុមាលភាពតៃវ៉ាន់ កាលពីថ្ងៃច័ន្ទកន្លងទៅ។
ការបន្ធូរបន្ថយបម្រាមនេះធ្វើឡើងបន្ទាប់ពីករណីវិជ្ជមានប្រចាំថ្ងៃនៅតៃវ៉ាន់ធ្លាក់ចុះយ៉ាងគំហុក ចាប់តាំងពីមានការកើនឡើងខ្លាំងកាលពីខែឧសភា ដោយនៅកាលនោះជាមធ្យមក្នុងរយៈពេល ១សប្ដាហ៍មានករណីវិជ្ជមានប្រចាំថ្ងៃក្បែរ ៦០០ករណី។
ដោយឡែកនៅក្នុងខែកញ្ញានេះវិញ ក្នុងមួយថ្ងៃមានក្រោម ១០ករណី ហើយកាលពីថ្ងៃទី២៧ ខែកញ្ញាកន្លងទៅ មិនមានករណីវិជ្ជមានថ្មីនោះទេនៅក្នុងដែនដីកោះតៃវ៉ាន់។
រដ្ឋមន្ត្រីសុខាភិបាលតៃវ៉ាន់បាននិយាយថា នឹងលែងមានការកំណត់ចំនួនមនុស្សចូលទៅទស្សនានៅតាមរោងកុន ក្នុងកន្លែងតាំងពិពណ៌ ឬ ព្រឹត្តិការណ៍កីឡានានា។ ចំណែកឯក្នុងវិស័យកម្សាន្តដូចជា ហាងដែលមានធ្លាបិទជិត ឬ កន្លែងផ្ដល់សេវាកម្មខារ៉ាអូខេជាដើម បុគ្គលិកដែលបម្រើការនៅទីនោះត្រូវតែទទួលវ៉ាក់សាំងយ៉ាងតិចមួយដូស រយៈពេល ១៤ថ្ងៃមុនពេលដែលកន្លែងទាំងនោះត្រូវបានអនុញ្ញាតឱ្យបើកឡើងវិញ។
យ៉ាងណាមិញ វិធានការសុខាភិបាលមួយចំនួននៅតែបន្តអនុវត្ត ខណៈកាតព្វកិច្ចក្នុងការពាក់ម៉ាសនៅតាមទីសាធារណៈនៅតែមាន ហើយមិនមែនផែនការណាមួយក្នុងការលុបចោលកាតព្វកិច្ចនេះនៅពេលឆាប់ៗនោះទេ៕
