ផលវិបាកនៃជំហរប្រឆាំងចិនរបស់អូស្ត្រាលី
ប្រមាណបួនឆ្នាំបន្ទាប់ប្រកាសថាខ្លួន «ឈរតតាំង» នឹងប្រទេសចិន ប្រទេសអូស្ត្រាលីគឺកំពុងប្រឈមមុខនឹងផលវិបាកសេដ្ឋកិច្ច និងនយោបាយ នៃការផ្លាស់ប្ដូរគោលនយោបាយ ដែលធ្វើឱ្យទំនាក់ទំនងរវាងប្រទេសទាំងពីរធ្លាក់ដល់កម្រិតទាបក្នុងរយៈពេលជាច្រើនឆ្នាំ។
សម្ព័ន្ធមិត្តជាច្រើនបានគាំទ្រ និងកោតសរសើរការផ្លាស់ប្ដូរជំហររបស់អូស្ត្រាលីមកប្រឆាំងនឹងចិន ដែលក្នុងខែនេះទំនាក់ទំនងបានធ្លាក់ចុះមួយកម្រិតទៀតបន្ទាប់ការប្រកាសកិច្ចព្រមព្រៀងសន្តិសុខជាមួយសហរដ្ឋអាមេរិក និងចក្រភពអង់គ្លេស AUKUS ដែលនឹងអនុញ្ញាតឱ្យអូស្ត្រាលីសាងសង់នាវាមុជទឹកនុយក្លេអ៊ែរ។ ប៉ុន្តែក្រុមអ្នករិះគន់បាននិយាយអូស្ត្រាលីបានមើលរំលងផលប្រយោជន៍ផ្ទាល់ខ្លួនជាច្រើន ក្នុងការចូលរួមកិច្ចខិតខំប្រឆាំងនឹងចិន។
ច្បាប់ទូលំទូលាយថ្មីដើម្បីប្រឆាំងការរីករាលដាលឥទ្ធិពលបរទេសក្នុងអូស្ត្រាលី បានដាក់ក្រុមពលរដ្ឋអូស្ត្រាលីដើមកំណើតចិនក្រោមការឃ្លាំមើលយ៉ាងខ្លាំង។ ទំនាក់ទំនងទៅបរទេស ដែលមានលក្ខណៈធម្មតាហើយសូម្បីតែមិនមែនទៅប្រទេសចិន ក៏ត្រូវទាញចូលការឃ្លាំមើល និងការប្រមូលផ្ដុំទិន្នន័យ ដែលធ្វើឱ្យពលរដ្ឋទាំងនេះមានការភ័យខ្លាចអំពីការពិភាក្សាប្រធានបទរសើបៗ។
ក្រុមអ្នករិះគន់បាននិយាយថាច្បាប់នេះគឺធ្វើឱ្យមានការរើសអើងពូជសាសន៍ ហើយធ្វើឱ្យក្រុមជនជាតិភាគតិចកាន់តែមានភាពភ័យខ្លាច និងជៀសវាងចូលរួមសកម្មភាពសាធារណៈ ឬសូម្បីតែចាកចេញពីប្រទេសអូស្ត្រាលី។
ក្រុមអ្នកការពារច្បាប់នេះ បាននិយាយវាបានកាត់បន្ថយការជ្រៀតជ្រែកឥទ្ធិពលរបស់រដ្ឋាភិបាលចិន ទៅលើសមាគមជនជាតិចិននៅប្រទេសអូស្ត្រាលី ប៉ុន្តែរហូតមកដល់ពេលនេះមិនមានការចាប់ខ្លួន ឬផ្ដន្ទាទោសបុគ្គលណាមួយដែលពាក់ព័ន្ធការជ្រៀតជ្រែករបស់ប្រទេសចិនទេ។
សង្គ្រាមពាណិជ្ជកម្មរវាងចិន និងអូស្ត្រាលី បានបង្កផលប៉ះពាល់យ៉ាងខ្លាំងដល់ម្ចាស់ឧស្សាហកម្មអ្នកផលិតស្រាក្រហម និងកសិករអូស្ត្រាលីជាច្រើន។ ផែនការធ្វើការវិនិយោគរបស់ក្រុមហ៊ុនចិនជាច្រើនទៅក្នុងឧស្សាហកម្មអូស្ត្រាលីដូចជាឧស្សាហកម្មទឹកដោះគោ ត្រូវបានរារាំងដោយរដ្ឋាភិបាលអូស្ត្រាលី ដែលជារឿយៗមិនបានផ្ដល់ហេតុផល។
រហូតមកដល់ពេលនេះអូស្ត្រាលីបានទ្រទ្រង់នឹងផលវិបាកសេដ្ឋកិច្ចនៃសង្គ្រាមពាណិជ្ជកម្មនេះបាន ដោយសារប្រទេសចិននៅមិនអាចរកអ្វីមកជំនួសការនាំចូលរ៉ែដែករបស់អូស្ត្រាលីបានទេ ហើយក្រុងកង់បេរ៉ាបានរកឃើញទីផ្សារថ្មីសម្រាប់ផលិតផលដែលចិនឈប់នាំចូល។ ប៉ុន្តែអ្នកវិភាគមួយចំនួនបាននិយាយថាការបាត់បង់ចំណែកទីផ្សារនៅប្រទេសចិន នឹងធ្វើឱ្យមានផលវិបាកធំជាងនេះនៅពេលអនាគត។
អ្វីៗនេះគឺផ្ទុយពីកាលពីជិត ១០ ឆ្នាំមុន ដែលកាលនោះអូស្ត្រាលីមានទំនាក់ទំនងយ៉ាងជិតស្និតជាមួយនឹងប្រទេសចិន បានធ្វើការបើកសេដ្ឋកិច្ចធ្វើពាណិជ្ជកម្មជាមួយទីក្រុងប៉េកាំង ហើយសូម្បីតែបានពិចារណាបង្រៀនភាសាចិននៅសាលាសាធារណៈទៅទៀត។ គេគិតថាអូស្ត្រាលីកាលនេះបានព្យាយាមកសាងទំនាក់ទំនងជិតស្និតជាមួយចិន គឺដើម្បីបង្កើតរូបភាពថាខ្លួនបានប្រែក្លាយជាអំណាចមួយក្នុងតំបន់ ហើយលុបបំបាត់រូបភាពថាអូស្ត្រាលីជាកូនចៅរបស់លោកខាងលិច ជាពិសេសអាមេរិក នៅអាស៊ី-ប៉ាស៊ីហ្វិក។
អ្នកវិភាគមួយចំនួននិយាយថាការធ្លាក់ចុះទំនាក់ទំនងរវាងប្រទេសទាំងពីរ គឺមិនមែនកំហុសរបស់អូស្ត្រាលីទាំងស្រុងទេ ដោយពួកគេនិយាយថាសកម្មភាពមួយចំនួនរបស់ចិនបានធ្វើឱ្យអូស្ត្រាលីត្រឡប់ទៅរកអាមេរិកវិញ។
កាលពីឆ្នាំ ២០១៧ ការបែកធ្លាយព័ត៌មាន និងការស៊ើបអង្កេតជាបន្តបន្ទាប់បានរកបង្ហាញថាឥទ្ធិពលរបស់គណបក្សកុម្មុយនិស្តចិនបានជ្រៀតជ្រែកចូលស្ថាប័ននយោបាយរបស់អូស្ត្រាលី និងស្ថាប័នផ្សេងទៀតដូចជាសាកលវិទ្យាល័យ និងក្រុមហ៊ុនធំៗ ដើម្បីកាច់ចង្កូតគោលនយោបាយឱ្យគាំទ្រផលប្រយោជន៍របស់ប្រទេសចិន។ ការបែកធ្លាយរឿងអាស្រូវនេះបានធ្វើឱ្យទំនាក់ទំនងធ្លាក់ចុះយ៉ាងខ្លាំង។
ក្រោមការដឹកនាំរបស់លោកប្រធានាធិបតីស៊ី ជីនពីង ចិនប្រកាន់ជំហរមិនចុះចាញ់ ហើយបានដាក់ទណ្ឌកម្មទៅវិញទៅមកជាមួយប្រទេសអូស្ត្រាលី និងបានបង្កកការពិភាក្សាជាន់ខ្ពស់ជាច្រើន។ សូម្បីតែអ្នករិះគន់គោលនយោបាយអូស្ត្រាលី ក៏បាននិយាយថាប្រទេសចិនបានជួយជំរុញឱ្យទំនាក់ទំនងធ្លាក់ចុះផងដែរ៕
