យន្តហោះរុស្ស៊ីដឹកអ្នកលោតឆត្រយោងធ្លាក់ សម្លាប់មនុស្សយ៉ាងហោចណាស់ ១៦នាក់
ម៉ូស្គូ៖ក្រសួងផ្នែកសង្រ្គោះបន្ទាន់រុស្ស៊ីរាយការណ៍ថា យន្តហោះមួយគ្រឿងដែលផ្ទុកអ្នកលោតឆត្រយោងមួយក្រុមបានធ្លាក់ចុះ បន្ទាប់ពីហោះឡើងនៅសាធារណរដ្ឋ Tatarstan ប្រទេសរុស្ស៊ីកាលពីព្រឹកថ្ងៃអាទិត្យ ដោយសម្លាប់មនុស្ស ១៦ នាក់ និងធ្វើឱ្យរបួស ៦ នាក់។
អភិបាលនៃសាធារណរដ្ឋ Tatarstan លោក Rustam Minnikhanov និយាយថា អ្នកបើកយន្តហោះបានរាយការណ៍ថាម៉ាស៊ីនខាងឆ្វេងរបស់យន្តហោះមិនដំណើរការនៅពេលហោះបានរយៈកម្ពស់ ៧០ ម៉ែត្រ បន្ទាប់មកក៏ព្យាយាមចុះចតជាបន្ទាន់នៅជិតទីក្រុង Menzelinsk ដោយព្យាយាមបង្វែរយន្តហោះដើម្បីចៀសវាងតំបន់ដែលមានមនុស្សរស់នៅ។ ប៉ុន្តែស្លាបរបស់យន្តហោះបានបុកនឹងរថយន្ត Gazelle ខណៈដែលចុះចតបណ្ដាលឱ្យក្រឡាប់។
យោងតាមក្រសួងសុខាភិបាលរុស្ស៊ី យន្តហោះឈ្មោះ The Let L-410 Turbolet ដែលធ្លាក់នេះ ដឹកអ្នកលោតឆត្រយោងចំនួន ២០ នាក់ និងអ្នកបើកពីរអ្នក ហើយសម្រាប់អ្នកដែលនៅរស់ទាំង ៦ នាក់ស្ថិតនៅក្នុងស្ថានភាពធ្ងន់ធ្ងរ។
លោក Ravil Nurmukhametov ប្រធានក្លឹបហោះហើរដែលជាម្ចាស់យន្តហោះនិយាយថា អវកាសយានិកប្រើប្រាស់តំបន់ដែលយន្តហោះធ្លាក់នេះសម្រាប់ការហ្វឹកហាត់ ដោយក្លឹបបានរៀបចំការប្រកួតជើងឯកអឺរ៉ុប និងជើងឯកពិភពលោកមួយ។
យ៉ាងណាមិញ លោក Nurmukhametov បដិសេធមិនធ្វើអត្ថាធិប្បាយវែងឆ្ងាយជុំវិញហេតុការណ៍ដែលកើតឡើង ដោយលើកឡើងថានឹងមានការស៊ើបអង្កេតការអនុវត្តច្បាប់ចំពោះករណីនេះ។ ចំណែកឯគណៈកម្មាធិការស៊ើបអង្កេតនិយាយថា ខ្លួនបានបើកការស៊ើបអង្កេតព្រហ្មទណ្ឌទៅលើការសង្ស័យថារំលោភលើច្បាប់សុវត្ថិភាព។
រុស្ស៊ីរឹតបន្តឹងស្តង់ដារសុវត្ថិភាពអាកាសចរណ៍របស់ខ្លួនក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែគ្រោះថ្នាក់នៅតែបន្តកើតមានជាពិសេសនៅតំបន់ដាច់ស្រយាល។ កាលពីខែមុន យន្តហោះដឹកជញ្ជូន Antonov An-26 ចំណាស់មួយគ្រឿងធ្លាក់នៅភាគខាងកើតនៃប្រទេសដោយសម្លាប់មនុស្ស ៦ នាក់ ហើយកាលពីខែកក្កដា យន្ដហោះម៉ាស៊ីនភ្លោះ Antonov An-26 មួយផ្សេងទៀតធ្លាក់នៅតំបន់ Kamchatka ដោយសម្លាប់មនុស្សទាំង ២៨ នាក់ដែលជិះ។
