អាមេរិកនិយាយថាការចរចាជាមួយតាលីបង់នៅក្រុងដូហាគឺ «ត្រង់ៗ និងប្រកបដោយវិជ្ជាជីវៈ»
កាលពីថ្ងៃអាទិត្យ ទី១០ តុលាសហរដ្ឋអាមេរិកបាននិយាយថាការចរចាជាមួយក្រុមតាលីបង់ជាលើកដំបូងចាប់តាំងពីក្រុមនេះចូលកាន់អំណាចនៅប្រទេសអាហ្វហ្គានីស្ថាន គឺ «ត្រង់ៗ និងប្រកបដោយវិជ្ជាជីវៈ» ដោយភាគីអាមេរិកបានបញ្ជាក់ជាថ្មីម្ដងទៀតថាក្រុមតាលីបង់នឹងត្រូវបានវិនិច្ឆ័យដោយសកម្មភាពរបស់ពួកគេ។
អ្នកនាំពាក្យក្រសួងការបរទេសអាមេរិកលោកណេដ ប្រៃសបាននិយាយថាក្នុងជំនួបនៅក្រុងដូហាប្រទេសកាតា គណៈប្រតិភូអាមេរិកបានផ្ដោតទៅលើប្រធានបទសន្តិសុខ ការប្រឆាំងអំពើភេរវកម្ម ការធ្វើដំណើរប្រកបដោយសុវត្ថិភាពសម្រាប់ពលរដ្ឋអាមេរិក ជនបរទេសដទៃទៀត និងជនជាតិអាហ្វហ្គានីស្ថាន ក៏ដូចជាបញ្ហាសិទ្ធមនុស្ស ជាពិសេសបញ្ហាសិទ្ធស្ត្រី និងកុមារី។
រីឯទូរទស្សន៍ Al-Jazeera វិញបានរាយការណ៍ថាតាលីបង់បានស្នើឱ្យអាមេរិកដោះលែងប្រាក់បម្រុងរាប់ពាន់លានដុល្លាររបស់ធនាគារកណ្ដាលអាហ្វហ្គានីស្ថាន ដែលឥឡូវនេះកំពុងជាប់បង្កកនៅធនាគារបរទេស។
Al-Jazeera ក៏បានរាយការណ៍ថារដ្ឋមន្ត្រីការបរទេសស្ដីទីរបស់តាលីបង់លោកអាមៀ ខាន ម៉ុតាគីបានស្នើឱ្យអាមេរិកជួយផ្គត់ផ្គង់វ៉ាក់សាំងជំងឺកូវីដ-១៩សម្រាប់ប្រជាជនអាហ្វហ្គានីស្ថាន ហើយបានពិភាក្សា «ការបើកទំព័រថ្មី» ក្នុងទំនាក់ទំនងរវាងប្រទេសទាំងពីរ។
រហូតមកដល់ពេលនេះគ្មានការរាយការណ៍អំពីការធ្វើកិច្ចព្រមព្រៀង ឬកិច្ចសន្យាណាមួយរវាងភាគីទាំងពីរក្នុងការចរចាខាងលើ៕
