ចិនថ្កោលទោសសហរដ្ឋអាមេរិក និងកាណាដា ចំពោះការបញ្ជូននាវាចម្បាំងឆ្លងកាត់ច្រកសមុទ្រតៃវ៉ាន់
ប៉េកាំង៖ យោធាចិនកាលពីថ្ងៃអាទិត្យថ្កោលទោសសហរដ្ឋអាមេរិក និងកាណាដា ចំពោះការបញ្ជូននាវាចម្បាំងរបស់ខ្លួនឆ្លងកាត់ច្រកសមុទ្រតៃវ៉ាន់កាលពីសប្តាហ៍មុន ដោយនិយាយថាប្រទេសទាំងពីរកំពុងគំរាមកំហែងដល់សន្តិភាព និងស្ថិរភាពនៅក្នុងតំបន់។
យោធាអាមេរិកនិយាយថា នាវាកំទេចមីស៊ីល USS Dewey របស់ខ្លួនបានធ្វើដំណើរឆ្លងកាត់ផ្លូវទឹកតូចចង្អៀតចន្លោះកោះតៃវ៉ាន់ និងចិន រួមជាមួយនាវាចម្បាំង HMCS Winnipeg របស់កាណាដាកាលពីសប្ដាហ៍មុន ដើម្បីបង្ហាញពីការប្តេជ្ញាចិត្តរបស់សហរដ្ឋអាមេរិក និងសម្ព័ន្ធមិត្ត ចំពោះតំបន់ឥណ្ឌូប៉ាស៊ីហ្វិកដោយសេរី និងបើកចំហ។
បញ្ជាការភាគខាងកើតរបស់កងទ័ពរំដោះប្រជាជនចិននិយាយថា កងកម្លាំងរបស់ខ្លួនបានឃ្លាំមើលនាវាទាំងនោះ។ បញ្ជាការបន្តថា៖ «សហរដ្ឋអាមេរិក និងកាណាដា ឃុបឃិតគ្នាដើម្បីបង្កបញ្ហា ធ្វើឱ្យប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាពនៃច្រកសមុទ្រតៃវ៉ាន់។ តៃវ៉ាន់គឺជាផ្នែកមួយនៃទឹកដីចិន។ កងកម្លាំងបញ្ជាការតែងតែរក្សាការដាស់តឿនកម្រិតខ្ពស់ និងប្រឆាំងយ៉ាងម៉ឺងម៉ាត់ចំពោះរាល់ការគំរាមកំហែង និងការបង្កហេតុ»។
បន្ថែមពីការអះអាងថាកោះតៃវ៉ាន់គឺជាទឹកដីរបស់ខ្លួន ចិនបានដាក់បេសកកម្មកងទ័ពអាកាសម្តងហើយម្តងទៀតចូលទៅក្នុងតំបន់កំណត់អត្តសញ្ញាណការពារអាកាសរបស់តៃវ៉ាន់ (ADIZ) ក្នុងរយៈពេលមួយឆ្នាំចុងក្រោយនេះ ដែលបង្កឱ្យមានកំហឹងពីរដ្ឋាភិបាលក្រុងតៃប៉ិ។ ប្រទេសនេះបញ្ជូនយន្តហោះប្រហែល ១៥០ គ្រឿងចូលទៅក្នុងតំបន់ក្នុងរយៈពេល ៤ ថ្ងៃដែលចាប់ផ្តើមនៅថ្ងៃទី ១ ខែតុលា ធ្វើឱ្យមានភាពតានតឹងបន្ថែមទៀតរវាងទីក្រុងប៉េកាំង និងតៃប៉ិ និងបង្កឱ្យមានការព្រួយបារម្ភជាអន្តរជាតិ។
ខណៈពេលដែលភាពតានតឹងនៅទូទាំងច្រកសមុទ្រតៃវ៉ាន់កើនឡើង មិនមានការបាញ់ប្រហារណាមួយកើតឡើងទេ ហើយយន្តហោះចិនក៏មិនបានចូលក្នុងលំហអាកាសតៃវ៉ាន់ ដោយផ្តោតសកម្មភាពរបស់ខ្លួននៅផ្នែកនិរតីនៃ ADIZ។ យ៉ាងណាមិញ ក្រសួងការពារជាតិតៃវ៉ាន់អះអាងកាលពីថ្ងៃអាទិត្យនេះថា យន្តហោះចិនចំនួន ៣ គ្រឿង រួមមានមានយន្តហោះប្រយុទ្ធ J-16 ចំនួន ២ គ្រឿង និងយន្តហោះប្រឆាំងនាវាមុជទឹកមួយគ្រឿង បានហោះចូលទៅក្នុងតំបន់ ADIZ ម្តងទៀត។
ប្រភព៖ Reuters
