ប៉េកាំង៖ ការិយាល័យស្ថិតិជាតិចិន (NBS) បានអោយដឹងថា ផលិតផលក្នុងស្រុកសរុប GDP របស់ប្រទេសមហាអំណាចមួយនេះ បានកើនឡើង ៩,៨ភាគរយក្នុងរយៈពេលបីត្រីមាសដំបូងក្នុងឆ្នាំ២០២១នេះ បើធៀបនឹងរយៈពេលដូចគ្នាកាលពីឆ្នាំមុន ដែលធ្វើឱ្យកំណើនសេដ្ឋកិច្ចជាមធ្យមក្នុងរយៈពេល ២ឆ្នាំចុងក្រោយនេះមានអត្រា ៥,២ភាគរយ។

ទន្ទឹមនេះ នៅត្រីមាសទី៣ ឆ្នាំ២០២១នេះ ផលិតផលក្នុងស្រុកសរុប GDP របស់ចិនបានកើនឡើង ៤,៩ភាគរយ បើធៀបនឹងត្រីមាសទី៣ ឆ្នាំ២០២០ ពោលគឺជាកំណើនមួយទាបជាងការកំណើន ១៨,៣ភាគរយនៅត្រីមាសទី១ និង ៧,៩ភាគរយនៅត្រីមាសទី២។ ទិន្នន័យរបស់ NBS បានអោយដឹងទៀតថា អត្រាគ្មានការងារធ្វើក្នុងទីក្រុងដែលត្រូវបានអង្កេតមានអត្រា ៤,៩ភាគរយនៅខែកញ្ញា ដែលធ្លាក់ចុះ ០,៥ពិន្ទុភាគរយ បើធៀបនឹងរយៈពេលដូចគ្នាកាលពីឆ្នាំមុន។

ទិន្នផលឧស្សាហកម្មតម្លៃបន្ថែមរបស់ប្រទេសចិនបានកើនឡើង ១១,៨ភាគរយក្នុងរយៈពេលបីត្រីមាសដំបូង បើធៀបនឹងរយៈពេលដូចគ្នាកាលពីឆ្នាំមុន ខណៈដែលការវិនិយោគលើទ្រព្យសកម្មថេរបានកើនឡើង ៧,៣ភាគរយក្នុងរយៈពេលដូចគ្នានេះ។ ដោយឡែកសូចនាករសេដ្ឋកិច្ចធំៗផ្សេងទៀតបានបង្ហាញពីភាពប្រសើរឡើងជាបន្តនៅទូទាំងសេដ្ឋកិច្ច ដោយការលក់រាយនៃទំនិញប្រើប្រាស់បានកើនឡើង ១៦,៤ភាគរយក្នុងរយៈពេលបីត្រីមាសដំបូងក្នុងឆ្នាំនេះធៀបនឹងរយៈពេលដូចគ្នាកាលពីឆ្នាំមុន៕ ប្រភព៖ ស៊ីនហួរ