ភ្នំពេញ ៖ ពិព័រណ៍សៀវភៅ Big Bad Wolf ជាពិព័រណ៍សៀវភៅថ្នាក់អន្តរជាតិ បានរៀបចំឡើងជាលើកដំបូងធំជាងគេនៅកម្ពុជា រយៈពេល១២ថ្ងៃ គឺចាប់ពីថ្ងៃទី ៩ មករា រហូតដល់ថ្ងៃទី ២០ ខែមករាឆ្នាំ ២០២០ ដោយមានសៀវភៅអង់គ្លេសរហូតដល់ជាង១លានក្បាល បែងចែកជាច្រើនប្រភេទផ្សេងៗគ្នា ក្រោមអធិបតីភាព ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដោយមានអ្នកចូលរួមជាច្រើននាក់ទៀត នាព្រឹកថ្ងៃទី៩ ខែមករា ឆ្នាំ២០២០ នៅផ្សាររុងរឿង ខណ្ឌជ្រោយចង្វារ ។

ឯកឧត្តម ខៀវ កាញារីទ្ធ បញ្ជាក់ថា នេះជាឱកាសមាសសម្រាប់ប្រជាពលរដ្ឋកម្ពុជា អាណាព្យាបាល ក៏ដូចជាសិស្សនិស្សិត ដើម្បីទិញសៀវភៅសម្រាប់អានពង្រីកនូវចំណេះដឹងរបស់ខ្លួន ស្របពេលដែលសៀវភៅទាំងអស់ សុទ្ធតែមានការបញ្ចុះតម្លៃជាពិសេសចាប់ពី៥០ដល់៩០ភាគរយ ។

ពិព័រណ៍សៀវភៅនាពេលនេះ មានការដាក់លក់នូវសៀវភៅរហូតដល់ជាង ១លានក្បាល ជាភាសាអង់គ្លេស ដោយបែងចែកចេញប្រភេទសៀវភៅផ្សេងៗគ្នា ដូចជាសៀវភៅ ដែលលក់ដាច់បំផុត, សៀវភៅល្បីៗ, ប្រលោមលោក, រឿងប្រឌិតបែបវិទ្យាសាស្ត្រ, មនោសញ្ចេតនា, សៀវភៅអភិវឌ្ឍខ្លួន, អក្សរសាស្ត្រ, ប្រលោមលោកក្រាហ្វិក, អាជីវកម្ម, ស្ថាបត្យកម្ម និង រចនា, សៀវភៅធ្វើម្ហូប និងសៀវភៅជាច្រើនប្រភេទទៀត នៅក្នុងកម្មវិធីពិព័រណ៍សៀវភៅដ៏ធំនេះ។

សូមបញ្ជាក់ថា ៖ ពិព័រណ៍សៀវភៅថ្នាក់អន្តរជាតិនេះ គឹនឹងបន្តរហូតដល់ថ្ងៃទី២០ ខែមករា ឆ្នាំ ២០២០ ដោយចាប់ផ្ដើមបើកពីម៉ោង៩ព្រឹក រហូតដល់ម៉ោង១២យប់ នៅក្នុងផ្សាររុងរឿង ខណ្ឌជ្រោយចង្វារ រាជធានីភ្នំពេញ។
ជាមួយគ្នានេះក្រុមហ៊ុនសែលកាត ដែលជាដៃគូរសហការផ្នែកទូរគមនាគមន៍របស់ពិព័រណ៍ Big Bad Wolf Sale នៅទីក្រុងភ្នំពេញ ឆ្នាំ2020 នឹងមានស្តង់ពិព័រណ័ផ្ទាល់ខ្លួនមួយសម្រាប់ ផ្តល់ការកំសាន្ត ដល់អ្នកចូលរួមផងដែរ ៕ធ.ដ