ប៉េកាំង៖ រដ្ឋាភិបាលចិនបានស្នើអោយគ្រួសារស្តុកទុកសម្ភារៈសំខាន់ៗក្នុងករណីមានអាសន្ន បន្ទាប់ពីជំងឺកូវីដ១៩ និងបញ្ហាភ្លៀងធ្លាក់មិនទៀងទាត់ ធ្វើអោយតម្លៃបន្លែកើនឡើង ចំពេលមានការព្រួយបារម្ភអំពីកង្វះការផ្គត់ផ្គង់។

ជាមួយគ្នានេះ ក្រសួងពាណិជ្ជកម្មចិនបានជំរុញឱ្យរដ្ឋាភិបាលក្នុងតំបន់ធ្វើការងារអោយបានល្អ ក្នុងការធានាការផ្គត់ផ្គង់ និងស្ថិរភាពតម្លៃទំនិញ ហើយផ្តល់ការព្រមានជាមុន ប្រសិនបើមានបញ្ហាណាមួយពីខ្សែសង្វាក់ផ្គត់ផ្គង់។ ក្រសួងពាណិជ្ជកម្មចិនបានសង្កត់ធ្ងន់ថា រដ្ឋាភិបាលមូលដ្ឋានគួរតែស្តុកទុកបន្លែផ្លែឈើនិងពង្រឹងបណ្តាញដឹកជញ្ជូនបន្ទាន់ ដើម្បីធានាបាននូវបណ្តាញចែកចាយប្រកបដោយប្រសិទ្ធភាព និងរលូន។  

គួរបញ្ជាក់ថា អាកាសធាតុខ្លាំង និងការរាតត្បាតនៃជំងឺកូវីដ១៩ បានធ្វើឱ្យសន្តិសុខស្បៀងកាន់តែមានការព្រួយបារម្ភសម្រាប់ប្រទេសចិន។ រដ្ឋាភិបាល​កំពុង​ធ្វើ​សេចក្តីព្រាងច្បាប់​ស្តីពី​សន្តិសុខ​ស្បៀង​ ក៏ដូចជា​កិច្ចខិតខំ​ប្រឹងប្រែង​ទប់ស្កាត់​កាកសំណល់​អាហារ។ រដ្ឋាភិបាល​ចិន​ក៏បាន​អំពាវនាវ​ឱ្យ​មានការ​ដាំ​បន្លែ​ឡើងវិញ​ឱ្យបាន​ទាន់ពេលវេលា ដោយ​ជំរុញ​ឱ្យ​អាជ្ញាធរ​មូលដ្ឋាន​ជួយ​ឧបត្ថម្ភ​។ យោងតាមក្រសួងកសិកម្មចិនបានអោយដឹងថា បច្ចុប្បន្ននេះប្រទេសចិនមានផ្ទៃដីដាំបន្លែ និងផ្លែឈើប្រហែល៧លានហិកតា៕ ប្រភព៖ Reuters