រដ្ឋមន្ត្រីការបរទេសចិន និងអាមេរិកទូរស័ព្ទជួបគ្នា ត្រៀមជំនួបលោកស៊ី និងបៃដិន
រដ្ឋមន្ត្រីការបរទេសចិន លោក វ៉ាង យី និងរដ្ឋមន្ត្រីការបរទេសសហរដ្ឋអាមេរិកលោក អង់តូនី ប្លីងកែន បានពិភាក្សាគ្នាតាមប្រព័ន្ធទូរស័ព្ទកាលពីថ្ងៃសុក្រសប្ដាហ៍មុន។
បើយោងតាមសេចក្ដីប្រកាសព័ត៌មានរបស់ភាគីទាំងសងខាង ជំនួបតាមប្រព័ន្ធទូរស័ព្ទនេះធ្វើឡើង ដើម្បីត្រៀមរៀបចំជំនួបតាមប្រព័ន្ធវីដេអូរវាងរវាងលោកប្រធានាធិបតីចិន ស៊ី ជីនពីង និងលោកប្រធានាធិបតីអាមេរិក ចូ បៃដិន។ ជំនួបរវាងមេដឹកនាំប្រទេសមហាអំណាចពិភពលោកទាំងពីរនេះ នឹងប្រព្រឹត្តិទៅនៅថ្ងៃទី១៦ ខែវិច្ឆិកា។ នេះបើតាមការចុះផ្សាយរបស់ចិន។
ក្រៅពីនេះ បញ្ហាច្រកសមុទ្រតៃវ៉ាន់ក៏ត្រូវបានលើកមកនិយាយផងដែរ។
រដ្ឋមន្ត្រីអាមេរិកបានសង្កត់ធ្ងន់ពីផលប្រយោជន៍អាមេរិកក្នុងការចង់ឃើញតំបន់នេះមានសន្តិភាព និងស្ថិរភាព ហើយលោកក៏បានសម្ដែងការព្រួយបារម្ភអំពីការដាក់សម្ពាធរបស់ចិន ទៅលើតៃវ៉ាន់ទាំងផ្នែកសេដ្ឋកិច្ច ការទូត និងយោធា។ លោក ប្លីងកែន ជំរុញឱ្យចិនចូលតុចរចាជាមួយតៃវ៉ាន់ ដើម្បីដោះស្រាយបញ្ហានានាប្រកបដោយសន្តិវិធី និងផ្អែកតាមផលប្រយោជន៍របស់ប្រជាជនតៃវ៉ាន់ ២៣លាននាក់។
ចំណែកឯរដ្ឋមន្ត្រីចិន បានតបទៅវិញថា ប្រសិនបើអាមេរិកចង់បានសន្តិភាពនៅច្រកសមុទ្រតៃវ៉ាន់មែន អាមេរិកត្រូវតែបញ្ឈប់ការគាំទ្រ និងប្រឆាំងទៅលើគំនិត «តៃវ៉ាន់ឯករាជ្យ»៕
ប្រភព៖ state.gov
