ទំនិញរបស់កម្ពុជានាំចេញទៅប្រទេសជប៉ុន ទទួលបានចំណូលជាង៩២០លានដុល្លារ ក្នុងរយៈពេល១០ខែ ដើម ឆ្នាំ២០២១នេះ។ យោងតាមរបាយការណ៍របស់ក្រសួងពាណិជ្ជកម្មកម្ពុជា ទំនិញនាំចេញទៅកាន់ប្រទេសជប៉ុន រយៈពេល១០ខែឆ្នាំ២០២១នេះ មានទំហំទឹកប្រាក់ជាង៩២០លានដុល្លារ ដែលកើនឡើង៥.២៧ភាគរយ ខណៈ ការនាំចូលពីជប៉ុនវិញ មានទំហំទឹកប្រាក់ជាង៤៩៥លានដុល្លារ។ ទំហំពាណិជ្ជកម្ម រវាងប្រទេសទាំងពីរ ក្នុងរយៈ ពេល១០ខែ ឆ្នាំនេះ សម្រេចបានសរុប ប្រមាណ១ពាន់៤១៦លានដុល្លារ កើនឡើង១.៣០% បើប្រៀបធៀបនឹង រយៈពេលដូចគ្នា នៅឆ្នាំ២០២០ ដែលទទួលបានចំណូលប្រមាណ១ពាន់៣៩៧លានដុល្លារ។

ទំនិញដែលត្រូវបាននាំចេញពីកម្ពុជា ទៅប្រទេសជប៉ុនរួមមាន៖ វាយណ្ឌភាព, ស្បែកជើង, ស្បៀងអាហារ និង គ្រឿងអេឡិចត្រូនិក ជាដើម។ ចំណែកឯជប៉ុន នាំចូលមកកម្ពុជា រួមមាន៖ ស្បៀងអាហារ, ទំនិញឧស្សហកម្ម, ផលិតផលពេទ្យ, គ្រឿងម៉ាស៊ីន, ឡាន និងគ្រឿងអេឡិចត្រូនិកជាដើម។

គូសបញ្ជាក់ថា ឆ្នាំ២០២០ កម្ពុជាបាននាំចេញ ទៅកាន់ប្រទេសជប៉ុន ក្នុងទំហំទឹកប្រាក់ជាង១ពាន់លានដុល្លារ ខណៈការនាំចូលពីជប៉ុន ចូលមកប្រទេសកម្ពុជាវិញ ក្នុងទំហំទឹកប្រាក់ជាង៦៣៧លានដុល្លារ៕