កងកម្លាំងអ៊ីស្រាអែលបាញ់សម្លាប់បុរសជនជាតិប៉ាឡេស្ទីនម្នាក់នៅតំបន់ West Bank
ក្រុមគ្រូពេទ្យប៉ាឡេស្ទីននិយាយថា កងកម្លាំងអ៊ីស្រាអែលបានបាញ់សម្លាប់បុរសម្នាក់អាយុ ២៦ ឆ្នាំក្នុងទីក្រុង Tubas នៅតំបន់ West Bank បន្ទាប់ពីការប្រឈមមុខដាក់គ្នាផ្ទុះឡើងក្នុងអំឡុងពេលការវាយឆ្មក់កាលពីព្រឹកថ្ងៃអង្គារ។
យោងតាមក្រសួងសុខាភិបាលប៉ាឡេស្ទីន បុរសជនរងគ្រោះឈ្មោះ Saddam Hussein Bani Odeh ត្រូវបានបាញ់ទម្លុះពីស្មា ធ្លុះដល់បេះដូង និងសួតខាងឆ្វេង ហើយស្លាប់នៅពេលមកដល់ក្បែរមន្ទីរពេទ្យ។
ទីភ្នាក់ងារសារព័ត៌មានប៉ាឡេស្ទីន Maan រាយការណ៍ថា ឧបទ្ទវហេតុនេះកើតឡើងបន្ទាប់ពីការប្រឈមមុខដាក់គ្នានៅក្នុងតំបន់រវាងទាហានអ៊ីស្រាអែល និងអ្នករស់នៅទីក្រុង Tubas ភ្លាមៗ បន្ទាប់ពីកងទ័ពអ៊ីស្រាអែលវាយឆ្មក់ទីក្រុងដើម្បីបង្រ្កាបតំបន់ West Bank ដែលសម្បូរជនជាតិប៉ាឡេស្ទីនរស់នៅ។ យ៉ាងហោចណាស់បុរសពីរនាក់ត្រូវបានចាប់ខ្លួនពីផ្ទះ ខណៈដែលប្រាំបីនាក់ផ្សេងទៀតត្រូវបានឃុំខ្លួនពីកន្លែងផ្សេងៗគ្នាក្នុងតំបន់ព្រឹកថ្ងៃអង្គារ។
ការចាប់ខ្លួននេះកើតឡើងប៉ុន្មានថ្ងៃបន្ទាប់ពីអ៊ីស្រាអែលប្រកាសថា ខ្លួននឹងជំរុញផែនការធ្វើផ្ទះចំនួន ៣០០០ ខ្នង បន្ថែមទៀតសម្រាប់អ្នកតាំងលំនៅថ្មីនៃជនជាតិជ្វីហ្វនៅតំបន់ West Bank ទោះបីជាមានការរិះគន់ពីអន្តរជាតិចំពោះការសាងសង់ខុសច្បាប់ក៏ដោយ។
ជនជាតិអ៊ីស្រាអែលរាប់សែននាក់សាងសង់លំនៅដ្ឋាននៅតំបន់ West Bank ដែលចាត់ទុកថាជាការខុសច្បាប់អន្តរជាតិ។ ទីតាំងលំនៅឋានខ្លះក៏ខុសច្បាប់អ៊ីស្រាអែលដែរ ប៉ុន្តែរដ្ឋាភិបាលមានការយឺតយ៉ាវ ឬមិនចង់ជម្លៀសពួកគេចេញ។
យោងតាមតួលេខរបស់ប៉ាឡេស្ទីន ប្រជាជនប៉ាឡេស្ទីនប្រហែល ៤ ៦៥០ នាក់ត្រូវជាប់នៅកន្លែងឃុំឃាំងរបស់អ៊ីស្រាអែល រួមទាំងស្ត្រីជាច្រើននាក់ និងអនីតិជនរាប់រយនាក់។
ប្រភព៖ Aljazeera
