EU អំពាវនាវរកការសម្របសម្រួលបញ្ហាព្រំដែនបេឡារុស ក្រោយបដិសេធសំណើរទទួលយកជនអន្តោប្រវេសន៍
ប្រធានគណៈកម្មការសហភាពអឺរ៉ុបអ្នកស្រី Ursula von der Leyen និយាយកាលពីថ្ងៃអង្គារថា ការជាប់គាំងរបស់មនុស្សរាប់ពាន់នៅតាមព្រំដែនភាគខាងកើតរបស់សហភាព ជាការប៉ុនប៉ងរបស់បេឡារុសដើម្បីធ្វើឱ្យប្លុកមានអស្ថិរភាព ជាជាងវិបត្តិជនអន្តោប្រវេសន៍ ហើយអំពាវនាវឱ្យមានការសម្របសម្រួល។
អ្នកស្រី von der Leyen ប្រាប់សភាអ៊ឺរ៉ុបថា ប្លុកនេះដោយរួមមាន២៧ ប្រទេសកំពុងឈរនៅក្នុងសាមគ្គីភាពជាមួយប៉ូឡូញ លីទុយអានី និងឡេតូនី ដែលកំពុងទទួលរងនូវផលប៉ះពាល់យ៉ាងខ្លាំងដោយសារផែនការរបស់ប្រធានាធិបតីបេឡេរុសលោក Alexander Lukashenko ដែលផ្ដល់ជើងហោះហើរឱ្យជនអន្តោប្រវេសន៍ដើម្បីឆ្លងដែនដោយខុសច្បាប់ចូលទៅសហភាព។
អ្នកស្រី von der Leyen លើកឡើងថា៖ «នេះមិនមែនជាវិបត្តិអន្តោប្រវេសន៍ទេ។ នេះជាការប៉ុនប៉ងរបស់របបផ្តាច់ការដើម្បីព្យាយាមធ្វើឲ្យប្រទេសប្រជាធិបតេយ្យជិតខាងមានអស្ថិរភាព»។ អ្នកស្រីបន្តថា សហភាពអឺរ៉ុបកំពុងសម្របសម្រួលការឆ្លើយតបរបស់ខ្លួនចំពោះបញ្ហាប្រឈមរបស់លោក Lukashenko ជាមួយដៃគូដែលមិនមែនជាសហភាពអឺរ៉ុបដូចជាសហរដ្ឋអាមេរិក កាណាដា និងអង់គ្លេស។
អ្នកស្រីនិយាយថា ដើម្បីរារាំងការដឹកជញ្ជូនជនអន្តោប្រវេសន៍ទៅកាន់រដ្ឋធានីមីនស្ក៍របស់បេឡារុស សហភាពអឺរ៉ុបនឹងបង្កើតបញ្ជីខ្មៅនៃក្រុមហ៊ុនទេសចរណ៍ដែលពាក់ព័ន្ធនឹងការផ្ដល់ប្រតិបត្តិការហោះហើរដល់ជនអន្តោប្រវេសន៍។
យោងតាមស្នងការសហភាពអឺរ៉ុបលោក Margaritis Schinas វិធានការនេះនឹងផ្តល់ឱ្យសហភាពអឺរ៉ុបនូវឧបករណ៍ផ្លូវច្បាប់មួយដើម្បីផ្អាកឬកំណត់ប្រតិបត្តិការរបស់ក្រុមហ៊ុន ឬសូម្បីតែហាមឃាត់ពួកគេពីសហភាពអឺរ៉ុបប្រសិនបើពាក់ព័ន្ធនឹងប្រតិបត្តិការដឹងជញ្ជូនជនអន្តោប្រវេសន៍។
លោក Stanislaw Zaryn អ្នកនាំពាក្យសម្រាប់សេវាពិសេសរបស់ប៉ូឡូញនិយាយថា៖ «អាជ្ញាធរប៉ូឡូញប៉ាន់ស្មានថា ជនអន្តោប្រវេសន៍ប្រហែល ១០ ០០០ នាក់ ឬច្រើនជាងនេះ ស្ថិតក្នុងប្រទេសបេឡារុសនៅឡើយ ដែលអាចបង្កើតសក្តានុពលសម្រាប់បញ្ហាបន្ថែមទៀត»។
លោកប្រធានាធិបតី Lukashenko ដែលបដិសេធរាល់ការចោទប្រកាន់ដែលថាលោកបង្កើតវិបត្តិតាមព្រំដែន ដាក់សម្ពាធដល់សហភាពអឺរ៉ុប និងប្រទេសអាល្លឺម៉ង់ឱ្យទទួលយកជនអន្តោប្រវេសន៍មួយចំនួន ខណៈដែលបេឡារុសធ្វើមាតុភូមិនិវត្តន៍មនុស្សជាង ៤០០ នាក់ ដូចជាមកពីអ៊ីរ៉ាក់ជាដើម។ ប៉ុន្តែសំណើរនេះត្រូវបានប្លុក ក៏ដូចជាក្រុងប៊ែកឡាំងបដិសេធ។
