បៃដិន អញ្ជើញមេដឹកនាំមកពី ១១០ ប្រទេសសម្រាប់កិច្ចប្រជុំកំពូលនៃលទ្ធិប្រជាធិបតេយ្យ
លោក ចូ បៃដិន ប្រធានាធិបតីសហរដ្ឋអាមេរិកនឹងអញ្ជើញមេដឹកនាំមកពីប្រទេសចំនួន ១១០មកពីជុំវិញពិភពលោក សម្រាប់កិច្ចប្រជុំកំពូលនៃលទ្ធិប្រជាធិបតេយ្យ។
បើយោងតាមការចុះផ្សាយរបស់ក្រសួងការបរទេសអាមេរិក កិច្ចប្រជុំនេះនឹងប្រព្រឹត្តិទៅនៅថ្ងៃទី៩ និងថ្ងៃទី១០ ខែធ្នូ ហើយកិច្ចប្រជុំនេះដែរនឹងប្រមូលផ្ដុំដោយមេដឹកនាំមកពីប្រទេសនានា ក៏ដូចជា សង្គមស៊ីវិល និងអ្នកជំនួញវិស័យឯកជនផងដែរ។
កិច្ចប្រជុំនេះនឹងផ្ដោតលើបញ្ហាប្រឈម និងកាលានុវត្តនភាព ដែលប្រទេសកាន់លទ្ធិប្រជាធិបតេយ្យកំពុងតែជួបប្រទះ ហើយផ្ដល់ជាវេទិកាមួយសម្រាប់ថ្នាក់ដឹកនាំប្រកាសពីការប្ដេជ្ញាចិត្តនានា ក្នុងការការពារប្រជាធិបតេយ្យ និងសិទ្ធិមនុស្សនៅក្នុង និងក្រៅប្រទេស។
ប្រទេសចំនួន ១១០ នឹងអញ្ជើញឱ្យមកចូលរួមក្នុងកិច្ចប្រជុំនេះ ហើយក្នុងចំណោមប្រទេសទាំងនោះក៏មាន តៃវ៉ាន់ អ៊ីរ៉ាក់ ឥណ្ឌា និងប៉ាគីស្ថានផងដែរ។ ចិន មិនត្រូវបានអញ្ជើញឱ្យមកចូលរួមទេ។
ក្នុងនោះដែរចំណោមប្រទេសអាស៊ានចំនួន ១០ មានតែប្រទេសចំនួន៣នោះទេ ដែលអាមេរិកបានអញ្ជើញ។ ៣ប្រទេសនោះមានដូចជា ឥណ្ឌូនេស៊ី ម៉ាឡេស៊ី និងហ្វីលីពីន។
កន្លងមក ប្រទេសចិនបានហៅការរៀបចំកិច្ចប្រជុំនេះ ជាការបែងចែក និងប្រកួតប្រជែងមនោគមវិជ្ជានៅលើពិភពលោក៕
