ប្រធានាធិបតីប្រទេសឆែក វ័យ៧៧ឆ្នាំ ឆ្លងកូវីដ
លោក Milos Zeman ប្រធានាធិបតីនៃសាធារណរដ្ឋឆែក តេស្តវិជ្ជមានចំពោះជំងឺ COVID-19 តែប៉ុន្មានម៉ោងប៉ុណ្ណោះបន្ទាប់ពីរដ្ឋាភិបាលរបស់លោក បានកំណត់ពេលឲ្យបារ ក្លឹបកម្សាន្ត និងភោជនីយដ្ឋានជាដើម «បិទទ្វារនៅត្រឹមម៉ោង ១០៖០០នាទីយប់» ចំពោះមុខកំណើននៃករណីឆ្លង COVID-19 រហូតដល់ ១៨,០០០នាក់ក្នុង១ថ្ងៃ នេះបើតាមទីភ្នាក់ងារព័ត៌មានរយធឺ។
លោក Milos Zeman មិនមានចេញអការៈនោះឡើយ បន្ទាប់ពីបានធ្វើតេស្តវិជ្ជមាន COVID-19 ប៉ុន្តែការឆ្លងជំងឺនេះ បានកើតមានឡើងបន្ទាប់ពីប្រធានាធិបតីវ័យ ៧៧ឆ្នាំរូបនេះ ទើបតែបញ្ចប់ការសម្រាកព្យាបាលជំងឺរុំារ៉ៃអស់ជាង ៤០ថ្ងៃ នៅក្នុងមន្ទីរពេទ្យ។ យ៉ាងណាក៏ដោយ លោក Milos Zeman កំពុងស្ថិតក្រោមការព្យាបាល និងតាមដានអការៈយ៉ាងដិតដល់ ពីសំណាក់ក្រុមគ្រូពេទ្យឆែក នេះបើតាមមន្ត្រីរដ្ឋាភិបាល។
គិតត្រឹមថ្ងៃទី២៥ ខែវិច្ឆិកា ឆ្នាំ២០២១ ឆែកមានករណីឆ្លងជំងឺ COVID-19 សរុប ២,០៦២,០៦៤ករណី ក្នុងនោះមានអ្នកស្លាប់សរុប ៣២,៥២៣ និងជាសះស្បើយវិញ ១.៧៩លាននាក់៕
