ភ្នំពេញ៖ ភ្នំពេញ៖ ក្នុងពិធីសម្ពោធដាក់ឱ្យប្រើប្រាស់ជាផ្លូវការសណ្ឋាគារ ហាយ៉ាត់ រីជិនស៊ី ភ្នំពេញ «HYATT REGENCY PHNOM PENH» នៅព្រឹកថ្ងៃទី១៥ ខែធ្នូ ឆ្នាំ២០២១ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ក្នុងនាមជាប្រធានអាស៊ាន ត្រូវសង្រ្គោះអាស៊ាន ៩ ឱ្យទៅជា១០ វិញ ។ សម្តេច បន្តថា ក៉ំបន្ទោសខ្ញ៉ំ រឿងដោះបញ្ហានៅមីយ៉ាន់ម៉ា ។

សម្តេចតេជោ ហ៊ុន សែន បានបញ្ជាក់ថា បញ្ហានៅមីយ៉ាន់ម៉ា មានករណី ២, ទី១ ដោះបាន ឬមិនបានជារឿងរបស់មីយ៉ាន់ម៉ាផ្នែកខាងក្នុងខ្លួនឯង កម្ពុជាគ្រាន់តែជួយសម្របស្រួលក្នុងនាមជាប្រធានអាស៊ានតែប៉ុណ្ណោះ។

សម្តេចតេជោ ហ៊ុន សែន បានបន្តទៀតថា ក៉ំសង្ឃឹមខ្លាំងពេកសម្រាប់ការជួយសម្របសម្រួលពីកម្ពុជា តែក៏មិនត្រូវបន្ទោសបង្អាប់កម្ពុជាដែរ។ សម្តេចតេជោ ថា ការដោះស្រាយពីសំណាក់ខ្ញ៉ំ មិនទាន់ទាំងបានធ្វើផង ស្រាប់តែចេញការវិភាគបែបនេះ បែបនោះ។

ទី២ សម្តេចតេជោ ហ៊ុន សែន បានបញ្ជាក់ថា បញ្ហា សេចក្តីថ្លែងការរួមសមុទ្រចិនខាងត្បូង (COC) គឺមិនច្បាស់ថា ចេញរួច ឬមិនរួចនោះទេ ពេលដែលកម្ពុជាធ្វើជាប្រធានអាស៊ាន ។ សម្តេច បានរំលឹកថា ហេតុអ្វីបានជាកម្ពុជាមិនអាចចេញសចក្តីថ្លែងការ COC បាន តើអ្នកដឹងថា នៅពីក្រោយមានអ្វីទេ? គឺគេចាប់បង្ខំឱ្យកម្ពុជាចេញសេចក្តីថ្លែងការរួម រឿងកោះនេះជារបស់អ្នកនេះ ដែនដីនេះជារបស់អ្នកនេះ។

សម្តេចតេជោ ហ៊ុន សែន បានសង្កត់ធ្ងន់ថា កម្ពុជាមិនមែនជាចៅក្រមកាត់សេចក្តីឱ្យកោះនេះជារបស់ប្រទេសនេះ ទឹកដីនេះជារបស់ប្រទេសនេះ នោះទេ ។ ជាមួយគ្នានេះ សម្តេចតេជោ ក៏បានអំពាវនាវឱ្យប្រទេសដែលមានបញ្ហាជាមួយគ្នាត្រូវដោះស្រាយទ្វេភាគីជាមួយគ្នាទៅ ៕ ដោយ វណ្ណលុក