ថៃមានអូមីក្រុង ៨០ករណីហើយ ពិនិត្យឡើងវិញចំពោះការ «តេស្តហើយទៅ»
ក្រសួងសុខាភិបាលនៃប្រទេសថៃនឹងណែនាំឲ្យផ្អាក វិធានការ «តេស្តហើយទៅ» សិន ដោយសារតែស្ថានភាពវីរុសបប្លែងថ្មី អូមីក្រុង កាន់តែឡើងខ្លាំង នៅទូទាំងពិភពលោក នេះបើតាមការចេញផ្សាយរបស់ទីភ្នាក់ងារព័ត៌មានបាងកកប៉ុស្តិ៍ នាថ្ងៃទី ២០ ធ្នូ ២០២១នេះ។
ប្រភពថា កន្លងមក វិធានការ «តេស្តហើយទៅ» ឬ Test and Go បាននិងកំពុងអនុវត្តសម្រាប់អ្នកដំណើរតាមអាកាសចាក់វ៉ាក់សាំងពេញលេញរួច ពោលគឺអ្នកដំណើរមកពីក្រុមបណ្តាប្រទេសពិសេស។
ប្រទេសថៃរកឃើញអូមីក្រុង ច្រើនជាង៨០នាក់ហើយ ក្នុងនោះ ១១ករណី ចន្លោះពីខែមេសា ដល់ ថ្ងៃទី១០ ធ្នូ ហើយ៥២ករណី ពីថ្ងៃទី១១ ដល់ ១៩ ធ្នូ ខណៈដែលករណីផ្សេងៗទៀត ត្រូវបានប្រកាសថា រកឃើញ នាព្រឹកថ្ងៃទី២០ ធ្នូនេះ។
លោក Supakit Sirilak អគ្គនាយកនៃអគ្គនាយកដ្ឋានវិទ្យាសាស្ត្រវេជ្ជសាស្ត្រនៃក្រសួងសុខាភិបាលបានឲ្យដឹងថា មានករណីអូមីក្រុងម្នាក់បានចូលប្រទេស តាមរយៈវិធានការ «តេស្តហើយទៅ» នេះ ដោយរកឃើញថា អវិជ្ជមាន កូវីដ ទាំងមុនពេលនិងក្រោយការទៅដល់ ប៉ុន្តែ ២ ឬ៣ថ្ងៃក្រោយមក អ្នកដំណើររូបនេះបានឈឺ ហើយរកឃើញថា មានផ្ទុកវីរុសបប្លែងថ្មីនេះ។
លោកបញ្ជាក់ថា គួរតែពិនិត្យឡើងវិញ ព្រោះករណីនេះ អាចត្រូវការ ចន្លោះពី៦ទៅ៧ថ្ងៃ បានរកឃើញ។ លោកបន្ថែមទៀតថា បើមិនពិនិត្យឡើងវិញទេ អ្នកដំណើរដែលអាចមានផ្ទុក ធ្វើដំណើរពេញប្រទេស បង្កជាការចន្លងក្នុងសហគមន៍៕
