លោកសួន សេរីរដ្ឋា : អរិភាពនៃនយោបាយការទូតរវាងកម្ពុជា-អាមេរិក គឺភាគីអាមេរិកជាអ្នកបង្កឡើង
ភ្នំពេញ : លោក សួន សេរីរដ្ឋា ប្រធានក្រុមប្រឹក្សាភិបាលវេទិកាសន្តិភាពកម្ពុជាបានបង្ហាញនូការសង្កេតរបស់លោកថា តាំងពីដើមមកគឺ កម្ពុជាព្យាយាមបង្ហាញជំហរចង់ធ្វើជាមិត្តរបស់អាមេរិក និងមិត្តជាមួយគ្រប់ប្រទេសលើពិភពលោកដែលមានចំណងការទូតជាមួយកម្ពុជា ។ កម្ពុជា ក៏បើកចំហរទទួលយកជំនួយអភិវឌ្ឍន៍មកពីគ្រប់ប្រទេសដែលចង់ជួយកម្ពុជា និងប្រជាជនកម្ពុជា… និយាយរួមរាជរដ្ឋាភិបាលកម្ពុជា ដែលដឹកនាំដោយសម្តេចតេជោហ៊ុនសែនជាតំណាងឆន្ទៈនៃប្រជាជនកម្ពុជាមិនដែលរើសអើងជំនួយឬរើសអើងអ្នកវិនិយោគទុនមកពីប្រទេសណាមួយឡើយ ។
បង្ហោះសារលើបណ្ដាញសង្គមហ្វេសប៊ុករបស់លោកនៅថ្ងៃទី២០ ខែធ្នូ ឆ្នាំ២០២១លោកបានសរសេរទៀតថា តែចុងក្រោយនេះពេល ដែលកម្ពុជាពង្រឹងសន្តិសុខ ស្ថិរភាពនយោបាយ និងខំការពារសន្តិភាព ដែលខ្លួនមានដើម្បីទុកពេលវេលាកសាងនិងអភិវឌ្ឍន៍ប្រទេស បែរជាភាគីអាមេរិកខ្លួនឯងបានខិតខំបង្កើតអរិភាពជាមួយកម្ពុជា ដោយម្តងហើយម្តងទៀត។ បានបង្កើតរឿងរ៉ាវមិនពិត មួលបង្កាច់បង្ខូចអំពីទំនាក់ទំនងដែលកម្ពុជាមានជាមួយចិន ព្រមទាំងរិះគន់ជំនួយចិនដែលជួយមកកម្ពុជា និងដាក់ទណ្ឌកម្មលើក្រុមហ៊ុនអ្នករកស៊ីចិន ដែលដាក់ទុនវិនិយោគនៅកម្ពុជា ។
លោកបញ្ជាក់ដោយសំដៅទៅលើអាមេរិកចំៗថា៖” ចរិតនយោបាយ «ខឹងគោវ៉ៃរទេះ» «ពេលចង់បានរត់ដេញចាប់ ពេលចង់សម្លាប់បបួលគ្នាដេញជាន់» ដែលអាមេរិកបានកំពុងធ្វើមកលើកម្ពុជា តាំងពីអតីតកាល រហូតមកដល់បច្ចុប្បន្ននេះ មិនខុសពីអ្វីដែលអាមេរិកបានធ្វើលើមេដឹកនាំនៃក្រុមចលនាផ្សេងទៀត នៅបរទេសផ្សេងៗទៀតលើពិភពលោកទេ “។
“ភាពហួងហែងនយោបាយការបរទេសអាមេរិក ដែលមានតែអញ បើចង់ឲ្យអញគាំទ្រ ត្រូវធ្វើតាមអញ បើអញស្អប់មិនចូលចិត្តអ្នកណា ត្រូវស្អប់មិនចូលចិត្តអ្នកនោះតាមអញ បើអញពហិកា ត្រូវពហិកាតាមអញ បើអញដាក់ទណ្ឌកម្មត្រូវគាំទ្រដាក់ទណ្ឌតាមអញ បើអញសប្បាយចិត្តអញឲ្យ តែអញអត់សប្បាយចិត្តអញកាត់ចោលលែងឲ្យវិញ ទាំងអស់នេះវាជាគំរង់នយោបាយដ៏ស្អុយគគ្រុករបស់មហាអំណាចចក្រពត្តិចាស់ ហើយដែលវាមិនមែនជាគំរូនយោបាយល្អរបស់ប្រទេសធំ សម្រាប់ប្រទេសតូចតាចរៀនសូត្រតាមនោះឡើយ…”។លោកសួន សេរីរដ្ឋាបញ្ជាក់។
លោកប្រធានក្រុមប្រឹក្សាភិបាលវេទិកាសន្តិភាពកម្ពុជាបានបញ្ជាក់ទៀតថា ” ឥរិយាបទដែលអាមេរិកបានធ្វើមកលើកម្ពុជា បានបង្ហាញពីភាពទន់ខ្សោយនៃនយោបាយការទូត និងកិច្ចការបរទេសរបស់ខ្លួននៅក្នុងតំបន់អាស៊ីប៉ាស៊ីហ្វិក ហើយវារឹតតែធ្វើឲ្យអាមេរិកបាត់បង់នូវឱកាសឈរជើងលើទីតាំងភូមិសាស្ត្រនយោបាយដ៏សំខាន់មួយនេះ ដើម្បីការប្រកួតប្រជែងរបស់ខ្លួន”។
លោកសួន សេរីរដ្ឋា បានបញ្ជាក់នៅចុងបញ្ចប់សំណេររបស់លោកថា ប្រជាពលរដ្ឋកម្ពុជា និងរាជរដ្ឋាភិបាលកម្ពុជា នៅតែឈរលើគោលការណ៍បង្កើតមិត្តភាពដោយឯករាជ្យ ហើយប្រជាពលរដ្ឋរបស់យើងទន់ភ្លន់និងរឹងមាំជានិច្ចជាមួយរាជរដ្ឋាភិបាល ក្រោមការដឹកនាំដ៏ត្រឹមត្រូវរបស់ សម្តេចតេជោ ហ៊ុន សែន ដើម្បីកម្ពុជា ជាមាតុភូមិសន្តិភាព ឯករាជ្យ អភិវឌ្ឍន៍ និងសហសន្តិវិជ្ជមានជាមួយគ្រប់ប្រទេសជាមិត្តលើពិភពលោក…៕ ដោយ: ពលជ័យ
