ក្រុមស្ទាវអុកឡុកក្នុងខេត្តមាត់សមុទ្រ ៨នាក់ លួច និងទទួលផលចោរកម្ម
លោកឧត្តមសេនីយ៍ទោ ជូន ណារិន្ទ ស្នងការនៃស្នងការដ្ឋាននគរបាលខេត្តព្រះសីហនុនៅព្រឹក ថ្ងៃទី២១ ខែធ្នូនេះបានធ្វើពិធីបង្ហាញមុខក្រុមស្ទាវដែលតែងតែអុកឡុកវាយកាប់ចាក់ លួច ឆក់ ប្លន់ នៅក្នុងខេត្តមាត់សមុទ្រចំនួន៨នាក់ និងសម្ភារដែលត្រូវបានដកហូតមួយចំនួនផងដែរ ។
លោកស្នងការបានបញ្ជាក់ថា ជនដែលរំខានប្រជាពលរដ្ឋក្នុងខេត្តព្រះសីហនុត្រូវបានកម្លាំងសមត្ថកិច្ចជំនាញព្រហ្មទណ្ឌខេត្តស្រាវជ្រាវបង្ក្រាបនេះជាករណីលួចមានស្ថានទម្ងន់ទោស (លួចកាច់បំបែកសោកម៉ូតូ) និងទទួលផលចោរកម្ម ។
កាលពីនៅថ្ងៃទី១៩ ខែធ្នូ ឆ្នាំ២០២១ វេលាម៉ោង៩ព្រឹក ការិយាល័យនគរបាលព្រហ្មទណ្ឌកម្រិតស្រាលខេត្ត បានទទួលបណ្តឹងពីប្រជាពលរដ្ឋម្នាក់ថា គាត់បាត់ម៉ូតូ១គ្រឿង ZOOMER X ឆ្នាំ២០១៨ ពណ៌ស្វាយ ពាក់ស្លាកលេខ ព្រះសីហនុ 1G-6945 ដែលចតទុកនៅមុខបន្ទប់ជួល ស្ថិតនៅក្រុមទី១៩ ភូមិ៥ សង្កាត់៤ ក្រុង-ខេត្តព្រះសីហនុ បន្ទាប់ពីទទួលបណ្តឹងរួច កម្លាំងជំនាញផែនការងារព្រហ្មទណ្ឌធ្វើការស្រាវជ្រាវយ៉ាងយកចិត្តទុកដាក់រហូតឈានដល់ការឃាត់ខ្លួនជនសង្ស័យបានចំនួន៨នាក់ជាបន្តបន្ទាប់ ដែលក្នុងនោះមានជនសង្ស័យចំនួន៦នាក់ ពាក់ព័ន្ធនឹងករណីលួចកាច់បំបែកសោកម៉ូតូ ចំណែក ២នាក់ទៀតពាក់ព័ន្ធនឹងករណីទទួលផលចោរកម្ម ។ករណីខាងលើនេះ មានជនរងគ្រោះឈ្មោះ សៀង ចាន់ដា ភេទប្រុស អាយុ២៧ឆ្នាំ មុខរបរចុងភៅ មានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ ។
សម្ភារបាត់បង់ ៖ ម៉ូតូ១គ្រឿង ម៉ាក ZOOMER X ស៊េរីឆ្នាំ២០១៨ ពណ៌ស្វាយ ពាក់ស្លាកលេខ ព្រះសីហនុ 1G-6945 ។ លោកស្នងការឲ្យដឹងទៀតថា ជនសង្ស័យពាក់ព័ន្ធនឹងករណីលួចកាច់បំបែកសោកម៉ូតូ៦នាក់នេះមាន ៖
១.ឈ្មោះ សុង វិច្ឆិកា ហៅអឿន ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិ៤ សង្កាត់៤ ក្រុង-ខេត្តព្រះសីហនុ ។
២.ឈ្មោះ ហាក់ វិទូ ភេទប្រុស អាយុ១៦ឆ្នាំ មុខរបរ មិនពិតប្រាកដ ស្នាក់នៅ ភូមិ៤ សង្កាត់៤ ក្រុង-ខេត្តព្រះសីហនុ ។
៣.ឈ្មោះ យ៉ាវ ឧត្តម ភេទប្រុស អាយុ ១៨ឆ្នាំ មុខរបរ មិនពិតប្រាកដ ស្នាក់នៅ មិនពិតប្រាកដ ។
៤.ឈ្មោះ សំ សុខជា ភេទប្រុស អាយុ ១៥ឆ្នាំ មុខរបរ មិនពិតប្រាកដ ស្នាក់នៅ មិនពិតប្រាកដ ។
៥.ឈ្មោះ ម៉ូង ឡុង ភេទប្រុស អាយុ ១៨ឆ្នាំ មុខរបរ មិនពិតប្រាកដ ស្នាក់នៅ មិនពិតប្រាកដ ។
៦.ឈ្មោះ ឈឿន ពិទូ ភេទប្រុស អាយុ ១៦ឆ្នាំ មុខរបរ មិនពិតប្រាកដ ស្នាក់នៅ មិនពិតប្រាកដ ។
ចំណែកជនសង្ស័យពាក់ព័ន្ធនឹងករណីទទួលផលចោរកម្ម២ នាក់ មាន ៖
១.ឈ្មោះ រឿន ពៅ ភេទប្រុស អាយុ ៣៥ឆ្នាំ មុខរបរ ជាងម៉ូតូ ស្នាក់នៅ ភូមិ៤ សង្កាត់៤ ក្រុង-ខេត្តព្រះសីហនុ ។
២.ឈ្មោះ រឿន បូរ៉េត ភេទប្រុស អាយុ ៤៣ឆ្នាំ មុខរបរ ជាងម៉ូតូ ស្នាក់នៅ ភូមិ៤ សង្កាត់៤ ក្រុង-ខេត្តព្រះសីហនុ ។
ចំពោះសម្ភារនឹងវត្ថុតាងចាប់យក ៖ មានម៉ូតូចំនួន៦គ្រឿង ម៉ាក ZOOMER X ៤គ្រឿង ម៉ាក HONDA ICON ១គ្រឿង និង SUZUKI MIO ១គ្រឿង ។ ស្លាកលេខម៉ូតូ ចំនួន១២ សន្លឹក ។ .កញ្ចក់ម៉ូតូ ១គូ ។
កាងម៉ូតូ ១ ។
ចំណែកជនសង្ស័យ និងវត្ថុតាងសមត្ថកិច្ចបានកសាងសំណុំរឿង បញ្ជូនទៅការសាលាដំបូងខេត្តតាមនីតិវិធី ។
ជាមួយនេះដែរ ស្នងការដ្ឋាននគរបាលខេត្តព្រះសីហនុ សូមជូនព័ត៌មានដល់ជនរងគ្រោះដែលបាត់ម៉ូតូ រួសរាន់មកពិនិត្យម៉ូតូដែលសមត្ថកិច្ចដកហូតបាននៅការិយាល័យព្រហ្មទណ្ឌកំរិតស្រាល ដោយភ្ជាប់ជាមួយឯកសារពាក់ពន្ធ ដើម្បីយកទៅប្រើប្រាស់វិញ ៕
