គ្រោះថ្នាក់ចរាចរណ៍បានកើនឡើងខ្ពស់ក្នុងត្រីមាសទី៤ឆ្នាំ២០២១ក្នុងស្ថានភាពដែលអំពើរឹតត្បឹតធ្វើសកម្មភាព ក្នុងសង្គមត្រូវបានបន្ធូរបន្ថយនិងក្រោយមកបានឈានដល់ការបើកប្រទេសសាឡើងវិញ។

អគ្គស្នងការរងនគរ បាលជាតិ នាយឧត្តមសេនីយ ហ៊ឹម យ៉ាន ដែលទទួលបន្ទុកផែនសុវត្ថិភាពចរាចរណ៍ទូទាំងប្រទេស បានថ្លែង កាលពីថ្ងៃទី២០ធ្នូប្រៀបធៀបថាក្នុងរយៈពេល៣ត្រីមាសឆ្នាំ២០២១ ការស្លាប់ជាមធ្យមដោយគ្រោះថ្នាក់ចរាចរណ៍ មានប្រមាណ៤នាក់ក្នុងមួយថ្ងៃ, ប៉ុន្តែឈានចូលក្នុងត្រីមាសទី៤ ពលរដ្ឋស្លាប់ដោយសារគ្រោះថ្នាក់ចរាចរណ៍ មានជាមធ្យម៥នាក់ក្នុងមួយថ្ងៃ ហើយគ្រោះថ្នាក់នេះ នឹងមិនអាចថមថយបានទេ បើសិនមិនមាន ផែនការច្បាស់ លាស់ក្នុងការកាត់បន្ថយគ្រោះថ្នាក់តាមដងផ្លូវនេះ។

នាយឧត្តមសេនីយ ហ៊ឹម យ៉ាន បានបញ្ជាក់ទៀតថា នៅត្រីមាសទី ៤ឆ្នាំ២០២១, ថ្ងៃខ្លះមានមនុស្សស្លាប់រហូតដល់១២នាក់ដោយការស្លាប់ជាក្រុម,​ ការស្លាប់ជាគ្រួសារ បន្ទាប់ពី ស្ថានភាពជំងឺកូវីដ១៩ បានធូរស្បើយ។

ទោះជាយ៉ាងណាក៏ដោយ, មន្ត្រីគ្រប់គ្រងផែនសុវត្ថិភាពចរាចរណ៍ទូទាំង ប្រទេសនេះ បានបញ្ជាក់ដែរថាក្នុងរយៈពេល ១១ខែ ឆ្នាំ២០២១នេះ អ្នកស្លាប់ដោយគ្រោះថ្នាក់ចរាចរណ៍មាន ការ ថយចុះ១៦២នាក់, ចំណែកអ្នករបួសក៏បានថយចុះ១ពាន់១២០នាក់ផងដែរ បើប្រៀបធៀបនឹង១១ខែឆ្នាំ២០២០៕